¿Jas oj jkʼuluktik bʼa oj ajyukotik sakʼan ja bʼa yajkʼachil luʼum?
Ja bʼa artikuloʼik ekʼta, jnebʼatik ke ojxta xchʼaysnajel ja luʼumkʼinal it, wa xkʼan kaltik, ke ja Dyos ojxta xchʼaysnajel jastik jel malo sok spetsanil ja swokoliki. ¿Jas yuj seguro aytik sbʼaja it? Yujni ja Yabʼal ja Dyos, ja Biblia, wa xya jkʼuʼuktik:
«Jaxa jas ay ja ba mundo [...], oj ni chʼacuca» (1 JUAN 2:17).
Pe cha wani xkʼuʼantik lek ayni maʼ oj kanuke sakʼana, yujni ja teksto wa snochoyi:
«Pero ja maʼ huas scʼulan ja jas huas scʼana ja Diosi, [...] oj ajyuc sacʼanil tola vida».
Ja yuj, ja jas oj jkʼuluktik bʼa kanel sakʼan jani ajyel kʼuʼabʼal soka Dyosi. Pe bʼa oj jkʼuʼuktikyi, tʼilani oj jnatik sbʼaj.
LA JNATIK SBʼAJ JA DYOS BʼA OJ KANKOTIK SAKʼAN
Ja Jesús yala: «Ja sacʼanil jahui jaʼ ba oj naajuc abaj ja hueni porque ja hueni, quechan único Dios mas nihuana» (Juan 17:3). Bʼa oj kankotik sakʼan ja bʼa xchʼakelal ja luʼumkʼinal it, tʼilani oj jnatik sbʼaj ja Dyosi. Wa xkʼan alxuk mi kechanta snajel ay jun Dyos sok snajel tʼusan jastik bʼa yeʼna. Tʼilani oj kamigoʼuktik. Yajni wa xkʼanatik ay maʼ oj kamigoʼuktik, tʼilani oj jpiltikyi tyempo. Jachni wa x-ekʼ soka Dyosi. La kiltik jujuntik sjejel bʼa Biblia bʼa oj skoltayotik yajel kʼiʼuk sok stalnajel ja jastal wala taxtik soka Dyosi.
LA JKʼUMUKTIK JA BIBLIA SPETSANIL KʼAKʼU
Ojni kankotik sakʼan ja bʼa xchʼakelal ja luʼumkʼinal it ta wa xkʼanatikyi ja skoltanel ja Dyos sok ta wa xkʼulantik ja jas wa skʼana.
Ja smeranil bʼa oj ajyukotik sakʼan, tʼilani oj waʼkotik. Pe ja Jesús cha yala: «Mi quechanuc ja huaelal huax yaa sacʼanil ja cristiano, jaʼ ni spetzanil ja jas huax el ja ba sti ja Diosi» (Mateo 4:4).
Ja bʼa jtyempotiki tini wa xtaʼatik ja jas wa xyala ja Jyoba bʼa Biblia. Yajni wa xpaklaytik ja libro it jel chaʼanyabʼali, wani xnebʼatik ja jas skʼulan ja Dyos ja bʼa tyempo najate, ja jas wan skʼulajel ja wego sok ja jas oj skʼuluk ja bʼa tyempo jakumi.
LA jKʼANTIKYI JA SKOLTANEL JA DYOS
¿Jasa oj jkʼuluktik ta wa xkʼanatik oj jkʼuʼuktikyi ja Dyosi, pe wokol wa xkabʼtik yajelkan skʼulajel jastik bʼa wa xyala ke mi lekuk? Ta jachuk, snajel sbʼaj lek ja Dyos jelni oj skoltayotik.
La kiltik ja jas ekʼ sbʼaj jun ixuk bʼa oj katik sbʼiʼiluk Sakura. Ja yeʼn wani xkoʼ mulal sok ixuk winik ajyi, pe yajni kʼe spaklay ja Biblia snebʼa ke ja Dyos wa xyaʼa ja mandar it: «¡Jipahuic xa can jun lado ja sleejel ja mulal soc otro ixuqui [ma winiki]!» (1 Corintios 6:18). Ja Sakura skʼanayi ja Dyos bʼa aʼajukyi ja ipal sok bʼobʼni stukbʼes ja sakʼanili. Pe ama jachuk, tʼilani mi oj yakan skʼulajel luchar soka prebaʼiki. Ja yeʼn wa xyala: «Yajni ay kiʼoj pensarik bʼa koʼel mulal sok ixuk winik, wa xkalayabʼ jaman lek ja Jyoba, yujni mi xbʼobʼ jkʼul luchar jtuchʼil soka jastal ayon xkabʼi. Ja orasyon yaʼunej mojxukon mas soka Jyoba». Jastalni ja Sakura, miyonik kristyano wane snajel sbʼaj mas ja Dyosi, jaxa Dyosi wa xyayile ja ipal wa xmakuni yujileʼi bʼa oj stukbʼes ja sakʼanile sok yijel ja sakʼanile jastalni wa skʼana ja yeʼn (Filipenses 4:13).
Yajni mas wa xnaʼatik sbʼaj ja Dyosi, masni oj snaʼ jbʼajtik sok oj yil-otik jastal lekil yamigo (Gálatas 4:9; Salmo 25:14). Jachuk oj kankotik sakʼan ja bʼa xchʼakelal ja luʼumkʼinal it sok ajyel sakʼan ja bʼa yajkʼachil luʼum xchapunej ja Dyosi. ¿Sok jastal oj ajyuk ja Luʼumkʼinal jaw? Ja artikulo jakumi wa xcholo.
a Ja Biblia wa xyala ke ja Dyosi sbʼiʼil Jyoba.