Ja loʼilik bʼa Mateo sok bʼa Lucas ja bʼa bʼajtan jabʼilik ja bʼa sakʼanil ja Jesús mi junukxta yujni tuktukil ja jastal stsʼijbʼane ja bʼa jastal yabʼye stojol.

Ja Mateo jani wa staʼa tiʼal ja bʼa jastik ekʼ sbʼaja José. Wa xcholo ja jasa skʼulan ja yeʼn yajni yabʼ tukxa ay satkʼinal ja María, ja bʼa wayichal cholji yabʼ yuj jun anjel ja bʼa jas oj ekʼuki soka jastal snocho ja jas alji yabʼi (Mat. 1:19-25). Ja Mateo cha wa xcholo bʼa aljiyabʼ yuj jun anjel ja José bʼa pilan wayichal bʼa a-spak ajnel man Egipto soka spamilya sok ja yeʼn skʼuʼan. Chomajkil, wa xcholo bʼa jun pilan wayichal bʼa aljiyabʼ yuj jun anjel bʼa akumxuk bʼa slujmalil Israel, sok ja yeʼn kumxi sok spensaraʼan tixa oj ajyuk kulan bʼa Nazaret (Mat. 2:13, 14, 19-23). Ja bʼa sbʼajtanil chabʼ kapitulo bʼa Evangelio bʼa Mateo, ja sbʼiʼil ja José wa staʼa tiʼal juke ekʼele, jaxa sbʼaja María kechanta chane ekʼele.

Pe jaxa loʼil bʼa Lucas jaʼ mas wa staʼa tiʼal ja bʼa jastik ekʼ sbʼaja María. Wa xcholo ja ulataji yuja anjel Gabriel, ja waj yulatay ja Elisabet soka jujuntik yaljelik yalayabʼ ja Jyoba bʼa yajelyi stoyjel (Luc. 1:26-56). Cha wa staʼa tiʼal ja jasa aljiyabʼ ja María yuja Simeón sbʼaja wokolik ojto ekʼ sbʼaja Jesús. Sok ja loʼil xcholo sbʼaja jasa ekʼ yajni ja Jesús kechanto yiʼoj 12 jabʼil sok waj yulatay ja templo soka spamilya, ja Lucas ja staʼa tiʼal ja jasa yala ja María sok mi jaʼuk ja bʼa José. Chomajkil, wa xcholo sbʼaja jastal yamji ja bʼa sakʼanil ja María yuja ja jastik ekʼi (Luc. 2:19, 34, 35, 48, 51). Ja bʼa sbʼajtanil chabʼ kapitulo ja bʼa Evangelio bʼa Lucas, ja sbʼiʼil ja María wa xtax 12 ekʼele, pe jaxa sbʼaja José kechanta oxe ekʼele. Ja yuja Mateo ja mas xcholo sbʼaja jastik spensaran sok skʼulan ja José, jaxa Lucas ja mas xcholo sbʼaja jastik spensaran sok skʼulan ja María.

Ja listaʼik stsʼijbʼane ja chawane tsʼijbʼanum it sbʼaja matik ekʼpaxtayuji cha mini junxtaʼuk. Ja Mateo jaʼ stsʼijbʼan ja maʼ ekʼpaxtayuj ja José sok yaʼa prebaʼik sbʼaja Jesús, yuja yeʼn ja smajan yunin ja José, yeʼnani yiʼoj ja derecho ja smandaranel ja David. ¿Jas yujil? Yujni ja José tini jakel bʼa yintil ja mandaranum David, sok tini eljan ja bʼa yunin Salomón (Mat. 1:6, 16). Jaxa Lucas, jaʼ staʼa tiʼal ja matik ekʼpaxtayuj ja María sok yaʼa prebaʼik sbʼaja Jesús bʼa yeʼnani mero wa sbʼajin ja derecho. Yujni ja yeʼn «ti manxi ja ba yintil ja rey Davidi», ja bʼa sbʼakʼtel (Rom. 1:3). ¿Jas yujil? Yujni ja María ti jakel bʼa yintil ja mandaranum David bʼa pilan yunin, jaʼa Natán (Luc. 3:31, 32). Pe ta ja Helí ja yakʼix ja María, ¿jas yuj ja Lucas yala ja Helí ja skerem ja José? Yujni ja bʼa mero listaʼik wa xkan nolani kechantani wa x-aji ochkan juʼun ja winiki. Ja yuj, yajni ja Lucas wa xyala ja Helí ja yunin ja José, wa xchiknaji yeʼn niʼalal ja José (Luc. 3:23).

Ja listaʼik stsʼijbʼane ja Mateo soka Lucas wa sjeʼa jaman lek ja Jesús yeʼn ja Mesías Kʼapubʼali. Yuja Jesús jel naʼubʼal sbʼaj ti jakel bʼa yintil ja David, mini ja fariseoʼik soka saduceoʼik wa xbʼobʼ yal-e mi meranuk. Ja bʼa jtyempotiki, xchabʼil ja lista kanel tsʼijbʼunubʼali jelni xmakuni ja bʼa skʼuʼajel kiʼojtiki sok wa xya jipjkʼujoltik bʼa ojni ya kʼot smeranil ja jastik skʼapunej ja Dyosi.