1. ¿Jas yuj wa xkatikyi jkomentariotik ja bʼa reunionik?

 ¿JAS yuj wala wajtik ja bʼa reunionik? Ja rason mas tʼilan jani yuja wa xkʼana oj katikyi stoyjel ja Jyoba (Sal. 26:12; 111:1). Ja bʼa reunionik cha wani stsatsankʼujolan jbʼajtik soka tuk ja bʼa tyempoʼik jel wokol (1 Tes. 5:11). Ja yuj, yajni wa xkaʼa jkomentariotik, wani xlajxikujtik skʼulajel ja chabʼ jasunuk it.

2. ¿Bʼa jastik ekʼele oj bʼobʼ ka jkomentariotik ja bʼa reunionik?

² Kada semana wani xbʼobʼ ka jkomentariotik ja bʼa reunionik. Jun sjejel, ja bʼa xchʼakulabʼil ja semana oj bʼobʼ ka jkomentariotik ja bʼa spaklajel Ja Juʼun Cholumani. Sok ja bʼa reunión bʼa yoj semana oj bʼobʼ ka jkomentariotik ja bʼa xetʼan «Leʼa jastik chaʼanyabʼal sbʼa Dyos», sok ja bʼa «Spaklajel ja Biblia soka kongregasyon» sok bʼa tuk bʼa wa skʼana oj ka jkomentariotik.

3. a) ¿Jas oj bʼobʼ stimotik yajni oj ka jkomentariotik? b) ¿Jastal wa skoltayotik ja Hebreos 10:24, 25?

³ Jpetsaniltik wa xkʼana oj katikyi stoyjel ja Jyoba sok stsatsankʼujolajel ja kermanotik soka jkomentariotik. Pe ay jujuntik jasunuk oj bʼobʼ stimotik: ja jel oj xiwkotik bʼa mixa oj jkʼan oj kayi jkomentariotik ma ja wa xjachatik jitsan ekʼele ja jkʼabʼtik pe mini x-ajikitik spetsanil ja jastal wa xkʼanatik. Ja bʼa karta stsʼijbʼanyi ja hebreoʼik ja jekabʼanum Pablo, wa xtaʼatik jun rason ja bʼa jas oj skoltayotik. Stajel tiʼal ja bʼa stʼilanil yiʼoj ja reunionik, ja Pablo xchiktes ja jas oj waj jkʼujoltik: «La jtsatsankʼujoluk jbʼajtik» (kʼuman ja Hebreos 10:24, 25). Ta wa xkaʼa tʼabʼan jkʼujoltik ke oj bʼobʼ jtsatsankʼujoluktik ja tuk asta ja yajni wa xkaʼa jkomentariotik bʼa  pasil pe wa xchiktes ja skʼuʼajel kiʼojtik, mini jel oj xiwkotik ja yajni oj jach ja jkʼabʼtik. Sok ta mi jel x-ajikitik jastalni wa xkʼanatik, jelni oj ajyukotik gusto yajni wa xkilatik wa xbʼobʼ yaʼ skomentario ja tuk (1 Ped. 3:8).

4. ¿Jas oxe jasunuk oj paklaytik ja bʼa artikulo it?

⁴ Ja bʼa artikulo it, oj kiltik bʼajtan jastal oj bʼobʼ jtsatsankʼujoluk jbʼajtik bʼa jun chʼin kongregasyon, bʼa tʼusanta ja hermanoʼik sok jel oj bʼobʼ ka jkomentariotik. Tsaʼan oj cha kiltik jastal skʼulajel bʼa jun niwan kongregasyon, bʼa jel jitsan ja hermano wa skʼana oj yaʼ skomentarioʼe. Sok tsaʼan, oj paklaytik jastal oj katikyi ja jkomentariotik bʼa jachuk oj stsatsankʼujoluk meran ja tuk.

5. ¿Jas oj bʼobʼ jkʼuluktik bʼa oj tsatsankʼujoluk jbʼajtik ta jel tʼusanotik ja bʼa reunión?

⁵ Bʼa jun grupo ma bʼa jun chʼin kongregasyon mini jitsanuk ja maʼ wa xyaʼa skomentario. Ay ekʼele, ja hermano maʼ wan yajel ekʼuk ja loʼil ja bʼa reunión tʼilan oj smajla jutsʼin bʼa ay maʼ oj ya kʼeʼuk ja skʼabʼ. Ja it masni wa xya albʼuk ja reunión. Sok mi jelxta stsatsankʼujolani. ¿Jas oj kʼuluktik ja bʼa ekʼeleʼik jaw? La ajyukotik chapan bʼa yajel jitsan jkomentariotik. Jachuk oj tsatsankʼujoluktik ja tuk bʼa oj yaʼe mas.

