Wani xbʼobʼ ajyan gusto ja wego
PENSARAN juna sakʼanil bʼa mey chamel, awelaxel sok mi maʼ oj chamuk. Ja tsamal sakʼanil jaw oj kʼotuk ja bʼa tyempo jakumto sok ja weʼn ojni bʼobʼa taʼ. Pe ja wego, ja smeranili bʼutʼel wokol. ¿Jastal oj bʼobʼ ajyan gusto ja wego? Ja Biblia ayiʼoj rasonik bʼa oj bʼobʼ ya ajyan gusto sok oj ya staʼ stojol jawa sakʼanili. La kiltik jastal oj skoltayotik ja Yabʼal ja Dyos bʼa oj kuchkujtik jujuntik wokolik ja bʼa sakʼanili.
AJYEL GUSTO SOKA JANEKʼ KIʼOJTIK
Ja rason bʼa Biblia: «Mi jauc ja jaʼ oj huaj acʼujol soc ja taqʼuini. Ajyanic gusto soc ja janecʼ ahuiojexi» (Hebreos 13:5).
Ja kristyano wa xyala ay jitsan jastik junuk bʼa tʼilan oj ajyukujtik. Pe ja Biblia wa xyala oj bʼobʼ ajyukotik «gusto soc ja janecʼ» kiʼojtik. ¿Jastal oj bʼobʼkujtik?
Jani mok jyajtaytik ja takʼini. Ja jel oj «ocʼ jcʼujoltic» ma syajtajel ja takʼini ikʼubʼal jitsan bʼa skʼulajel chikan jasunuk, anima xjomji ja sakʼanile, ja spamilyaʼe, ja yamigoʼe, ja modoʼalik bʼa toj yiʼoje ma ja jastal chaʼanyabʼale (1 Timoteo 6:10). ¡Jelni jitsan ja jas wa xchʼayawe! Chomajkil, ja maʼ wa syajtay ja takʼini «mini tʼun oj malxuk» (Eclesiastés 5:10).
Snajel mas chaʼanyabʼal ja kristyano yuja jastik junuki. Ay jastik junuk bʼa jel xmakuni, pe ja jastik jaw mi xbʼobʼ syajtayotik sok oj skʼanotik; ja jaw kechan wa sjeʼa ja kristyano. Ajyel jun meran kamigotik masni wa xya gustoʼaxukotik (Proverbios 17:17).
TA JNOCHOTIK JA RASONIK BʼA BIBLIA, GUSTO OJ AJYUKOTIK
KUCHELKUJTIK YAJNI MALOʼAYOTIK
Ja rason bʼa Biblia: «Jun kʼujolal bʼa gustoʼay juni lekil aʼan» (Proverbios 17:22).
Ja gustoʼili jani ja «aʼan» mas lek bʼa oj kuchkujtik ja yajni maloʼayotiki. Pe ¿jastal oj bʼobʼ ajyukujtik ja gustoʼil ja bʼa ekʼeleʼik jaw?
Yajel tsʼakatal. Ta jata wa xpensarantik sbʼaja jwokoltiki, ‹spetsanil ja kʼakʼujiki mini lekukuk› oj kiltik (Proverbios 15:15). Pe ja Biblia wa xyala: «Sbej ni oj caatic [...] stzʼacatal» (Colosenses 3:15). Tʼilani oj jnebʼtik yajel tsʼakatal yuja jastik lek ja bʼa jsakʼaniltiki, ama yal nuxik. Ja jastal tsamal wa xmukxi ja kʼakʼu, ja kʼunxta wa stsʼititi ja jaʼi ma ja stsenel jun jpamilyatik wani xbʼobʼ ya gustoʼaxuk ja jsakʼaniltik.
Skʼulajelyi jastik junuk ja tuk. «Mas ni jel lec [ma gusto] huax yila ja maʼ huax yaa que yuj ja maʼ huas scʼulan recibiri», jelni smeranil ja jaw ja yajni malo ayotiki (Hechos 20:35). Yajni ja tuk wa xyaʼawe tsʼakatal yuja jas wa xkʼulantiki, wani la gustoʼaxitik sok mi jel xpensarantik ja bʼa jwokoltiki. Skoltajel ja tuki masni lek wa xya ajyukotik.
YAJEL TSATSBʼUK JA NUPANELI
Ja rason bʼa Biblia: «Naʼawik stsajel ja jastik junuk mas tʼilan» (Filipenses 1:10, TNM).
Ja nupanumik bʼa mi jel xyawe ekʼ tyempo lajani xiwelani sbʼaj oj spil sbʼaje. Ja yuj jelni lek ja tatamal soka cheʼumal ayaweyi stʼilanil ja snupanele, ayil-e jani june ja bʼa jastik mas tʼilan ja bʼa sakʼanile.
Kʼulanik jastik jach lajan. Ja Biblia wa xyala: «Mas lek ja chawane yuja juneʼi» (Eclesiastés 4:9). Moka kʼuluk atuchʼil ja jastik waxa kʼulan gusto, mas lek pensaran jastik junuk bʼa oj bʼobʼa kʼulukex lajan. Oj bʼobʼa kʼulukex lajan ja jastik it; skʼulajel waʼelal, elel paxyal, yujel refresco ma skʼulajel tuk jasunuk bʼa yajel ekʼ gusto.
Jeʼawik waxa yajtabʼajex. Ja Biblia wa xyala ja tatamal soka cheʼumal tʼilan oj syajtay sbʼaje sok oj skis sbʼaje (Efesios 5:28, 33). Jun tsamal tsenel, jun telbʼech ma jun chʼin majtanal ojni bʼobʼ ya tsatsbʼuk jawa nupanelexi. Sok ajuluka kʼujol, kechantani ja oja taʼabʼasok ma oj wayansok jawa nupi (Hebreos 13:4).
Bʼobʼta cha ojni akʼul gusto
JAWA PAMILYA OJ BʼOBʼ AJYUK GUSTO
Leʼawik ja Dyosi bʼa gusto oj ajyuk jawa nupanelexi
Kechanta chabʼ sjobʼjelik oj bʼobʼ skoltaya bʼa oj tojbʼum mas jawa nupaneli.
