1. ¿Jasa wa xya gustoʼaxukotiki?

 JA Jyoba wa skʼana ke gusto oj ajyukotik. Wa xnaʼatik ke jach kʼotel ja it, yujni ja gustoʼili kʼotelni parte ja bʼa satinel ja yip ja Dyosi (Gál. 5:22). Sok yuja masni wa xyaʼa gusto ja yajel ke ja oj ajukitik jelni gusto wa xya ajyukotik yajni latsan wala ajyitik ja bʼa yaʼteltajel ja Dyosi sok wa xkoltaytik ja kermanotik (Hech. 20:35)

2, 3. a) Yajel tʼabʼan jkʼujoltik ja jas wa xyala ja Gálatas 6:4, ¿jasa wa skoltayotik bʼa mi oj chʼaykujtik ja gustoʼili? b) ¿Jasa oj kiltik ja bʼa artikulo it?

² ¿Jasa oj skoltayotik bʼa mi oj chʼaykujtik ja gustoʼili? Ja jekabʼanum Pablo staʼ tiʼal chabʼ jasunuk bʼa oj skoltayotik skʼulajel. Tini wa xtaʼatik bʼa Gálatas 6:4 (kʼuman). Bʼajtan, ojni ajyukujtik rasonik bʼa gusto oj ajyukotik yuja jas wa xkʼulantik ja bʼa kaʼteltik bʼa Jyoba ta wa xkatikyi ja jas mas lek bʼa keʼntiki. Soka jaw juni jasunuk tʼilan oj jkʼuluktik kibʼanaltik (Mat. 22:36-38). Xchabʼil, mokni jlajbʼajtik soka tuki. Ta ja jastal wala taxtiki, ja chapjelal kiʼojtiki ma ja jastik wa xlajxikujtiki wa xyaʼakan bʼa oj jkʼuluktik jun jasunuk lek, la katikyi tsʼakatal ja Jyoba, pes ja smeranili spetsanil ja jas kiʼojtiki naka yeʼnani yaʼunejkitik. Pe ta ay tuk kermanotik bʼa mas jel snaʼawe ja bʼa xcholjel ke yuja keʼntiki, la gustoʼaxukotik yuja wane yajel makunuk ja jas wa snaʼawe bʼa stoyjel ja Jyoba, sok mi bʼa oj stoy sbʼaje ma bʼa oj yawe el slekilal. Jaʼuktoma oj jlajbʼajtik soka yeʼnleʼi tʼilani oj jnebʼtik bʼa yeʼnle.

³ Ja bʼa artikulo it, oj kiltik jasa oj skoltayotik bʼa mi oj el jganatik ta wa xkilatik lajansok mi xlajxikujtik ja bʼa yaʼteltajel ja Dyos jastalni wa xkʼanatik. Cha oj jnebʼtik jastal oj katik makunuk lek chikan jasunuk wa xnaʼatik sok ja jas wa xbʼobʼ jnebʼtik sbʼaja tuki.

4. ¿Jasa oj bʼobʼ ya el jganatiki? Taʼa tiʼal ja sjejel bʼa Carol.

⁴ Jujuntik hermanoʼik elel sgana xyabʼye yujni mixa xbʼobʼ skʼuluke mas ja janekʼ wa skʼanawe ja bʼa yaʼteltajel ja Jyoba yuja ayxa sjabʼile ma yuja malo aye. Jani jaw ja jas ekʼ sbʼaj jun hermana sbʼiʼil Carol, bʼa jun tyempo ti koltani bʼa wa xkʼanxi mas cholumanik. Kʼot ajyukyuj 35 estudioʼik bʼa Biblia sok skoltay jitsan kristyanoʼik bʼa yajelyi ja sakʼanile ja Jyoba sok yijel jaʼ. ¡Jelni tsamal! Pe maloʼaxi sok mixani xbʼobʼ eluk ja bʼa snaji. Ja yeʼn yala: «Yuja malo ayoni mini xbʼobʼ jkʼuluk jastal ja tuki. Ama jachuk, ja keʼn wa xkabʼ mi jel toj ayukon jastal yeʼnle. Wa xkʼulan luchar soka jas wa xkʼana oj kʼuluki soka jas wa xbʼobʼ jkʼuluki. Soka jaw jelni xyaʼ el jgana». Ja Carol wa skʼana oj skʼuluk spetsanil ja janekʼ wa xbʼobʼyuj bʼa Jyoba, soka jaw jelni chaʼan yabʼal. Wani xbʼobʼ jkʼuʼuktik lek ke ja Dyos bʼa jel syajulal skʼujol, jelni chaʼan yabʼal xyila yuja jel puesto ayi.

