Ja bʼa ekʼele jaw, ja kongregasyoni oj yil ke ti skʼutsukan ja winik ja bʼajtan snupanel yajni cha nupani sok jaxa yajkʼachil snupaneli balexani. Bʼa yabʼjel stojol jas yuj jach wa xkʼuʼaxi, la jpaklaytik ja jas yala ja Jesús sbʼaja skʼutsjel nupanel sok ja nupanel yajkʼachil ekʼele.

Ja bʼa Mateo 19:9, ja Jesús xchiktes ja único rason wa xyaʼa ja Biblia bʼa skʼutsjel ja nupaneli. Ja tiw wa xyala: «Spetsanil ja maʼ wa skʼutsu ja snupanel, pe mi yuj koʼ mulal ja xcheʼum sok ixuk winik, sok xnupanisok pilan wani xchʼaykʼujolan ja nupaneli». Ja bʼa jas yala ja Jesús wa xnebʼatik 1) ke ja koʼel mulal sok ixuk winik jaʼitani ja único rason wa xyaʼa ja Biblia bʼa skʼutsjel ja nupaneli sok 2) ja winik bʼa wa skʼutsu ja snupanel soka xcheʼumi ta mi jaʼuk ja rason jaw bʼa Biblia sok xnupanisok pilan wani xchʼaykʼujolan ja nupaneli. a

¿Wan maʼ stojolan ke ja jas yala ja Jesús ta jun winik xkoʼ mulal sok ixuk winik sok skʼutsu ja snupaneli libre maʼ ay wa xyala ja Biblia bʼa oj cha nupanuk? Mini jachukukxta. Yajni june wa xchʼaykʼujolan ja nupaneli, ja maʼ mey smuli yeʼn wa stsaʼa ta oj ya perdon ma miyuk. Ta mi yaʼa perdon sok skʼutsu ja snupanele ja bʼa ley, xchawanile librexa aye bʼa oj cha nupanuke yajni tojbʼita ja sjuʼune bʼa skʼutsjel nupanel.

Pe bʼobʼta ja maʼ mey smuli mini skʼana oj skʼuts ja snupaneli sok wa xyala ke puesto ay oj ya perdon ja statami. Pe ¿jaxa ta ja tatamal maʼ xchʼaykʼujolanunej ja nupaneli mi skisa ja sperdon ja xcheʼumi sok bʼobʼ skʼuts ja snupanel bʼa ley ama mi akuerdo ayuk ja xcheʼumi? Pes yuja akuerdo ay oj akʼwanuk perdon ja cheʼumal sok mi skʼana oj skʼuts ja snupaneli, mini libre ayuk ja tatamal bʼa oj cha nupanuk. Ta ja yeʼn tarega wa skʼana oj skʼok ja jas wa xyala ja Biblia sok xnupanisok pilan ama mi libre ayuk ja jastalni wa xyala ja Biblia, wani xchʼaykʼujolajel ja nupaneli. Ja ansyanoʼik bʼa kongregasyoni tʼilani oj cha skʼuluke jun comité judicial bʼa yiljel ja mulali (1 Cor. 5:1, 2; 6:9, 10).

Ta jun winik xnupani yajkʼachil ekʼele jach mey yiʼoj base bʼa Biblia bʼa oj bʼobʼ skʼuluk, ¿jastal wa xyila ja kongregasyon ja bʼajtan snupaneli sok ja yajkʼachili? ¿Mito maʼ xchʼak ja bʼajtan snupanel ja bʼa jastal wa xyala ja Biblia? ¿Ojto maʼ bʼobʼ stsaʼ ja cheʼumal ta oj ya perdon maʼ miyuk ja statam ajyi? ¿Oj maʼ bʼobʼ alxuk ke ja yajkʼachil nupanum wanto xchʼaykʼujolajel ja nupanel?

Man wego, ja kongregasyon wa xyila ke ja yajkʼachil nupanumi waneto xchʼaykʼujolajel ja nupaneli yajni sakʼanto ja maʼ mi koʼeluk mulali, mito xnupani sok me xkoʼ mulal sok ixuk winik. Pe ja Jesús jani waj skʼujol sbʼaja maʼ mi koʼeluk mulali yajni xcholo ja bʼa  skʼutsjel nupaneli sok ja oj nupanuk yajkʼachil ekʼele. Jaʼuktoma, xcholo ke ja winik bʼa bʼobʼ skʼuts ja snupanel bʼa mey yiʼoj base bʼa Biblia sok xnupanisok pilan wani xchʼaykʼujolajel ja nupaneli. Ja bʼa ekʼele jaw, ja skʼutsjel nupanel sok nupanel yajkʼachil ekʼele, ja Jesús sjeʼa ke junxtani kʼotel jastal xchʼaykʼujolajel ja nupanel, sok tini wa xchʼak ja bʼajtan nupaneli.

