1, 2. Jastalni wa xyala ja Salmo 34:8, ¿jasa tʼilan oj jkʼuluktik bʼa oj kiltik jel lek ja Jyoba?

LA JPENSARAʼUKTIK ke ay maʼ xyakitik jun waʼelal bʼa mini jun ekʼele ay bʼa kabʼunejtika. Oj ma bʼobʼ jnatik ja yajbʼal ja yajni xkilatiki, ja sikʼatiki, slejel ja yajnaliki ma sjobʼjel ta ay maʼ wa skʼulan gusto. Pe bʼa oja naʼ ta oja kʼul gusto tʼilani oja wabʼi.

² Bʼa juntikxta, ojni bʼobʼ jnatik sbʼaja lekil skʼujol ja Jyoba skʼumajel ja Biblia sok ja juʼuntiki, cha jachni ja yajni xkabʼtik wa xyalawe ja tuk jastal akʼubʼal koʼuk slekilale yuja Jyoba. Pe kechani oj kabʼtik meran stojol ja jastal jel lek ja Jyoba ta ‹kabʼtik› keʼntik mismo (kʼuman ja Salmo 34:8). La katik jun sjejel. La jpensaraʼuktik wa xkʼanatik oj kaʼteltaytik ja Jyoba bʼa tyempo tsʼikan, pe bʼa oj bʼobʼ jkʼuluktik tʼilani oj kitik jun jsakʼaniltik bʼa chʼin. Bʼobʼta ayxa jitsan ekʼele jkʼumunejtik ja kʼapjelal bʼa Jesús, ta kaʼatik bʼajtan bʼej ja sGobyerno ja Dyos, ja Jyoba oj yakitik ja jastik oj makunukujtik, pe bʼobʼta mini bʼa kabʼunejtik jastal wa xkʼot smeranil ja skʼapjelal jaw (Mat. 6:33). Ama jachuk, yuja ay kiʼojtik skʼuʼajel ja bʼa skʼapjelal bʼa Jesús, mini jel xchʼakatik takʼin sok cha mi tsʼikanuk ja ora wala aʼtijitiki, sok jaʼ wa xwaj kʼujoltik ja bʼa xcholjeli. Yajni wa xkʼulantik, keʼntik mismo wa xkilatik jastal teyotik bʼa skʼabʼ ja Jyoba. Sok jachuk wa xkilatik jastal jel lek skʼujol ja yeʼn.

3. Jastalni wa xyala ja Salmo 16:1, 2, ¿matik wa xya el slekilal ja lekil skʼujol ja Jyoba?

³ Ja Jyoba ‹jelni lek sok jpetsaniltik›, cha jachni soka matik mi snaʼa sbʼaji (Sal. 145:9; Mat. 5:45). Pe jani mas wa xya koʼyi slekilal ja maʼ wa xyajtajiyuji sok ja maʼ wa x-aʼteltajiyuj sok spetsanil skʼujole (kʼuman ja Salmo 16: 1, 2). La kiltik jujuntik ja bʼa jastik lek skʼulunejkitik ja Jyoba.

4. ¿Jastal wa sjeʼa ja Jyoba ja lekil skʼujol sbʼaja matik wa xkʼe mojxukesoki?

⁴ Kada ekʼele ke wa xkatik makunuk ja jas wa xnebʼatik bʼa Jyoba, wa xkilatik jastal wa xkoltani ja bʼa jsakʼaniltiki. Yajni wanotik snebʼjel sbʼaja yeʼn kʼot jyajtaytik, skoltayotik bʼa oj jtukbʼestik ja jpensartiki sok yajelkan ja modoʼalik bʼa wa xya jitskotik sbʼaja yeʼn (Col. 1:21). Sok yajni katikyi ja jsakʼaniltik sok kiʼajtik jaʼ, masto sjeʼakitik ja lekil skʼujoli ja yajni ajyikujtik jun lekil jconcienciatik sok ajyel kʼubʼan soka yeʼn (1 Ped. 3:21).

5. ¿Jastik prebaʼik ja bʼa lekil skʼujol ja Jyoba kilunejtik ja yajni wa xcholotiki?

