Pe ja smaloʼili, yajni wanon solteraʼaxeli chebʼi ja jastal wa xkila jbʼaj soka Jyoba. Wa xkila ja jmojik eskuela ayiʼoje libreʼil mey stikʼanil sok ja keʼn cha wani xkʼana oj ajyukuj ja libreʼil jaw. Wa xkabʼ ja smandarik ja jnantat sok ja bʼa Biblia jel tsatsik sok ja yaʼteltajel ja Jyoba junxani ijkats wa xkila. Anima mi bʼa jkʼulan dudar ta sakʼan ay ja Jyoba, wa xkabʼ mixani lek ayukon soka Yeʼn.

Mini kakan elel xcholjel, pe wani la elyon jujuntik ekʼele bʼa oj yil-e mini kaʼunejkani. Yajni wala elyon xcholjel mini xchapa jbʼaj, ja yuj jelni wokol xkabʼ yajel kʼeʼuk jun loʼil ma snochjelyi. Yuja jaw, mini x-ajyikuj rebisitaʼik ma estudioʼik bʼa Biblia sok mini xkabʼ stsamalil ja xcholjeli, ja yuj masto sjomo el ja jastal wa xkila ja xcholjeli. Wa xjobʼo jbʼaj: «¿Jastal wa xbʼobʼ skʼul june ja it kada semana sok kada ixaw?».

Yajni ayxa kiʼoj 17 jabʼil, wanxani xkʼana oj ajyukon jtuchʼil. Ja yuj jchapa ja jmaleta sok wajyon man Australia. Ja jnantati jel chamkʼujol kanye, pe wani sjipa skʼujole  bʼa ojni jkʼujoluk bʼa lek oj ajyukon soka Dyosi.

Ja bʼa Australia, jomni el ja jastal ayon soka Dyosi. Jelni jchʼaya ja reunioniki sok wani xmojtay tuk keremtik akʼixuk bʼa jachuke jastal keʼna bʼa wa xwajye jun och akwal ja reunioni sok jaxa pilani wa xwaj yuʼe sok wa xwaj chanuke. Ja wego wa xkaʼa jbʼaj kuenta chabʼ lado ayon ja bʼa smeranili sok ja bʼa luʼumkʼinali, pe wani xkabʼ mini bʼa june gustoʼayon.

Junuk chabʼ jabʼil tsaʼan, jnaʼa sbʼaj jun hermana bʼa mini yaʼa sbʼaj kuenta, skoltayon bʼa oj ya jpensaraʼuk ja bʼa jas wanon skʼulajel soka jsakʼanili. Ja keʼn tini ayon bʼa jun naʼits bʼa ay jowane hermanaʼik bʼa akʼixeto sok jlokotikon akanuke jmoktikon jun semana ja biajante soka xcheʼum Tamara. Yajni ja hermano wan yiljel jastik junuk bʼa kongregasyon, ja Tamara tini wa x-ajyi jmoktikon sok jelni gusto wa xkatikon ekʼuk. Jelni skoltayon ja jaw. Mi wa xmajlay june maʼ jel lek xyila sbʼaj sok ja Dyos gustoxta wa x-ajyi, mi jel chaʼan xyaʼa sbʼaj sok jel jaman ja skʼujoli.

Ja Tamara jel syajtay ja smeranili sok ja xcholjeli, bʼa wani xya ekʼyi ja gustoʼil jaw ja tuki. Jelni gusto ay yuja wa xyayi ja mas lek ja Jyoba, yajni ja keʼn mini tʼun gustoʼayon soka janekʼ ita wanon yajelyi. Ja jastal wa xyila ja sakʼanili sok yuja jel gusto x-ajyi jel skoltayon. Ja sjejeli ya jul jkʼujol jun jasunuk bʼa jel meran: ja Jyoba wa skʼana jpetsaniltik oj kaʼteltaytik «sok gustoʼil» sok «awanelik bʼa gustoʼil» (Sal. 100:2).

