Jach yala jun yal akʼix bʼa 13 jabʼil ja yajni kʼebʼjiyi jun yal tsʼiʼi. Jun ixuk jel lek wan wajelyuj ja bʼa niwan snegosyo yala jaʼ tukbʼesjiyi ja sakʼanil ja computadora kʼebʼjiyi yuja stat ja yajni tito ay bʼa eskwela. Sok jun winik ajkʼachto nupanel wa spensaraʼan jani ja ajiyi jun yal juʼun bʼa tsamalxta kʼulubʼalyi yuja xcheʼumi ja yajni tsʼikwiyujile ja bʼajtan jabʼil nupaneleʼi.

Kada jabʼil, jitsan ixuk winik wa spilawe tyempo sok wa xchʼaka sbʼaje bʼa oj sleʼeyi jun «tsamal» smajtan ja yamigoʼe ma june bʼa pamilya bʼa jun ekʼele jel chaʼanyabʼalil. Sok jpetsaniltik wa xkʼulantik gusto bʼa lek aʼiljuk ja jas wa xkʼebʼatik. ¿Jas la chi ja weʼn? ¿Wan maʼ xa kʼana ja weʼn oj ajukawi ma oja wa jun majtanal bʼa tsamal aʼiljuk?

Jpetsaniltik wa xkʼanatik ja jaw, pe mi jaʼita yuj ja tsamal oj yabʼ ja maʼ wa x-ajiyiʼi chomajkil ja maʼ wa xyaʼaʼi. Ja Biblia wa xyala: «Mas ni jel lec huax yila ja maʼ huax yaa que yuj ja maʼ huas scʼulan recibiri» (Hechos 20:35). Pe masni tsamal wa x-abʼxi yajni ja maʼ waxa wayi jun majtanal jel xyawi tsʼakatal.

¿Jasa oj jkʼuluktik bʼa oj katik majtanalik bʼa oj ya gustoʼaxukotik sok yajel gustoʼaxuk ja maʼ wa xkatikyiʼi? Ta mi jel xlajxikujtik, ¿jastal oj jnatik jas tikʼe majtanal oj katik bʼa meran chaʼanyabʼal oj yil-e?