Ayxa junuk 3.500 jabʼil, ja Jyoba Dyos yalayabʼ ja jas tʼilan oj skʼuluke ja matik wa x-aʼteltajiyuji bʼa jachuk oj ajyukyujile jun lekil sakʼanile ja bʼa tyempo jakum: «Ti wa xkaʼakan bʼa weʼn oja tsaʼex ja sakʼanil sok ja chamelali, ja lekilal sok ja jas mi lek oj ekabʼajexi, sok tʼilani oja tsaʼex ja sakʼanil bʼa oj ajyanik sakʼan, ja weʼnlex sok jawa wintilex» (Deuteronomio 30:19).

Ta wa skʼana oj yabʼye stsamalil jun lekil sakʼanil, ja kristyanoʼik jaw tʼilani oj stsaʼe ja bʼa stojolili. Jaxa keʼntiki cha tʼilani oj jtsatik. Ja Biblia wa xyala jastal wa xbʼobʼ jtsatik lek: «Syajtajel ja Jyoba wa Dyosex, smaklajel ja skʼumal» (Deuteronomio 30:20).

NEBʼA JA JAS WA XYALA JA BIBLIA. Bʼa syajtajel ja Jyoba, ja jas tʼilan oja kʼuluk bʼajtani jani snajel ja jas wa xyala ja Biblia bʼa yeʼna. Yajni xa kʼulan, oja wil ke jelni xyajtani sok wani skʼana ja jas mas lek bʼa weʼna. Cha wa skʼana oja wayi orasyon, yujni wa xcham skʼujol bʼa weʼna (1 Pedro 5:7). Ta waxa kʼujolan snajel sbʼaj, ja Biblia wa skʼapa ke ojni mojxuka mok (Santiago 4:8).

AMAKUNUK JA JAS WAXA NEBʼA. Bʼa smaklajel ja Dyos tʼilani oja wiyi ja stojelali, bʼa ti oja taʼ bʼa Biblia. Yajni xa kʼulan, ojni awil ja jas wa xyala ja Josué 1:8: «Lek oj wajukawuj ja bʼa wa bʼeji sok oja jeʼ biboʼil ja bʼa jas oja kʼuluki».