Wa xkʼana oj ajyukuj ja gustoʼil yiʼoj ja Tamara, pe bʼa oj bʼobʼkuj tʼilani oj tukbʼes jastik junuk jel tʼilan. Yiʼajni tyempo, pe kʼexa jkʼuluk jujuntik jasunuk. Wanxa xchapa jbʼaj ja bʼa xcholjeli sok wala ochyon precursora auxiliar jujuntik ekʼele. Ja it skoltayon bʼa mixa jel oj xiwkon sok bʼa mas seguraxa oj ajyukon. Yuja  masxa wa xkaʼ makunuk ja Biblia, masxani gustoʼayon. Tixta jpensaraʼan oj ochkon precursora kada ixaw.

Kʼe jleʼ kamigoʼik bʼa tuktukil ja sjabʼile bʼa lek wa xyila sbʼaje sok ja Dyos sok bʼa gusto wane yaʼteltajel ja Yeʼn. Ja lekil sjejele skoltayon bʼa oj kil ja jas mas tʼilani sok bʼa oj kʼajyukon skʼulajel estudiar. Masxani wa xkabʼ stsamalil ja xcholjeli sok tsaʼan ochyon precursora regular. Sbʼajtanil ekʼele ja bʼa jitsanxa jabʼil ekʼeli wa xkabʼ gustoʼayon sok ja bʼa kongregasyoni.

Jun jabʼil tsaʼan, jnaʼa sbʼaj ja Alex, jun hermano jel lek sok jel xkiswani bʼa jelni syajtay ja Jyoba sok ja xcholjeli. Ja yeʼn skoltuman ansyano sok ayxa wake jabʼil wan aʼtel jastal precursor. Cha tini wan xcholjel jujuntik ixaw bʼajtan bʼa Malaui, bʼa wa xkʼanxi mas cholumanik. Ja tiw ya ekʼ tyempo sok jujuntik misioneroʼik bʼa ajikanyi jun lekil sjejel sok tsatsankʼujolaji bʼa oj ya bʼajtan bʼej ja sGobyerno ja Dyosi.

Ja bʼa 2003, ja Alex sok ja keʼn nupanitikon sok lajani jnochotikon ja aʼtel bʼa tyempo tsʼikan. Jel jnebʼunejtikon sjejelik bʼa jel chaʼanyabʼal sok ja Jyoba yaʼunej koʼ jlekilaltikon bʼa tuktukil modo.

Ja bʼa 2009, lokjitikon jastal misioneroʼik bʼa Timor Oriental, jun chʼin país ti mojan bʼa Indonesia. Mini xbʼobʼ jkʼuʼuktikon, jel gustoʼaytikon, pe cha wani xyakitikon xiwel. Joʼe ixaw tsaʼan, kʼotikon ja bʼa Dili ja kapitali.

Tʼilan kʼajyitikon soka jastik ajkʼach: ja kostumbreʼik, ja kʼumali, ja waʼelal sok ja tikʼe sakʼanili. Yajni wala wajtikon ja bʼa xcholjeli, tikʼanxta wa xtaʼatikon kristyanoʼik bʼa jel pobreʼe, bʼa mi ocheluke eskuela sok jel tʼenubʼale. Cha jnaʼatikon sbʼa jitsan bʼa ayiʼoje senyaʼik  bʼa yajbʼel sok bʼa jastal ay xyabʼye yuj smul ja guerra sok ja tiroʼaneli. *

¡Jelni lek wajum ja xcholjeli! Jun sjejel, jun kʼakʼu jtaʼa jun yal akʼix sbʼiʼil María bʼa 13 ja sjabʼil, bʼa jelni triste ay. * Ayto jujuntik jabʼil chamel ja snani sok mixani jel xyila ja stati. Jastalni jitsan yal untik ja bʼa sjabʼili, ja María mixani snaʼa jas oj skʼul sok ja sakʼanil. Wa xjul jkʼujol bʼa jun ekʼele wan okʼel xcholo kabʼ ja jastal ay xyabʼi. Pe mini kabʼ stojol ja jas yalakabʼi, yujni mito xnaʼa lek ja kʼumali. Ja yuj jkʼulan jun orasyon sok jkʼanayi ja Jyoba a-skoltayon bʼa stsatsankʼujolajel. Anto kʼe jkʼumukyi jujuntik teksto bʼa Biblia bʼa yajel kulan skʼujol. Jabʼilik tsaʼan, kila jastal ja smeranili ya tukbʼuk ja smodo, ja splanta sok ja sakʼanil ja María. Yiʼaj jaʼ sok ja yani yeʼnxa wa skʼulan ja yestudioʼik bʼa Biblia. Ayni yiʼoj jun niwan pamilya bʼa wa xyaʼteltaye ja Dyos sok wa xyabʼ jelni xkʼanji.