⁵ Ja bʼa xcholjeli, tikʼanxta wa xkilatik prebaʼik ja bʼa lekil skʼujol ja Jyoba. ¿Kʼotela maʼ jun kristyano bʼa jel xkʼixwi? Jachukeni jitsan ja bʼa yaʼtijumik ja Jyoba. Bʼobʼta bʼajtanto oj snaʼe ja smeranili mini tʼun ekʼ bʼa spensare ta oj kʼumanuke bʼa jun puerta bʼa loʼilanel bʼa Biblia sok june bʼa mini tʼun snaʼawe sbʼaj. Pe ja yani masxa tikʼan wa skʼulane. Mini kechanuk, soka skoltanel ja Jyoba snebʼuneje yabʼjel stsamalil ja xcholjeli. Cha yabʼuneje jastal koltubʼale yuja Jyoba bʼa tuk modoʼik. Jun sjejel, koltubʼale bʼa oj ajyuke laman ja yajni wa xkʼulajiyile bʼa mi lekuk ja bʼa xcholjeli. Wa xcha xkoltajiye bʼa oj ajuk julskʼujole jun teksto ja mero ora wa xmakuniyujile ja yajni wane loʼilsok jun kristyano bʼa wa skʼana oj snebʼe. Sok wa x-ajiyile ja ipal wa xmakuniyujile bʼa mi oj el sganaʼe ja yajni mi skʼana oj smaklaye ja kristyano (Jer. 20:7-9).

6. ¿Jastal wa x-ilxi ja lekil skʼujol ja Jyoba ja bʼa chapjelal wa xyakitiki?

⁶ Ja Jyoba cha sjeʼunejkitik ja lekil skʼujol ja yajni wa xchapawotik ja bʼa xcholjeli (Juan 6:45). Ja reunión bʼa yoj semana, bʼa wa xkilatik sjejelik jastal ochel loʼil bʼa chapubʼal lek sok wala lokjitik bʼa yajel makunuk ja bʼa xcholjeli. Spensarajel bʼa ay jas ajkʼach oj kʼulaxuk, bʼobʼta ja bʼajtani oj jak tʼun jxiweltik. Pe, yajni wa xkʼulantik, wa xkʼot kiltik jelni xmakuni ja tojelalik it ja bʼa jterritoriotiki. Cha wala tsatsankʼujolajitik ja bʼa reunioni sok ja bʼa asambleaʼik bʼa xcholjel bʼa jun modo mini bʼa jkʼulunejtik. Ja it oj cha skoltayotik bʼa oj jkʼuluktik jun jasunuk bʼa mi kʼajyel jkʼulunejuktik. Pe ta jkʼulantik, ojni ya koʼ jlekilaltik ja Jyoba. La jpaklaytik jujuntik jasunuk lek yaʼunejkitik ja Jyoba ja yajni wa xkʼulantik probar ajkʼach modoʼik bʼa yajelyi ja bʼa mas leki, chikan jastal wala taxtik. Tsaʼan oj cha kiltik jas oj jkʼuluktik bʼa oj kʼot jtatik ja jkʼelsatiki.

7. ¿Jas slekilal wa x-ajyikujtik ja yajni wa xkʼujolantik bʼa oj jkʼuluktik mas ja bʼa xcholjeli?

⁷ Wala mojxitik mas soka Jyoba. La kiltik ja sjejel bʼa jun ansyano sbʼiʼil Samuel, * bʼa ti wan koltanel soka xcheʼum bʼa Colombia. Wani xyabʼye stsamalil ajyi ja aʼtel bʼa precursor ja bʼa mero skongregasyone, pe wani skʼana oj skʼuluke mas ja bʼa xcholjeli koltanel bʼa jun kongregasyon bʼa wa xkʼanxi mas cholumanik. Bʼa oj lajxukyujile, tʼilan xchʼaka sbʼaje bʼa ay jas skʼulane. Ja Samuel wa xyala: «Katikon makunuk ja Mateo 6:33 sok kaʼatikonkan smanjel jastik bʼa mi tʼilanuk. Pe ja mas wokol waj bʼa keʼntikon jani yajelkan ja jnajtikoni, pes jachni kʼulubʼal jastal wa xkʼanatikon sok mixani ay jeltikon». Ja bʼa waj koltanukeʼi kʼot yile ke ja sakʼanile ja tiw mixa jel oj xchʼake takʼin jastal ajyi. Ja Samuel cha wa xyala: «Kilunejtikon jastal ja Jyoba wa stojowotikon sok wa  sjakʼa ja korasyontikoni. Kabʼtikon jastal jel lek xyilawotikon sok ja syajal skʼujol yiʼoj jmoktikon bʼa jun modo mi bʼa kabʼunejtikon ajyi». ¿Ay maʼ jun modo bʼa oja kʼul mas ja bʼa xcholjel ja weʼn? Ta jachkʼa, ojni bʼobʼ ajyan seguro bʼa oj mojxan mas soka Jyoba sok ja yeʼn oj stalnaya (Sal. 18:25).