6, 7. ¿Jas oja kʼuluk bʼa oj bʼobʼa kom jawa xiweli?

⁶ Kechanta spensarajel oj yaʼ jun skomentarioʼe ja bʼa reunionik, jitsan hermano wa x-aji och xiwele. Ta jach wa x-ekʼabʼaj, ¿jas oj bʼobʼa kʼuluk? ¿Jas yuj mixa leʼa akoltajel bʼa oj bʼobʼa kom jawa xiwel bʼa jachuk oja tsatsankʼujoluk mas ja tuk soka wa komentarioʼik?

⁷ Jun jasunuk oj bʼobʼ skoltaya jani spaklajel jujuntik rason wa xyaʼa Ja Juʼun Cholumani bʼa elelxa. b June ja bʼa rasonik jani oja chapabʼaj lek (Prov. 21:5). Yajni mas waxa wabʼ stojol ja jas oj paklaxuki, mas pasil oja waʼa komentario. Cha pilan modo jani oja waʼa komentarioʼik bʼa kom (Prov. 15:23; 17:27). Yajni wa xwa makunuk tʼusan yaljelik, masni mi oj xiwan. Chomajkil, ja hermanoʼik masni pasil oj yabʼye stojol ja komentarioʼik bʼa kom, bʼa june ma bʼa chabʼ orasyon, ke yuj jun komentario jel najat. Ta ja weʼn waxa waʼa jun komentario bʼa kom sok wa xwa makunuk ja yaljelik mas tʼilan, ja hermanoʼik ojni yil-e ke achapunejabʼaj lek sok awabʼunej stojol ja jas wan paklaxel.

8. ¿Jastal wa xyabʼ ja Jyoba yajni wa xyila wa xkʼulantik ja janekʼ wa xbʼobʼkujtik?

⁸ ¿Jas oj bʼobʼa kʼuluk ta wata makunuk jujuntik ja rasonik jaw sok yuja xiweli kechan waxa waʼa june ma chabʼ komentario? Ajuluka kʼujol ja Jyoba jel chaʼanyabʼal xyila ja waxa kʼujolan oja wa juna komentario (Luc. 21:1-4). Sok cha mini skʼanakitik ja jas mi xlajxikujtik (Filip. 4:5). Ja yuj ila janekʼ oj bʼobʼa waʼe, kʼulan sok kʼanayi ja Jyoba ayawi lamanil. Bʼajtan, bʼobʼta oja waʼa kʼelsat oja wa juna komentario bʼa kom.

9. ¿Jas wokol wa xbʼobʼ ekʼuk bʼa jun niwan kongregasyon?

⁹ Ta ja bʼa wa kongregasyon ay jitsan choluman, bʼobʼta tukni jawa  wokoli. Bʼobʼta jitsan ekʼele mini jun komentario oj ajukawi yujni ay jitsan hermano bʼa wa skʼana oj yaʼe. La jpensaraʼuktik ja sjejel bʼa Danielle, jun hermana bʼa jel xyiʼaj gusto yajel skomentario ja bʼa reunionik. c Bʼa yeʼna jelni tʼilan, yujni ti chʼikan ja bʼa yajelyi stoyjel ja Jyoba, stsatsankʼujolajel ja tuk sok wa xkoltaji bʼa oj yaʼ bʼa skʼujol ja smeranilik bʼa Biblia. Pe yajni kʼe koltanuk bʼa jun niwan kongregasyon, mixa jel x-ajiyi skomentario, ay ekʼele mini june. Ja yeʼn wa xcholo: «Ay ekʼele wa xkabʼ wa x-el jgana. Lajansok chʼaytakuj jun cholal. Yajni mini jun komentario wa x-ajiwi, wa xkʼe apensaraʼuk ke gana mi x-ajiwi».

10. ¿Jas oja kʼuluk bʼa mas oj bʼobʼa waʼa komentario?