5. a) ¿Jasa tʼilan oj juljkʼujoltik ta wa xkabʼtik elel jganatik yuja mixa xbʼobʼ jkʼuluktik spetsanil ja jas wa xkʼanatiki? b) Jastalni wa x-ilxi ja bʼa potoʼik bʼa artikulo it, ¿jastal tolabida yaʼunejyi ja Jyoba ja hermano it ja jas mas lek bʼa yeʼna?

⁵ Ta ay ekʼele wa xkabʼ elel jganatik yuja mi xbʼobʼ jkʼuluktik spetsanil ja jas wa xkʼanatiki, la jobʼ jbʼajtik: «¿Jasa wa smajlay bʼa keʼn ja Jyoba?». Wani smajlay oj katikyi ja mas lek bʼa keʼntik, wa xkʼan alxuk, skʼulajel spetsanil ja janekʼ wa xlajxikujtiki. Pensaraʼan ja sjejel it. Jun hermana bʼa ayiʼoj 80 jabʼil elelni sgana yujni mixa jel xbʼobʼ skʼuluk ja bʼa xcholjel ja jastalni wa skʼulan ja yajni ayto yiʼoj 40 jabʼil. Wa spensaraʼan ke anima wan yajelyi ja Jyoba ja mas lek bʼa yeʼna, ja yeʼn mini gusto ayuk. Pe ¿meran maʼ ja jaw? La kiltik, ta ja hermana it yayi ja Jyoba ja mas lek bʼa yeʼna ja yajni ayiʼoj 40 jabʼil sok yuja wanto skʼulajel ja wego ayxa yiʼoj 80 jabʼil, ja smeranili mini yaʼunejkan yajelyi ja mas lek bʼa yeʼna. Ta kʼe jpensaraʼuktik ke mi malanukta ja janekʼ wa xkʼulantik bʼa yajel gustoʼaxuk ja Jyoba la kaʼ juljkʼujoltik ke mi keʼn wa stsaʼatik ja jas lek sok ja jas mi lek xyila. Ta wa xkatikyi ja mas lek bʼa keʼntiki ja yeʼn oj yalkabʼtik: «Jel lek akʼulan» (cha kʼela ja Mateo 25:20-23).

6. ¿Jasa wa sjeʼakitik ja sjejel bʼa María?

⁶ Jun jasunuk oj skoltayotik bʼa oj ajyukujtik ja gustoʼil jani oj waj jkʼujoltik ja jas wa xbʼobʼ jkʼuluktiki sok miyuk ja jas mi xbʼobʼ jkʼuluktiki. La kiltik ja jas wan ekʼel sbʼaj ja María jun hermana bʼa mi xbʼobʼ skʼuluk lek ja bʼa xcholjeli yuja maloʼayi. Ja bʼajtanto jel triste xyabʼi sok wa spensaraʼan ke mixani tʼun xmakuni. Pe anto yaʼa sbʼaj kuenta ke ja bʼa kongregasyon ayni jun hermana ti bʼaʼan ekʼ bʼa xchʼat. Ja yuj sleʼa modo skoltajel. Ja María wa xyala: «Jchapa oj wajkon bʼa snaj sok xcholjelsok jach bʼa telepono sok bʼa karta. Tolabida gustoxta wala kumxiyon ja bʼa naʼitsi yuja bʼobʼ jkoltay ja kermanaʼi». Ja keʼntiki cha mastoni gusto oj ajyukotik ta jaʼ wa xwaj jkʼujoltik ja jas wa xbʼobʼ jkʼuluktiki sok mi jaʼuk ja jas mi xbʼobʼ jkʼuluktiki. Pe ¿jaxa lekbʼi keʼntik ja maʼ wa xbʼobʼ skʼuluk mas ja bʼa xcholjeli maʼ jel lek xlajxikujtik jun jasunuk ja bʼa xcholjeli?

