JUNE ja bʼa oxtike swinkil ja luʼumkʼinali, ma mas ja chabʼ mil miyon ixuk winike, wa xyalawe nochumane bʼa Kristo. ¿Kʼotela maʼ june bʼa yeʼnle? Ja bʼa jtyempotiki ay jitsan mil relijyonik wa sbʼiʼilane snochumane Kristo, pe mini junukxta ja skʼuʼajel wa sjeʼawe sok tuktukil ja jastal wa spensarane. Bʼobʼta ja jas waxa kʼuʼan ja weʼn tukni lek yuja jas wa skʼuʼane ja tuk bʼa wa xyalawe cha snochumane Kristo. Pe ¿ay maʼ lek stʼilanil ja jas waxa kʼuʼani? Ayniʼa, ta ja weʼn wani xa kʼana oj kʼotan jun meran snochuman bʼa Kristo jastal wa xyala ja Biblia.

Ja bʼajtan snebʼumanik ja Jesukristo sbʼiʼilane snochumanik Kristo (Hechos 11:26). Yuja kechani ay jun meran skʼuʼajel ajyi, mini xmakuni pilan bʼiʼilal bʼa oj najuk sbʼaje. Ja nochumanik bʼa Kristo lajani lek snochowe ja sjejelik sok ja smandarik ja maʼ ya kujlajuki, ja Kristo Jesús. Jaxa bʼa relijyon bʼaya, ¿ja maʼ wa sjeʼawe ja jasa sjeʼa ja Kristo sok ja jas skʼuʼane ja bʼajtan snebʼumaniki? ¿Jasa oj bʼobʼa kʼuluk bʼa oja naʼ ja weʼn? Kechanta ay jun modo bʼa snajel, sok jani yajel slaj ja jas wa sjeʼa jawa relijyon soka jas wa xyala ja Biblia.

 Pensaran ja it: ja Jesukristo jelni kʼot skis ja Biblia yujni yila jastal Yabʼal Dyos. Ja yeʼn mini tʼun lek yila ja maʼ mi yila stʼilanil ja jas wa sjeʼa ja Biblia sok ja mas yilawe stʼilanil ja skostumbre ja ixuk winiki (Marcos 7:9-13). Ja yuj wani xkalatik ja meran snochumanik ja Kristo tini yawe eluk bʼa Biblia ja jas skʼuʼaneʼi. Ja yuj spetsanil ja snochuman ja Kristo tʼilani oj sjobʼ sbʼaje: «¿Wan maʼ slaja sbʼaj ja jas wa sjeʼa ja jrelijyoni soka jastal wa sjeʼa ja Biblia?». Bʼa yajel sjakʼjel ja sjobʼjel it, ¿jas yuj mi xwa slaj ja skʼuʼajelik yiʼoj ja wa relijyoni soka ja jas wa xyala ja Biblia?

Ja Jesús yala ja toyjelal oj katikyi ja Dyosi tʼilani ti oj eluk bʼa smeranil, ja smeranil wa xtax bʼa Biblia (Juan 4:24; 17:17). Jaxa jekabʼanum Pablo yala bʼa oj taʼ ja jkoltajeltiki tʼilani «sna[jel] sbʼaj ja smeranili» (1 Timoteo 2:4, Ja yajkʼachil sju‘unil ja dyosi [YD]). Ja yuj jelni tʼilan ti oj katik eluk ja jas wa xkʼuʼantik ja bʼa mero smeranil wa xtax bʼa Biblia. ¿Jas yuj? Yujni xiwela sbʼaj ay ja jsakʼaniltiki.

Wa xlokowatikon bʼa oja kʼumuk ja wake sjobʼjelik bʼa rekwagro sok ja sjakʼjel wa xyaʼa ja Biblia. Kʼuman ja tekstoʼik ti jakeli sok pensaraʼan ja sjakʼjelik wa xyaʼa. Sok tixa jobʼo abʼaj: «¿Junxta maʼ ja jas wa sjeʼa ja jrelijyon soka jas wa xyala ja Biblia?».

Ja tʼusan spaklajel it ojni skoltaya bʼa slajelal ja jas jel xmakuni ja bʼa wa sakʼanili. ¿Wan maʼ xa kʼana oj wa slaj tuk sjejelik ja bʼa wa relijyon soka jas wa xyala ja Biblia? Ja taʼumantiʼik bʼa Jyoba ojni bʼobʼ skoltaya bʼa spaklajel ja smeranil sbʼaja Biblia. ¿Jas yuj mixa kʼanayile jun estudio bʼa Biblia jachʼ kʼebʼubʼal? Ma ochan ja bʼa sitio bʼa Internet, jw.org.