¹⁰ ¿Ayma bʼa jach awabʼunej jastal ja Danielle? Ta jachuk, bʼobʼta ayni apensaraʼunej mas lek mixa oja jach jawa kʼabʼ sok kechan smaklajel. Pe mok eluka gana. ¿Jas oj bʼobʼa kʼuluk bʼa mas oja waʼa komentario? Mok kechana chap june. Jachuk ta mi xbʼobʼa jakʼ ja bʼa bʼajtan parrapoʼik, ojni bʼobʼa kʼuluk bʼa tuk. Yajni xa chapabʼaj ja bʼa Spaklajel Ja Juʼun Cholumani, pensaran jastal wa syaka sbʼaj ja parrapoʼik soka yolomajel ja artikulo. Jachuk ayni jas oj bʼobʼa wale. Pilan jas oj bʼobʼa kʼuluk jani xchapjelabʼaj ja bʼa parrapoʼik wa xyiʼajan smeranilik bʼa Biblia bʼa mas wokol (1 Cor. 2:10). Yuja mas wokol xcholjel, mini maʼ jel sjacha ja skʼabʼi. Pe ¿jaxa ta wata makunuk ja rasonik jaw ja bʼa reunionik sok mito xa waʼa jun komentario? Bʼajtanto oj kʼeʼuk ja reunión oj bʼobʼa taʼ loʼil ja hermano maʼ oj ya ekʼuk ja estudio sok yaljel yabʼ bʼaya achapuneji.

11. Jastalni wa xyala ja Filipenses 2:4, ¿jas oj bʼobʼ jkʼuluktik?

¹¹ (Kʼuman ja Filipenses 2:4). Bʼa jani tojubʼal yuja yip ja Dyos, ja jekabʼanum Pablo stsatsankʼujolan ja snochumanik Kristo bʼa ja oj sleʼe ja slekilal ja  tuk. ¿Jastal oj bʼobʼ katik makunuk ja rason it ja bʼa reunionik? Jani yajel juljkʼujoltik ke ja tuk cha wani skʼana oj yaʼ skomentarioʼe.

12. ¿Jas jun lekil modo oj bʼobʼ jkʼuluktik bʼa jachuk ja tuk oj yabʼye wa stsatsankʼujolajiye ja bʼa reunionik? (Cha kʼela ja poto).

¹² Bʼa oj kabʼtik stojol la katik jun sjejel. Yajni wala loʼilani soka wa wamigoʼik, ¿anke mini kechan weʼn wala kʼumani? Wanixa waʼakan bʼa oj cha kʼumanuke ja yeʼnle. Junxtani wa x-ekʼ ja bʼa jreuniontik. Wani xkʼanatik aya skomentarioʼe ja hermanoʼik ja janekʼ wa xbʼobʼyujile. Pes jun modo bʼa stsatsankʼujolajel ja kermanotik jani yajelkan bʼa oj yal-e ja skʼuʼajel yiʼoje (1 Cor. 10:24). La kiltik jas oj bʼobʼ jkʼuluktik bʼa jachuk jitsan oj bʼobʼ yaʼ skomentarioʼe.

13. ¿Jas oj bʼobʼ jkʼuluktik bʼa jachuk ja kermanotik ojto staʼ bʼa oj yaʼ skomentarioʼe?

¹³ La ka jkomentariotik bʼa mi jel najatuk. Jachuk ojni kan tyempo bʼa oj cha yaʼ skomentarioʼe ja hermanoʼik. Ja ansyanoʼik sok ja tuk Testigoʼik bʼa ayxa tyempo teye ja bʼa smeranil tʼilani oj cha yaʼe sjejel sbʼaja it. Mini kechan kom ita, jelni tʼilan ke ja bʼa jkomentariotik mi jel jas oj jcholtik. Ta ja weʼn chʼaka chol spetsanil jun parrapo, ja tuki mixa oj staʼ jas oj yal-e. Jun sjejel, ja bʼa parrapo it ayiʼojan chabʼ rason: ke ja komentarioʼik kom ita sok mi jel jas oj cholxuk. Ta weʼn bʼajtan ajiwi komentario ja bʼa parrapo it, ¿jas mi kechan xa wala june ja bʼa rasonik it?

14. ¿Jasa oj ka tʼabʼan jkʼujoltik yajni oj tsatik janekʼ ekʼele oj jach ja jkʼabʼtik? (Cha kʼela ja potoʼik).

¹⁴ Mok jelxan ja janekʼ ekʼele oja jach jawa kʼabʼ. Ta tikʼanxta wantik sjachjel ja jkʼabʼtik, bʼobʼta ja hermano maʼ wan yajel ekʼuk ja estudio wegoxtani oj yakitik ama ayni tuk mito xyaʼa  skomentarioʼe. Chomajkil, ojni bʼobʼ spensaraʼuke ja tuk ke mixa yajnaluk oj yaʼ skomentarioʼe (Ecl. 3:7).

15. a) ¿Jastal oj kabʼtik yajni mini jun komentario xkatikyi ja bʼa reunión? b) ¿Jasa tʼilan oj yaʼ tʼabʼan skʼujol ja hermano maʼ wa xyaʼa ja sjobʼjelik? (Kʼela ja recuadro « Ja jastal yajel ekʼ jun loʼil ja bʼa xetʼan ayiʼojan sjobʼjel sok sjakʼjel»).