7. ¿Jas lekil rason yayi ja snochumanik Kristo ja jekabʼanum Pedro?

⁷ Ja bʼa bʼajtan karta stsʼijbʼan ja jekabʼanum Pedro stsʼakatal yuja yip ja Dyosi, yayi rason ja yermanoʼik bʼa oj yawe makunuk chikan jas don yiʼoje bʼa  stsatsankʼujolajel ja smojik nochumanik Kristo. Ja yeʼn yala: «Chikan jastal ja don akʼubʼalawilex kada jujune, awik makunuk bʼa oja koltabʼajex jastal lekil mayordomoʼik sbʼaja slekil skʼujol mi xbʼajintik ja Dyosi» (1 Ped. 4:10). Mokni jkom jbʼajtik bʼa yajel makunuk ja jas wa xnaʼatiki yuj xiwel bʼa ay maʼ oj yilkʼujolukotik ma oj el sganaʼe. Ta jkʼulantik mini wanukotik yajelyi ja Jyoba ja jas mas lek bʼa keʼntik.

8. Jastalni wa xyala ja 1 Corintios 4:6, 7, ¿jas yuj jel tʼilan mi oj jtoy jbʼajtik ja bʼa jastik jel xnaʼatiki?

⁸ Ama tʼilani oj katik makunuk ja janekʼ wa xbʼobʼkujtik ja jas wa xnaʼatiki pe la kaʼ jkuidadotik bʼa mi oj jtoy jbʼajtik (kʼuman ja 1 Corintios 4:6, 7). Jun sjejel, bʼobʼta ja weʼn jelni xa naʼa yajel kʼe jun estudio bʼa Biblia. ¡Pe moka wakan skʼulajel! Jelni lek ta ja weʼn waxa kʼana oja wa makunuk ja jas waxa naʼa bʼa skoltajel ja tuk, pe mixani lekuk ta kechan bʼa oja toyabʼaj. Pensaraʼan lekbʼi ja ajkʼachto jel lek wajawuj ja bʼa xcholjel sok bʼobʼ kʼe atul jun estudio bʼa Biblia. Ja yuj wanxani xa kʼana oja cholyabʼ ja jastik ekʼi ja matik teyasok bʼa wa grupo. Pe yajni tixa aya soka grupo wa xkʼota wabʼ ke jun hermana wan xcholjel ke bʼobʼni yakanyi jun rebista jun kristyano. Ja yeʼn yaʼakan jun rebista pe ja weʼn ataʼa juna wa westudio. ¿Jasa oja kʼuluki? Ja weʼn waxa naʼa ojni atsatsankʼujoluk ja grupo yuja jas ekabʼaji, pe bʼobʼta ojni apensaraʼuk mas lek oja wal bʼa pilan ekʼele bʼa jachuk mi oja wa yabʼ jel skoʼelal ja jas skʼulan ja hermana. ¡Juni modo bʼa sjejel lekil kʼujolal! Pe jelni tʼilan mi oja wakan stuljel estudioʼik. Ayni awiʼoj jun don, ja yuj amakunuk.

9. ¿Jastal oj katik makunuk ja snajelil kiʼojtiki?

