YOLOMAJEL JA BʼA SPATIKI | ¿JAS YUJ SKʼULAJEL JA BʼA TOJI?
¿Ayto maʼ stʼilanil skʼulajel ja bʼa toji?
Ja Hitoshi wa x-aʼtiji bʼa jun niwan negosyo bʼa Japón. Jun ekʼele, yajni wan spaklajel lajan soka yajwali ja imporme sbʼaja takʼin bʼa negosyo aljiyabʼ yuja yajwali mok stsʼijbʼuk toj ja imporme. Ja Hitoshi xcholoyabʼ ja yajwal bʼa mi xbʼobʼ skʼuluk ja jaw yujni ja skʼujoli wa xyala mi lekuk. Anto, ja yajwali yalyabʼ oj nutsjuk ja bʼa yaʼtel ta mi skʼulani sok tsaʼan, jachni ekʼa.
Ixawik tsaʼan, ja Hitoshi mini jun sgana ajyi ekʼe yuja mi staʼa jun yaʼtel bʼa mi oj sleʼ abʼal. Bʼa jun entrebista ajiyi, ja yeʼn yala mini skʼana oj sleʼ abʼal jach stsʼijbʼajel mi tojuk ja datoʼik. Ja maʼ kʼulji sok entrebistari yala: «¡Jelni tuk yabʼjel ja tikʼe pensar jaw!». Ja spamilya soka yamigoʼiki wa x-aljiyabʼ mok eluk sgana, pe ja Hitoshi mixa jel skʼuʼan bʼa jani mas lek ja ajyel toji. Ja yeʼn yala: «Kʼe jobʼ jbʼaj ta lek ja oj kal ja jas wa xkʼuʼani».
Ja jas ekʼ sbʼaj ja Hitoshi wa sjeʼa jel jitsan ja matik mi x-ajyi toji. Sok bʼa jujuntik masni lek bʼa yeʼnle, mas ja bʼa negosyoʼiki. Ja bʼa Sudáfrica, jun ixuk yala: «Ja bʼa kaʼteli ayon sok ixuk winik bʼa mi tojuk ja jas wa skʼulaneʼi. Sok jelni tsats ja tʼenwanel bʼa skʼulajel».
Ja bʼa mas ilubʼal sbʼaja it jani slejel abʼal. Jun spaklajel kʼulaxi ayxa jujuntik jabʼil ja bʼa Universidad bʼa Massachusetts, ja loktor Robert Feldman kʼot yil ja bʼa 60% bʼa matik ayxa skʼujol bʼa junuk 10 minuto wa xloʼilaniye wa sleʼawe jun abʼal. «Ja jas ilxi jelni chamkabʼtikon», xchi ja loktor Feldman. Cha yala: «Mini xmajlatikon ajyi ja slejel abʼal jelni tikʼan xkʼulaxi». ¿Jas yuj jelni kʼajyel xlexi abʼal ama jitsan mi lek xyilawe?
¿Jas yuj jel pukxel ekʼ ja slejel abʼal, ja elkʼanel sok tuk jastik bʼa mi tojuk? ¿Jastal wa xyilawe ja tuk ja ajyel toj? Sok ja mas tʼilani, ¿jasa oj bʼobʼ jkʼuluktik bʼa mi oj ekʼ jbʼajtik?
