¿Maʼ tey bʼa skʼabʼ ja jas oj ekabʼaji?
Jitsan kristyano wa skʼuʼane ke ja jas oj ekʼ sbʼajeʼi tini ay bʼa skʼabʼ jastik mi x-ilxi. Ja yuj wani skʼulane jastik bʼa wa skʼuʼane ke ojni ajuk tojbʼuk ja sakʼanile.
JA JAS WA SKʼUʼANE JITSAN
JA SKʼINTAJEL JA KʼANAL. Jitsan kristyano wa spensarane ke ja jas oj ekʼ sbʼajeʼi jani ti chʼikan soka jastal ajyi cholan ja kʼanalik ja yajni pojkiyeʼi. Ja yuj wa skʼumane ja horóscopo bʼa oj snaʼe jas oj ekʼ sbʼaje, sok wa sleʼa jas oj skʼuluke bʼa mi oj ekʼ sbʼaje wokolik ma bʼa oj wajyujile lek.
JA FENG SHUI. Jaxa tuki wa spensarane ke bʼa oj wajyujile lek ja bʼa sakʼanileʼi, jelbʼi tʼilan ke oj ajyukyujile ja jastik mi x-ilxi ja bʼa sjoyanaleʼi. Jun winik ti sbʼaj bʼa Hong Kong, sbʼiʼil Lo Wing, * wa xyala: «Jun maestro bʼa feng shui yalakabʼ, ta kaʼa jun kristal chaʼanyabʼal bʼa jun lugar ja bʼa jtienda, ojni ajyukuj mas takʼin».
JA STOYJEL JA MAʼ EKʼPAXTAKUJTIKI. Jaxa tuki wa skʼuʼane ke tʼilan a-stoye ja matik ekʼpaxtayujile ma ja jitsan dyosiki bʼa jachuk oj talnajukeyuj sok oj ajuk koʼuk slekilale. Ja Van, jun ixuk ti sbʼaj bʼa Vietnam, wa xyala: «Wa xkʼuʼan ajyi, ta kayi stoyjel ja matik ekʼpaxtakuji, ja jsakʼanili ojni tojbʼuk ja wego sok ojni ajyuk jun lekil jsakʼanil soka kuntikil ja bʼa tyempo jakumi».
PAXEL PILAN JASUNUK. Jitsan wa skʼuʼane ke yajni wala chamtik wala pojkitik yajkʼachil ekʼele sok ja it kechani wa xyiʼaj buelta. Wa spensarane ke ja jastik lek ma mi lekuk wane yiljel ja wego jani yuja jastik skʼulane bʼajtani.
Ama jitsan wa spensarane ke ja jastik it kechanta kʼotel skʼuʼajelik, mini tukuk xyabʼye skʼulajel probar ja horóscopo, ja tabla ouija®, ja kartaʼik bʼa tarot, ja wa xkʼumaji ja skʼabʼe..., wa xyalawe ke bʼobʼta ja jastik junuk it oj koltajukeyuj bʼa oj snaʼe ja jas ojto ekʼ sbʼajeʼi.
JA SLEKILALIK
¿Ay maʼ yiʼoje jun tsamal sakʼanil sok jun lekil smajlajel ja matik wa skʼuʼane ja jastik it?
La kiltik ja jas ekʼ sbʼaj ja Hào, bʼa ti sbʼaj bʼa Vietnam. Ja yeʼn yaʼakan ke atojukyi ja sakʼanil yuja skʼintajel ja kʼanal, ja feng shui sok ja stoyjel ja maʼ ekʼpaxtakujtiki. Pe ¿lek maʼ wajyuj? Ja Hào wa xyala: «Jom ja jnegosyo, bʼutʼyon jelal, ajyikuj wokolik ja bʼa jpamilya sok kabʼ jelni xchʼakawonkani».
Ja Qiuming, bʼa Taiwán, wani skʼuʼan sbʼaja skʼintajel ja kʼanalik, ja paxel pilan jasunuk, ja destino, ja feng shui sok ja stoyjel ja maʼ ekʼpaxtakujtiki. Pe yajni spaklay lek ja jastik it, yala: «Kaʼa jbʼaj kuenta ke ja skʼuʼajelik it sok ja kostumbreʼik it mini slaja sbʼaj sok wa xjomwani. Ja skʼintajel ja kʼanali tikʼanxta mi stojoluk wa x-elkʼote. Sok sbʼaja paxel pilan jasunuk..., pes ta mi xjula kʼujol ja jas akʼulan ja bʼa wa bʼajtan sakʼanili, ¿jastal oj bʼobʼ tojbʼan sok mas lekxa oj ajyan ja bʼa juni?».
«Kaʼa jbʼaj kuenta ke ja skʼuʼajelik it sok ja kostumbreʼik it mini slaja sbʼaje sok wa xjomwani» (QIUMING, TAIWÁN)
Ja Hào, ja Qiuming sok tuk kristyanoʼik yaʼunej sbʼaje kuenta ke ja destino, ja kʼanalik, ja matik ekʼpaxtakujtik ma ja paxel pilan jasunuk mini yeʼn wa xyilawe ja jas oj ekʼ jbʼajtik tsaʼan. Pe ¿wan maʼ stojolan ja jaw ke mi teyuk bʼa jkʼabʼtik?
Jitsan wa skʼuʼane ke bʼa oj ajyuk jun lekil sakʼanile, tʼilani oj ajyuk chaʼan yestudioʼe ma oj ajyuk jitsan stakʼine. Pe ¿jastal wa xyabʼye ja matik jach skʼuluneje?
^ par. 5 Ja bʼa rebista it jujuntik bʼiʼilal tukbʼesnubʼal.
^ par. 16 Ja yaljelik it ti wa xtaʼatik bʼa Biblia, bʼa Gálatas 6:7. Cha jachni wa xchiktes jun proverbio oriental bʼa wa xyala: «Tsʼunu melon sok ojni atul melon; tsʼunu haba sok ojni atul haba».
Bʼobʼta cha ojni akʼul gusto
JA JUʼUN CHOLUMANI
¿Wan maʼ xbʼobʼ ya jnatik ja kʼintanel ja jas oj ekʼuki?
¿Wan maʼ xbʼobʼ skoltayotik ja tuktukil tikʼe kʼintanel?
JA JUʼUN CHOLUMANI
Ja sjakʼjel wa xyaʼa ja Biblia
¿Meran maʼ ayto jas wa xkan sakʼan ja wala chamtiki? ¿Bʼa wa xtaxye ja chamwiniki?