Mini ay duda bʼa wani yajel koʼ slekilal ja Jyoba ja xcholjel bʼa Timor Oriental. Anima tʼusan mi spetsaniluk ja cholumaniki yiʼojexa jaʼ ja bʼa tsaʼanikxta 10 jabʼil ekʼeli, jitsan bʼa yeʼnle precursore, skoltuman ansyanoʼe ma ansyanoʼe. Jaxa tuki ti wane koltanel bʼa Naʼits bʼa wa sutxi juʼunik sok wa xkoltaniye sutjel ja juʼunik bʼa skʼumale ja bʼa slugareʼi. Jel xya gustoʼaxukon yabʼjel ja wa stsʼebʼaniye ja bʼa reunioni, yiljel ja stseneleʼi sok yiljel ja jastal wane kʼiʼel ja bʼa yaʼteltajel ja Dyosi.

Ja sakʼanil bʼa Timor Oriental tukni lek sok ja bʼa Australia. Pe mini ay jun pilan lugar bʼa jel gusto ajyelon. Ay ekʼele wala wajtikon bʼa jun chʼin autobús bʼa bʼutʼel kristyano bʼa wa xjak sman-e bʼakbʼel chay sok itajik ja bʼa merkado bʼa lugari. Ay jujuntik kʼakʼu wa xkaʼatikon estudio bʼa Biblia bʼa chʼin naʼitsik bʼa jel juntiro ja Kʼaʼuj sok mey spisoʼil bʼa ti wanxta ajnel ekʼ ja gayinaʼik ja bʼa sjoyanali. Anima yuja wokolik it, jitsan ekʼele jpensaran: «¡Mini xkʼuʼan ja teyon ili!».

Yajni wa xpensaran ja bʼa jas ekʼeli, jelni xkaʼa tsʼakatal yuja skʼujolane ja jtati bʼa sjeʼaweki sbʼaja Jyoba sok skoltayone man ja bʼa kakʼixil jel wokoli. Ja yaljelik bʼa Proverbios 22:6 kʼotel smeranil ja bʼa jas ekʼel jbʼaji. Ja jnantati jelni gusto aye bʼa Alex sok bʼa keʼn. Jel gustoʼaye yuja wa xyilawe jastal wa xya makunukotikon ja Jyoba. Man 2016, wantikon koltanel jastal biajante ja bʼa territorio wa skʼela ja Naʼits Betel bʼa Australasia.

Lajansok mini meranuk ja kʼot kil ja xcholjeli jastal jun ijkats, yujni ¡ja wego jelxa xkʼulan gusto ja xcholjeli! Kʼotel jnaʼ ja meran gustoʼili jani ti chʼikan ja yaʼteltajel ja Jyoba sok spetsanil akʼujol, chikan jas wokolik kiʼojtik ja bʼa jsakʼaniltiki. Ja bʼa tsaʼanikxta 18 jabʼil ekʼeli bʼa kaʼteltaytikon ja Jyoba lajan soka Alex jani ja jabʼilik mas gusto ajyelon ja bʼa jsakʼanili. Ja wego wa xkila ayni yiʼoj rason ja David yajni yala yabʼ ja Jyoba: «Spetsanil ja maʼ wa sleʼa skoltajel bʼa weʼna ojni ajyuke gusto; tolabida oj awanuke yuja gustoʼili [...], sok ja maʼ wa syajtay jawa bʼiʼili oj gustoʼaxuke tsʼakatal yuj weʼna» (Sal. 5:11).