8. ¿Jas waxa nebʼa ja weʼn sbʼaja jas wa xcholo ja Iván sok ja Viktoria?

⁸ Ja kaʼteltik sbʼaja Jyoba wa xya gustoʼaxukotik. La jpensaraʼuktik ja bʼa jas wa xcholo ja Iván sok ja Viktoria, jun nupanum bʼa precursore bʼa wane koltanel bʼa Kirguistán. Stsaʼawe bʼa oj yiʼe jun sakʼanil bʼa chʼin bʼa puesto ajyiye bʼa chikan jas cholal x-ajiyile, june bʼa jaw jani yajel kʼe naʼitsik. Ja Iván wa xyala: «Wa xkʼujolantikon bʼa kada proyecto. Anima yajtik lek wala kantikon ja och kʼakʼu, wa xkabʼtikon lamanil sok gustoʼil, pes yujni wa xnaʼatikon ke jchʼaka jbʼajtikon aʼtel sbʼaja sGobyerno ja Dyosi. Ja kamigotikon jtaʼatikoni sok ja experienciaʼik bʼa mini xchʼay jkʼujoltikon jelni xya gustoʼaxukotikon» (Mar. 10:29, 30).

9. ¿Jasa skʼulunej jun hermana bʼa wokol ja jastal wa xtaxi bʼa skʼulajel mas ja bʼa yaʼteltajel ja Dyosi, sok jastik slekilal yilunej?

⁹ Ja yaʼteltajel ja Jyoba wa xbʼobʼ ya gustoʼaxukotik ama mi pasiluk ja jastal wala taxtiki. Jun sjejel, jun biuda bʼa ayxa skʼujol bʼa África Occidental sbʼiʼil Mirreh, ja yeʼn wan aʼtel ajyi jastal loktora. Yajni yaʼakani, och jastal precursora. Ayiʼoj jun chamel sbʼiʼil artritis bʼa jelxa ipaxel sok kada ekʼele wa x-el ja bʼa xcholjeli kechantani wa xbʼobʼ skʼul jun ita ora ja bʼa tikʼan yiʼoj sbʼaj ja naʼitsiki. Pe wani xbʼobʼ ya ekʼ mas tyempo ja bʼa xcholjel bʼa ay jitsan kristyano. Ayiʼoj jitsan rebisitaʼik sok estudioʼik bʼa Biblia, sok jujuntik wa skʼulan bʼa telepono. ¿Jasa nikjiyuj bʼa oj skʼan oj skʼul mas bʼa Jyoba? Ja yeʼn wa xyala: «Ja bʼa jkʼujoli bʼutʼel ja yajtanel kiʼoj sbʼaja Jyoba sok ja bʼa Jesukristo. Tikʼanxta wa xkʼanayi ja Jyoba ke a-skoltayon skʼulajel ja janekʼ wa xbʼobʼkuj bʼa yeʼna» (Mat. 22:36, 37).

