Triste yabʼjel pe wala chamtik
PENSARAʼAN wana yiljel jun pelikula sbʼa june maʼ jel naʼubʼal sbʼaj, bʼobʼta jun maʼ jel snaʼa yajel okʼ piano bʼa jelxa toyo. Ja pelikula wa xkʼe sjeʼ man yal xchʼinil, jastal wa xkʼe jejukyi yajel okʼuk ja piano sok ja jitsan oraʼik wa x-ekʼyuj snebʼjeli. Tsaʼan, wa xkilatik wanxa xya okʼ bʼa ay jitsan kristyano man jel xkʼot najuk sbʼaj bʼa yibʼanal ja luʼumi. Pe soka tyempo, wa x-ilxi jastal wa xkʼe awelaxuk man wa xchami.
Ja loʼil it merani jach ekʼa, kechan ja ixuk maʼ staʼa tiʼal ja pelikula it chamta. Sok cha junxta oj chʼakuk ja pelikula ama pilan ja maʼ mero wa xtax tiʼali, jastal jun científico, jun tajnum ma june maʼ jel naʼubʼal sbʼaj. Ama xlajxiyuj skʼulajel jitsan jastik junuk, bʼobʼta ojni jobʼ jbʼajtik jastik maʼ mas oj skʼuluk lekukxta mi awelaxi sok chami.
Tristeni yabʼjel, pe ja jaw jani jas oj ekʼ jbʼajtik kibʼanaltiki (Eclesiastés 9:5). Ama wa xleʼatik modo bʼa oj albʼuk ja jsakʼaniltiki, wani la awelaxitik sok wala chamtik. Sok mi kechanuk ja jaw, cha oj bʼobʼ chamkotik yuj smul jun desgrasya ma jun chamel bʼa wa xchʼakwani. Jastalni wa xyala ja Biblia, jachukotik jastal «ja tabʼi [ma ason]. jel tʼusan wa sje‘a sbʼaj. tixa wa sakʼ chʼaya» (Santiago 4:14, Ja yajkʼachil sju‘unil ja dyosi).
Jujuntik kristyano wa spensarane yuja mi xnaxi jas oj ekʼ jbʼajtiki sok yuja mey sbʼej ja jsakʼaniltiki, wa xyalawe: «La xa jcʼultic ja jgustotiqui porque jechel chabe oj chamcotic» (1 Corintios 15:32). ¿Anke yajni wa x-alxi ja it tini ay bʼa jpensartik ja chamelali? Sok ojni kʼotuk ja tyempo oj chamkotiki, sok oj kʼot jobʼ jbʼajtik jas sbʼej ja jsakʼaniltiki, sok masto ja yajni wan ekʼel jbʼajtik jun wokoli. Anto, ¿kechanta maʼ jaʼ it ja sakʼanili?
Jitsan ti wa sleʼawe bʼa ciencia. Ja jastik kʼotel snaʼunej ja científicoʼik sok ja loktorik bʼa yajel albʼuk mas tyempo ja jsakʼaniltiki, jujuntik bʼa yeʼnle waneto slejel modo bʼa yajel albʼuk mas. Pe ama jachuk, ayto sjobʼjelik sbʼaja jsakʼaniltik bʼa mi xnaʼatik jastal, ¿jas yuj wala awelaxitik sok wala chamtik? ¿Sok oj maʼ kʼotuk ja tyempo mixa maʼ oj chamuk? Ja tuk artikulo jakumi oj paklaxuk ja jastik it sok oj yaʼ sjakʼjel ja sjobʼjel it: ¿kechanta maʼ jaʼ it ja sakʼanili?
Bʼobʼta cha ojni akʼul gusto
JA JUʼUN CHOLUMANI
Slejel ajyel sakʼan mas tyempo
Jujuntik científicoʼik bʼa wa spaklaye ja jastik sakʼani sok ja archiboʼik nolanik sbʼaja jastal tojbʼelotiki wane slejel ja modo bʼa ajyel sakʼan mas tyempo. ¿Bʼaxa man kʼotel ja paklajelik it?