Yajni june wa skʼutsu ja snupaneli sok xnupanisok pilan, ja maʼ mi koʼeluk mulali mixani xbʼobʼ stsaʼ ta ojto ya perdon ma miyuk. Ja yuj ja maʼ mi koʼeluk mulali wanxani x-el libre ja bʼa cholal yiʼoj bʼa stsajeli. Chomajkil, ja bʼa jastal wa xyila ja kongregasyon ja yajkʼachil nupanumi mini jaʼuk ta sakʼanto ja maʼ mi koʼeluk mulali, ta me xnupani ma me xkoʼ mulal sok ixuk winik. b

Ja bʼa sjejel jtaʼatik tiʼal ja bʼa skʼeʼulabʼili, ja tatamali xchʼaykʼujolan ja nupaneli sok yuja jaw skʼutsu ja snupanel. ¿Pe lekbʼi ja tatamali skʼutsu ja snupaneli sok xnupani yajkʼachil ekʼele ama mi xchʼaykʼujolanunejuk ja nupaneli? Ma ¿jaxa ta ja tatamali mi koʼeluk mulal sok ixuk winik ja yajni skʼutsu ja snupaneli pe mas tsaʼan koʼi sok xnupani yajkʼachil ekʼele ama ja xcheʼumi puesto ay ajyi bʼa yajel perdon? Ja bʼa ekʼeleʼik it, ja skʼutsjel ja nupanel sok nupanel yajkʼachil ekʼele, bʼa wa stojolan xchʼaykʼujolajel ja nupaneli, tini wa xchʼak ja bʼajtan nupanel. Ja ajkʼach nupaneli mixani kontra ayuk soka leyi. Ja La Atalaya 15 bʼa febrero bʼa 1980, ja bʼa slam 30, wa xcholo ke ja yeʼn ayxa bʼa jun yajkʼachil nupanel «sok ja yuj mini xbʼobʼ ya kʼot tikʼan sok kumxel soka bʼajtan xcheʼumi; ja bʼajtan snupaneli chʼaktani yuja skʼutsu, xchʼaykʼujolan sok yuja nupani yajkʼachil ekʼele».

Ja yajkʼachil xcholjel sbʼaja it mi wa stojolan ke mixa sakuk yiljel ja nupaneli ma mi jun chaʼan mulaluk ja xchʼaykʼujolajeli. Ta jun winik wa skʼutsu ja snupaneli pe mey yiʼoj base bʼa Biblia sok xnupani sok pilan ama mi libre ayuk bʼa skʼulajel, ja ansyanoʼik tʼilan oj skʼuluke jun comité judicial yujni xchʼaykʼujolanunej ja nupaneli. (Ta ja pilan xcheʼum nupanisoki jun nochuman bʼa Kristo, cha tʼilani oj kʼulaxuk jun comité judicial pes yujni ja yeʼn cha xchʼaykʼujolanunej ja nupaneli). Ama ja ajkʼach nupanel it mi oj alxuk ke wanto xchʼaykʼujolajel ja nupaneli, ja winiki mini oj ajukyi cholalik ja bʼa kongregasyon bʼa jitsan jabʼil. Tʼilani oj majlaxuk bʼa oj chʼayuk ja jas mi lek wa xyala ja kristyano bʼa yeʼn yuja jas skʼulani. Chomajkil, tʼilan oj ilxuk jastal wa xtax ja bʼajtan cheʼumali, bʼa bʼobʼta junta jalon chʼaykʼujolaji, sok sbʼaja untik chʼineto bʼa jipjiyekan yuja maʼ koʼ mulali (Mal. 2:14-16).

Yajel tʼabʼan jkʼujoltik ja swokolil wa xyiʼajan ja skʼutsjel ja nupanel sok ja nupanel yajkʼachil ekʼele bʼa mey base bʼa Biblia, ja nochumanotik bʼa Kristo masni lek ja la jnochtik ja Jyoba yiljel ja nupanel jastal jun jasunuk bʼa sak (Ecl. 5:4, 5; Heb. 13:4).