10. Jastalni wa sjeʼa ja 1 Pedro 5:10, ¿jasa wa xyayi ja Jyoba ja maʼ wa skʼujolan bʼa oj skʼul mas ja bʼa xcholjeli?

¹⁰ Ja Jyoba wa xcha yakitik pilan jchapjeltik. Ja Kenny, jun precursor bʼa ti wan koltanel bʼa Mauricio, yilani merani ja it. Yajni snebʼa ja smeranili, yaʼakan ja universidad, yiʼaj jaʼ sok kʼe stulyi ja aʼtel bʼa tyempo tsʼikan. Ja yeʼn wa xcholo: «Wa xkʼujolan oj kʼotkon jastal ja aluman Isaías, bʼa yala: ‹¡It bʼayonjul ja keʼn! ¡Jekawon keʼna!›» (Is. 6:8). Ja Kenny aʼtel bʼa jitsan proyectoʼik bʼa yajel kʼe naʼitsik sok cha koltanel bʼa sutjel juʼunik elel bʼa Biblia ja bʼa skʼumali. Ja yeʼn wa xyala: «Ajiki chapjelalik bʼa sjeʼaki ja modoʼalik jel tʼilan oj ajyukuj ja bʼa cholalik wa x-ajiki». Pe mi kechanuk snebʼa skʼulajel ja yaʼtelik. Ja yeʼn cha wa xyala: «Jnebʼa ja bʼa jas oj bʼobʼ jkom jbʼaji sok jastik modoʼalik jel tʼilan oj ajyukuj bʼa yaʼteltajel mas lek ja Jyoba» (kʼuman ja 1 Pedro 5:10). ¿Jas yuj mixa paklay ja jastal wala taxi sok ila ta oj bʼobʼ koltanan mas bʼa oj ajukawi mas chapjelal bʼa Jyoba?

11. ¿Jasa skʼulane jujuntik hermanaʼik ja bʼa Corea del Sur bʼa oj eluke ja bʼa xcholjeli, sok jastik slekilal yilawe? (Kʼela ja poto ja bʼa skʼeʼulabʼil bʼa spatiki).

¹¹ Asta ja matik jitsanxa jabʼil taʼumantiʼe wantoni xyawe el slekilal ja bʼa chapjelal wa xyaʼa ja Jyoba yajni wa xkʼulxi probar jun ajkʼach modo bʼa xcholjel. Yajni spuku sbʼaj ja chamel COVID-19, ja ansyanoʼik bʼa jun kongregasyon bʼa Corea del Sur stsʼijbʼane: «Jujuntik hermanoʼik bʼa wa skʼuʼane ke mi xbʼobʼ eluke ja bʼa xcholjel ajyi yuja maloʼayeʼi ja yan wa skʼulane jach bʼa bideollamada. Oxe hermanaʼik bʼa ayxa yiʼoje mas ja 80 jabʼili snebʼawe yajel makunuk ja ajkʼach aparatoʼik it, ja yan tʼusan mi spetsanil  kʼakʼu wa xcholowe» (Sal. 92:14, 15). ¿Wan maʼ xa wiʼaj gusto skʼulajel mas ja bʼa xcholjeli sok yabʼjel ja lekil skʼujol ja Jyoba? Ja jastik ti nochani oj skoltaya bʼa oja ta ja kʼelsat jaw.

12. ¿Jasa wa skʼapayi ja Jyoba ja maʼ wa sjipa skʼujol bʼa yeʼn?

¹² Nebʼa sjipjel akʼujol bʼa Jyoba. Ta wa xjipa jkʼujoltik bʼa yeʼn sok wa xkatikyi ja jas mas leki, ja yeʼn wani skʼapakitik oj ya koʼ jitsan jlekilaltik (Mal. 3:10). Jun hermana bʼa Colombia sbʼiʼil Fabiola kʼot yil yeʼn mismo jastal wa x-skʼot smeranil ja skʼapjelal it. Ja yeʼn wa skʼana oj aʼtijuk jastal precursora regular tʼusan tsaʼan ja yajni xyiʼaj jaʼi, pe jani wa smakʼlay sbʼaje soka statami sok ja oxe yuntikil ja janekʼ wa skʼulan ganari. Ja yuj, yajni stsaʼa oj elkan skʼanayi ja Jyoba bʼa akoltajuk yuj. Wa xcholo: «Kʼajyelni wa xyiʼaj tyempo ja oja tojbʼes bʼa oj kʼulajanan pensionar, pe kechanta ekʼ jun ixaw ja ti ajikiʼi. Wajni jun jasunuk bʼa jel cham yabʼjel». Ekʼ chabʼ ixaw tsaʼan, kʼe stulyi ja precursorili. Ja yan ayxa yiʼoj mas ja 70 jabʼili sok masxa ja 20 jabʼil ochel ja bʼa aʼtel it. Ja bʼa tyempoʼik jaw, skoltunej waxake kristyano bʼa kʼotel yiʼe jaʼ. Wa xyala: «Ay ekʼele wa xkabʼ mey kip, pe ja Jyoba kada kʼakʼu wa skoltayon bʼa oj jtsʼiktes ja koraʼiki».