⁹ La kaʼ juljkʼujoltik ke chikan jas snajelil kiʼojtik jani yaʼunejkitik ja Dyosi. Ja yuj la katik makunuk bʼa stsatsankʼujolajel ja kongregasyon sok mi bʼa oj jtoy jbʼajtik (Filip. 2:3). Yajni wa xkatik makunuk ja kiptik sok ja snajelil kiʼojtik bʼa skʼulajel ja jas wa skʼana ja Dyosi, ayni kiʼojtik rason bʼa oj gustoʼaxukotik. ¿Jas yuj? Yujni wantik yajel makunuk spetsanil ja jas kiʼojtik bʼa stoyjel ja Jyoba sok mi bʼa masto oj ekʼxukotik ja keʼntik yuja tuki ma bʼa oj katik yabʼye mas skoʼelale ja yeʼnleʼi.

10. ¿Jas yuj mi lekuk oj jlajbʼajtik soka tuki?

¹⁰ Ta mi xkaʼa jkuidadotik ojni kokotik ja bʼa trampa bʼa slajel ja jastik wa xlajxikujtik ja keʼntiki soka jas mi xlajxiyujile ja tuki. La kaltik ja sjejel it: aybʼi jun hermano bʼa  jel lek xya ekʼuk ja sloʼilik, jani jaw ja jas jel xlajxiyuji. Pe bʼobʼta ja bʼa skʼujoli ojni spensaraʼuk ke masto ekʼxel yuj jun hermano bʼa wokol wa xyabʼ yajel ekʼuk ja sloʼili. Pe bʼobʼta ja hermano it ayni yiʼoj tuk modoʼalik, bʼobʼta jelni jaman skʼujol, wan yajel kʼiʼuk lek ja yuntikili, ma mini xyaʼakan elel ja bʼa xcholjeli. Jelni wa xkaʼatik tsʼakatal yuja ay jitsan hermanoʼik sok hermanaʼik bʼa wa xyawe makunuk ja jas wa snaʼaweʼi bʼa yaʼteltajel ja Jyoba sok skoltajel ja tuk.

11. ¿Jas yuj tʼilan oj jkʼujoluktik bʼa snochjel ja sjejel bʼa Jesús?

¹¹ Ama mi lekuk slajel jbʼajtik soka tuk, pe jelni jas wa xnebʼatik yajni wa xwaj jkʼujoltik ja bʼa sjejel tuk yaʼtijumik Jyoba. La jpensaraʼuktik bʼa Jesús, ja lekil sjejel kiʼojtiki. Ama mini tojukotik ja keʼntiki pe wani xbʼobʼ jnebʼtik ja bʼa tsamalik smodo sok ja bʼa jastik skʼulani (1 Ped. 2:21). Ta wa xnochotik toj lek ja sjejelik yaʼuneji ojni kʼotkotik lekil yaʼtijumik ja Jyoba sok oj ajyukujtik slekilalik ja bʼa xcholjeli.

12, 13. ¿Jasa wa xnebʼatik bʼa rey David?

¹² Ja Biblia wa staʼa kitik tiʼal bʼa jitsan winike sok ixuke bʼa ama mulanume kʼoteleni lekil sjejel bʼa keʼntik (Heb. 6:12). June bʼa yeʼnle jaʼa rey David, ja Jyoba yala bʼa yeʼna: «Jtaʼunej […] jun winik bʼa wa xya gustoʼaxuk ja jkʼujoli» (Hech. 13:22). Ja David mini tojuk, asta sleʼa chaʼanik smul. Ama jachuk yakitik jun lekil sjejel. ¿Jas yuj? Pes yajni toji, mini sleʼa modo bʼa oj snakʼe. Pe skisani ja tsatsal tojelal ajiyiʼi sok sutxi meran skʼujol yuja jas skʼuluneji. Ja yuj ja Jyoba yaʼa perdon (Sal. 51:3, 4, 10-12).

¹³ Ja sjejel bʼa David wani xbʼobʼ skoltayotik ta wa xkaʼa jbʼajtik sjobʼjelik jastal it: «¿Jastal wa xkabʼ yajni ay maʼ wa xyaki rason? ¿Wan maʼ xnaʼa ke ay jmul ma wa xnakʼa? ¿Ma wego wa xkaʼ smuluk pilan? ¿Wan ma xkʼujolan bʼa mixa oj jkʼuluk?». La kaʼ jbʼajtik sjobʼjelik jastal jaw yajni xpaklaytik ja sakʼanile ja winike sok ixuke bʼa toj wajye wa staʼ tiʼal ja Biblia. ¿Stʼaspune maʼ wokolik jastal keʼntik? ¿Jas lekil modoʼalik sjeʼawe? Bʼa chikan jasunuk, la jobʼ jbʼajtik: «¿Jastal oj bʼobʼ kʼotkon jastal ja yaʼtijum toj it ja Jyoba?».

