Ja Biblia tukni lek yuja tuk juʼunik bʼa relijyon. Kechani ja libro it jel skoltunej ja skʼuʼajel jitsan miyon ixuk winik bʼa jitsan mil jabʼil. Pe cha mini ay pilan libro jastal ja Biblia bʼa chokʼ lek paklubʼal sok cha jel kʼenubʼal.

Jun sjejel, jujuntik paklanum jel chapane wani skʼulane dudar ta ja Bibliaʼik bʼa jtyempotiki jachni mero ja jastal tsʼijbʼaxi ja bʼa najate. «Mini xkʼuʼantikon lek ta lajxelkujtikon yajel ekan mero stojolil ja jastal mero tsʼijbʼunubʼalkan ja bʼa najate», jach yala jun maestro bʼa wa spaklay ja relijyon. Sok cha yala: «Kechan kiʼojtikon kopyaʼik bʼa jelxa tukbʼesnubʼal; sok jitsan kopyaʼik kʼulaxi sigloʼik tsaʼan sok, lajansok, mini slaja sbʼaj bʼa jitsan modoʼik».

Tuk wa skʼulane dudar sbʼaja stojolil ja Biblia yuja jas jeʼubʼalyile yuja srelijyone. Jun sjejel, ja Faizal ti kʼi bʼa jun pamilya mi kʼuʼumanuk Dyos. Ja yeʼn jejiyi ja Biblia juni libro jel chaʼanyabʼal, pe ja teksto tukbʼesnubʼalxabʼi. Ja Faizal wa xyala: «Ja jas ekʼi jani mixa xjipa jkʼujol yajni ja ixuk winik wa skʼanawe oj yal-e kabʼ sbʼaja Biblia. Pes yujni mixa ja yiʼojuke ja mero Biblia bʼa najate; tukbʼesnubʼalxa».

Ta tukbʼesnubʼalxa ja Biblia, ¿ay maʼ lek stʼilanil? Pensaran sbʼaja it: ja Biblia ayiʼojan tsamalik skʼapjel ja bʼa tyempo jakumto. Ta waxa kʼulan dudar bʼa mey yiʼojan ja skʼapjelik jaw ja bʼa mero teksto bʼa najate, ¿oj maʼ jipa kʼujol? (Romanos 15:4). Sok ta ja Bibliaʼik bʼa jtyempotiki kʼotel kopyaʼik bʼa tukbʼesnubʼalxa, ¿oj maʼ wa makunuk ja rasonik yiʼojani bʼa stsajel jawa waʼteli, ja yaʼteltajel ja Dyos ma ja jas skʼulajel soka wa pamilya?

Anima mixa ayuk ja mero libroʼik bʼa Biblia tsʼijbʼaxi bʼa najate, pe ojni bʼobʼ jpaklaytik ja bʼa jitsan mil kopyaʼik bʼa najate. ¿Jastal talnaji ja kopyaʼik jaw yuja sjomelal sbʼaja spowili, ja ilubʼal kontra soka jastal leʼubʼal modo bʼa sjomjel ja rason yiʼoji? ¿Jas yuj snajel ja it ojni bʼobʼa jipa kʼujol ja weʼn ja bʼa Bibliaʼik bʼa jtyempotiki? Paklay ja sjakʼjelik oj axuk ja bʼa artikuloʼik jakum bʼa jastal talnaji ja Biblia.