13, 14. ¿Jas sjejelik oj skoltayotik bʼa oj jipjkʼujoltik bʼa Jyoba sok slejel tuk modoʼik bʼa yaʼteltajel mas?

¹³ Nebʼa ja sjejel bʼa tuk bʼa sjipa skʼujole bʼa Jyoba. Ja bʼa Biblia ay jitsan sjejelik bʼa kristyanoʼik skʼujolane yaʼteltajel ja Dyosi. Bʼa jitsan ekʼele, tʼilan yeʼn bʼajtan skʼujolane  bʼa jachuk oj ajuk koʼ slekilale yuja Jyoba. Jun sjejel, ja Dyos ya koʼyi slekilal ja Abrahán tsaʼan yajni ja yeʼn yaʼakan ja snaji ama «mi sna‘a bʼa oj wajuka» (Heb. 11:8, Ja yajkʼachil sjuʼunil ja dyosi). Jaxa Jacob aji koʼ slekilal ja yajni skʼulanta luchar sok jun anjel (Gén. 32:24-30). Sok yajni ja chonabʼ Israel ojxta ochuk ja bʼa Luʼum kʼapubʼali, ja chonabʼi bʼobʼni skʼuts ja yok jaʼ Jordán tsaʼan yajni ja sacerdoteʼik ochye ja bʼa yok jaʼi (Jos. 3:14-16).

¹⁴ Cha ojni bʼobʼa nebʼ ja sjejelik bʼa taʼumantiʼik bʼa jtyempotik bʼa sjipunej skʼujole bʼa Jyoba sok sleʼuneje modo skʼulajel mas bʼa yeʼna. Jun sjejel, jun hermano sbʼiʼil Payton, jaxa xcheʼumi Diana, jelni skʼulane gusto skʼumajel experienciaʼik bʼa hermanoʼik bʼa sleʼuneje modo yaʼteltajel mas ja Jyoba, jastal ja bʼa xetʼan «Se ofrecieron para ayudar». * Ja yeʼn wa xyala: «Yajni wa xkʼumantikon, lajansok wantikon yiljel ay maʼ wan yabʼjel jun waʼel bʼa jel x-ajbʼani. Yajni masto wa xkilatikon, masto wa xkʼana oj jkʼultikon probar sok yiljel jelni lek ja Jyoba». Soka tyempo, ja nupanum it wajye bʼa jun lugar bʼa wa xkʼanxi mas koltanel. ¿Ayxa maʼ bʼa akʼumunej ja weʼn ja artikuloʼik jaw? Sok ¿ayxa maʼ awilunej ja bideo Predicación en lugares apartados: Australia sok Predicación en lugares apartados: Irlanda, ja it tey bʼa jw.org? Ja jastik it ojni skoltaya bʼa oja taʼ tuk modoʼik bʼa oja waʼteltay mas ja Jyoba.

15. ¿Jastal wa xbʼobʼ skoltayotik ja maʼ lek smojtajeli?

¹⁵ Tsaʼa ja maʼ lek smojtajeli. Masni mi wokoluk skʼulajel probar jun yajkʼachil waʼel ta wa xkatik ekʼ tyempo soka kristyano bʼa wa skʼulane gusto ja waʼelal jaw. Cha jachni junxta, ta wa xkatik ekʼ tyempo soka matik wajel skʼujole yaʼteltajel ja Jyoba, masni pasil oj kabʼtik slejel modoʼik bʼa oj kaʼteltaytik mas ja Dyosi. Jachni ekʼ sbʼaje ja Kent soka Verónica. Ja Kent wa xcholo: «Ja kamigotikon sok ja jpamilyatikon wa stsatsankʼujolanotikon bʼa skʼulajel probar tuk modoʼik bʼa yaʼteltajel ja Dyosi. Kʼot jnatikon ke yajel ekