Jitsan tuk kristyanoʼik wa skʼuʼane ke bʼa ajyelyujile jun lekil sakʼanile ja bʼa tyempo jakumi, tʼilani oj sjeʼe lek ja smodoʼeʼi. Ja yuj wani skʼujolane bʼa skisjel ja tuk, ajyel lekil smodoʼe, skʼulajel ja jas tʼilan oj skʼulukeʼi sok ajyel jun skoncienciaʼe bʼa sak. Ja Linh, jun ixuk ti sbʼaj bʼa Vietnam, wa xyala: «Tolabida jpensaraʼan ta mix och jkʼabʼ sok wa xkala ja stojolili ojni wajkuj lek».

Jujuntik wa skʼulane jastik lek yujni ja jaw ja jas wa xjejiyile yuja srelijyone. Jun winik ti sbʼaj bʼa Taiwán, sbʼiʼil Hsu-Yun, wa xyala: «Sjeʼaweki, ke yajni wa xcham jun kristyano, gusto wa x-ajyi ma wani xyiʼaj wokol bʼa tolabida, pes jani wa xyila ja jas skʼulan bʼa snajtil ja sakʼanil».

Meraniʼa, yajni wa xkʼulantik jastik lek sbʼaja tuki wani xwajkujtik lek. Pe jitsan kristyano yaʼunej sbʼaje kuenta ke mini jach wa x-elkʼot ja jastik junuk jastalni wa smajlaye. Ja Shiu Ping, jun ixuk ti sbʼaj bʼa Hong Kong, wa xyala: «Yuja jachni kiluneji, wani xbʼobʼ kal ke ja matik wa skʼulane jastik leki mini tolabida wa x-ajyiyujile jastik bʼa lek. Ja keʼn jkʼulan ja janekʼ bʼobʼkuj bʼa stalnajel ja jpamilya sok skʼulajel ja bʼa leki, pe ja jnupaneli jom ele jaxa jtatami sjipawonkan soka yal jkeremi».

Jitsan yaʼunej sbʼaje kuenta ke ja relijyon mini jaʼuk mero wa xya tojbʼukyi ja sakʼanil ja kristyano. Ja Etsuko, jun ixuk ti sbʼaj bʼa Japón, wa xyala: «Ti ajyiyon bʼa jun relijyon sok keʼn tojwaniyon ja bʼa yaʼtele ja keremtik akʼixuk. Ya och jtristeʼil yajni kila ke ja kristyanoʼik bʼa jrelijyoni mi skʼulane ja bʼa jas toji, wa xtiroʼaniye yuja cholaliki sok mi xyawe makunuk toj ja stakʼin ja iglesya».

Jujuntik kristyano bʼa skʼuʼuneje lek sbʼaja srelijyone jelni xtajkiye yajni wa xyilawe ke mi jas xmakuni ja jastik lek skʼulaneʼi. Jachni yabʼ sbʼaj ja Van, jun ixuk bʼa Vietnam. Ja yeʼn yala: «Kada kʼakʼu wani xkaʼ och tekʼul, nichim sok waʼelal ja bʼa yaltar ja matik ekʼpaxtakuji soka smajlajel bʼa oj ajuk koʼuk jlekilal ja bʼa tyempo jakumi. ¡Jitsan jabʼil jkʼulan jastik lek sok skʼuʼajelik bʼa relijyon...! Sok tsaʼan ja jtatami jelni maloʼaxi juntiro. Sok tsaʼan ja kakʼixi, bʼa ti wan skʼulajel estudiar bʼa pilan país, cham ja yajni kechanto 20 jabʼil yiʼoj».

Ja yuj, ta mini ja kʼotel jun lekil kristyano oj yakitik jun lekil sakʼanil ja bʼa tyempo jakumi, anto, ¿jasunkiluk? Bʼa snajel, wani xmakunikujtik jun tojelal bʼa wa xbʼobʼ jipjkʼujoltik, jun jasunuk bʼa oj sjakʼ ja sjobʼjelik kiʼojtiki sok oj yalkabʼtik jastal wa xbʼobʼ ajyukujtik jun lekil sakʼanil ja bʼa tyempo jakum. ¿Bʼa wa xbʼobʼ jtatik ja tojelal jaw?