YOLOMAJEL JA BʼA SPATIKI | ¿JAS YUJ SKʼULAJEL JA BʼA TOJI?
Ja skʼulajel bʼa mi tojuki wa xjomwani
«Bʼa jitsan ekʼele, jun yal abʼal wani xbʼobʼ ya elan bʼa jun wokol» (Samantha, Sudáfrica).
¿Jach maʼ waxa pensaran ja weʼn? Jpetsaniltik jtʼaspunejtik slejel abʼal jastal ja Samantha. Pe ja jas wa xkʼulantik yajni ay ekʼele bʼa wa sjutbʼinotik bʼa oj jkʼuluktik jastik bʼa mi tojuk tini oj sjeʼ ja jastal mero kʼotelotiki. Jun sjejel, ta ja jas wa xkʼanatiki ja kanel lek soka tuki, bʼobʼta oj jkʼuluktik jastik bʼa mi tojuk sok tsaʼan slejel modo bʼa skoltajel jbʼajtik. Pe yajni wa xchiknaji ja smeranili, wani xkilatik ja swokolil ja abʼal jleʼatiki. La kiltik jastal wa xjomwani.
JA ABʼALI WA XCHʼAYA JA SJIPJEL JKʼUJOLTIK
Ja sjipjel kʼujolal jani ja yechalil bʼa lek wa xkila jbʼajtik. Yajni chawane wa sjipa skʼujol sbʼaje, mini jas wa xya chamskʼujole. Pe ja it wani xyiʼaj tyempo. Soka it wa xbʼobʼi yajni wa spilawe tyempo bʼa ajyel lajan, wa xyiʼaj sbʼaje loʼil jaman lek sok meran wa xchamskʼujol sbʼaje. Pe sokta jun abʼal, ma jun skʼulajel bʼa mi tojuk, wani xchʼay ja sjipjel kʼujolal. Sok ta ti chʼayi, jelni wokol xlokʼolaxi.
¿Ay maʼ bʼa sloʼluneja june maʼ jel lek xa wiʼabʼajsok? Bʼobʼta jel yaj awabʼi, sok bʼobʼta awabʼ xchʼaykʼujolana, sok jachniʼa. Ti wa xkilatik ja skʼulajel bʼa mi tojuk wa sjomo ja jastal jel lek wa xkila jbʼajtiki.
JA SKʼULAJEL BʼA MI TOJUK WA X-EKʼ JBʼAJTIK
Bʼa jun spaklajel skʼulan ja Robert Innes, maestro bʼa skʼeljel ja stsʼakol jastik junuk ja bʼa Universidad bʼa California, yila «ja skʼulajel bʼa mi tojuk wa x-ekʼ jbʼajtik». Ja yuj, ja skʼulajel bʼa mi tojuk jach jastal jun chamel bʼa jel wego spuku sbʼaj: ta mas tyempo wala ajyitik sok june maʼ kʼajyel wa sleʼa abʼal, cha ojni jnebʼtik slejel abʼal.
¿Jasa oj jkʼuluktik bʼa mi oj ekʼ jbʼajtik? Ja Biblia oj bʼobʼ skoltayotik. Paklay ja rasonik wa xyaʼa ja Biblia.