¹⁵ Yajni jitsan hermano wa skʼana oj yaʼ skomentarioʼe, bʼobʼta mini jel oj katikyi jkomentariotik. Asta oj chʼakuk ja reunioni sok mini june katikyi. Meran, bʼobʼta ja jaw ojni ya el jganatik, pe mok syajbʼesotik (Ecl. 7:9).

16. ¿Jas oj bʼobʼ jkʼuluktik bʼa stsatsankʼujolajel ja matik wa xyaʼa skomentarioʼe?

¹⁶ Ama mi xbʼobʼ katikyi jkomentariotik ja janekʼ wa xkʼanatik, pe ojni bʼobʼ jmaklaytik lek ja skomentarioʼe ja tuk sok skʼulajele felicitar yajni xchʼak ja reunión. Bʼobʼta ja yaljelik oja walyabʼi jel oj stsatsankʼujoluk ja hermanoʼik jastalni ja komentarioʼik waxa kʼana oja wa ajyi (Prov. 10:21). Yajni wa xkʼulantik felicitar ja tuk, cha wa stsatsankʼujolantike.

17. a) ¿Jasa oj bʼobʼ skʼuluke ja nantatalik? b) Jastalni wa sjeʼa ja bideo, ¿jas chane modo bʼa oj bʼobʼ chapxuk jun komentario? (Cha kʼela ja nota).

¹⁷ ¿Jas mas oj bʼobʼ jkʼultik bʼa stsatsankʼujolajel jbʼajtik ja bʼa reunionik?  Ta aya wuntikil bʼa chʼineto, koltaye bʼa xchapjel ja skomentarioʼe jastalni ja bʼa sjabʼile (Mat. 21:16). Ja bʼa reunionik, ay ekʼele wa xtax tiʼal jastik bʼa wokol, jastal ja wokolik ayiʼoje ja nupanumik ma ja jastal wa xyila ja Dyos ja wa staʼa sbʼaj jun ixuk sok winik. Anima yuja jaw, bʼobʼta ay june ma chabʼ parrapo bʼa oj yaʼ skomentarioʼe ja yal untik. Cha ojni bʼobʼa koltaye bʼa oj yabʼye stojol jas yuj ay ekʼele mi oj bʼobʼ yaʼ skomentarioʼe yajni sjacha ja skʼabʼe. Ta waxa cholo yabʼye ja it, mini oj och stristeʼile ja yajni mi yeʼn wa x-ajiyile (1 Tim. 6:18). d

18. ¿Jas oj bʼobʼ jkʼuluktik bʼa mi jel oj waj skʼujole bʼa keʼntik yajni wa xkaʼa jkomentariotik? (Proverbios 27:2).

¹⁸ Kibʼanaltik oj bʼobʼ jchaptik lekil komentarioʼik bʼa oj yayi stoyjel ja Jyoba sok stsatsankʼujolajel ja kermanotik (Prov. 25:11). Ama ay ekʼele oj bʼobʼ katik jun chʼin komentario bʼa jun jasunuk ekʼel jbʼajtik, pe mok jel jcholtik bʼa keʼntik (kʼuman ja Proverbios 27:2; 2 Cor. 10:18). Mas lek ja xwaj jkʼujoltik ja Jyoba, ja Yabʼal sok ja xchonabʼ (Apoc. 4:11). Pe ta ja sjobʼjel bʼa jun parrapo wa skʼana ke oj kaltik jun jasunuk bʼa keʼntik, lekni ja oj kaltik. Ja bʼa parrapo ti nochani oj tatik jun sjejel.

19. a) ¿Jas slekilal oj ilxuk ta wa xpensarantik bʼa tuk ja bʼa reunionik? (Romanos 1:11, 12). b) ¿Jas yuj waxa wiʼaj gusto yajela komentario ja bʼa reunionik?

¹⁹ Ama mey tojelalik sbʼaja jastal oj katik ja jkomentariotik ja bʼa reunionik, pe tʼilani oj kʼujoluktik bʼa jachuk ja jkomentariotik oj stsatsankʼujoluk ja tuk. Bʼa jujuntik hermano ja it wa stojolan oj yaweyi mas skomentarioʼe. Sok bʼa tuk wa stojolan malan ja janekʼ wa xyaweyi sok gustoʼaxel yuja tuk wa skʼana oj yaʼ skomentarioʼe. Ta wa xpensarantik bʼa tuk ja bʼa reunionik, jpetsaniltik oj kabʼtik stsamalil ja stsatsankʼujolajel jbʼajtik (kʼuman ja Romanos 1:11, 12).