14. ¿Jasa slekilal wa xkatik eluk wajel kʼujoltik ja sjejel ja tuki?

¹⁴ Cha jelni wa xbʼobʼ jnebʼtik sbʼaja kermanotiki, ama keremeto ma ayxa skʼujole.  Bʼobʼta oj pensaraʼuktik june bʼa jkongregasyontik bʼa wan stʼaspujel prebaʼik jastal ja stʼenwanel tuk keremtik, ja spamilyaʼe ma yuja chameli. ¿Wan ma sjeʼawe lekil modo bʼa oj bʼobʼ jnebʼtik ja keʼntiki? Ta wa xwaj jkʼujoltik ja lekil sjejeleʼi ojni jnebʼtik jastik bʼa oj skoltayotik oj kuchkujtik ja wokoliki. ¿Anke jelni chaʼanyabʼal xkilatik ja sjejelik bʼa skʼuʼajel it? Wani xyakitik rasonik bʼa gusto oj ajyukotik (Heb. 13:7; Sant. 1:2, 3).

15. ¿Jas rason bʼa jekabʼanum Pablo oj skoltayotik yaʼteltajel gusto lek ja Jyoba?

¹⁵ Ta wa xkatikyi ja mas lek bʼa keʼntik ja Jyoba, ojni katik ajyuk ja lamanil sok oj ajyuk tsoman ja kongregasyon. Jani jaw ja jas skʼulane ja snochumanik ja Kristo bʼa bʼajtan siglo. Ja yeʼnleʼi ajyiyujile tuktukil donik sok cholalik (1 Cor. 12:4, 7-11). Pe ja jaw mini waj jun rason bʼa oj ochuke preba ma bʼa oj spil sbʼaje soka tuk. Jaʼuktoma, ja Pablo yala ja bʼa skarta bʼa efesioʼik bʼa kada jujune oj skʼuluk ja janekʼ wa xbʼobʼyuji «bʼa yajel yijbʼuk ja skuerpo ja Kristo». Sok cha yala: «Yajni kada parte wa skʼulan lek ja yaʼteli, ja it wani xkoltani bʼa oj kʼiʼuk ja kuerpoʼali sok jachuk tsʼunan lek oj ajyuk ja bʼa yajalkʼujolali» (Efes. 4:1-3, 11, 12, 16). Yajni skʼulane ja it, yaweni ajyuk ja lamanili sok ajyel tsoman, modoʼalik bʼa wa xkilatik ja bʼa jkongregasyontik ja bʼa jtyempotiki.

16. ¿Jas kʼelsat oj bʼobʼ ajyukujtik? (Hebreos 6:10).

¹⁶ La ajyuk jkʼelsatikl bʼa mi oj jlajbʼajtik soka tuk. Mas lek jaʼ xwaj jkʼujoltik ja sjejel bʼa Jesús sok la jkʼujoluktik bʼa snochjel ja smodoʼiki. La jnebʼtik ja sjejelik bʼa skʼuʼajel ja bʼa tyempo ekʼta sok ja bʼa jtyempotiki. La skʼujoluktik yajelyi ja Jyoba ja mas leki, aʼa tʼabʼan akʼujol ke ja yeʼn «tojni kʼotel sok mini xchʼay skʼujol ja jastik waxa kʼulanexi» (kʼuman ja Hebreos 6:10). Moka awakan yaʼteltajel gustoxta ja Jyoba sok kʼuʼan lek ke ja yeʼn jelni chaʼan yabʼal xyila ja janekʼ waxa kʼujolan bʼa yajel gustoʼaxuk.