RASON BʼA BIBLIA: «Mi lom xa cʼulanex pensar jastal oj ajyanic» (Mateo 6:25).

¿Jas wa stojolan? Ja Jesús yala ja yaljelik it ja bʼa sloʼil yaʼa bʼa wits Olibo. Jastal wa xyala jun diccionario bʼa Biblia, ja bʼa kʼumal griego ja yaljel sutubʼal «mi lom xa cʼulanex pensar» wa xkʼan yal jani «jastal wa xyila ja ixuk winik ja pobreʼili, ja waʼini sok tuk wokolik wa x-ekʼ kʼakʼu kʼakʼu ja bʼa jsakʼaniltiki». Jitsan ekʼele ja jas wa xya och jpensartiki jani ja jas ojto jakuki. Mini ay smaloʼil oj chamjkʼujoltik ja jastik wa xmakunikujtiki sok bʼa lek oj ajyuk ja matik wa xkʼanatikeʼi (Filipenses 2:20). Pe yajni ja Jesús yala: «Mi lom xa cʼulanex pensar», jani wan yaljel sbʼaja jastik jel xya chamjkʼujoltiki, sok jel xiwel wala ajyitik yuja jas oj ekʼuk ja jecheli sok mixa la ajyitik gusto (Mateo 6:31, 34).

¿Wan maʼ xkoltani ja rason it? Ja jas yala ja Jesús jelni xkoltaniʼa. ¿Jas yuj? Jujuntik libro sbʼaja it wa xyala yajni june chamkʼujolxta ay, yibʼanal ja skwerpo wa xkʼe aʼtijuk, sok wa xyiʼajan «chamelik bʼa jkʼujoltik, asma sok wa x-el jbʼajtik kʼoʼon».

Ja Jesús yaʼa jun lekil rason bʼa mok jel chamjkʼujoltik ja jastik junuki: lomniʼa. Ja yeʼn yala: «¿Huan ama xa hualahuex que oj ajyan jitzan tiempo ja ba luumi yuj ja chamcʼujol xta ayexi?» (Mateo 6:27). Wajel jkʼujoltik kechan ja jwokoltiki mini oj ya tojbʼuk ja jsakʼaniltik sok mini oj ya najatbʼuk. Cha mini spetsanil ekʼele jach wa x-ekʼ ja jastal wa xpensaraʼantiki. Jun winik yala: «Chamel jkʼujoltik sbʼaja jastik ojto ekʼuki lomni aʼtela, sok [...] jitsan ekʼele mini tolabida jach wa x-ekʼ ja jastal wantik xiwel oj ekʼuki».

¿Jastal oj bʼobʼ jkʼuluktik bʼa mi jel oj och jpensartik? Sbʼajtanil, jani sjipjel jkʼujoltik bʼa Dyos. Ta ja Dyos wa smakʼlay ja yal chaniki sok tsamalxta wa skʼutes ja nichimi, ¿mi maʼ oj cha stalnay ja yaʼtijumiki? (Mateo 6:25, 26, 28-30). Chomajkil, mok ekʼxan bʼajtan: kechanta pensaraʼan bʼa jun ita kʼakʼu. Ja Jesús yala: «Jach ni ja tiempo oj to jacuqui, mix cham acʼujolex. Mi sbejuc najtil tiempo ja hua pensarexi. Cʼacʼu cʼacʼu huan eqʼuel ahuocolexi». Tuktukil ja wokolik wa x-ajyi kʼakʼu kʼakʼu (Mateo 6:34).

Ta wa xkʼuʼantik ja srason ja Jesús, mini jel oj syam-otik chamel sok «jaxa Diosi oj ya laman ja [jkʼujoltiki]» (Filipenses 4:6, 7).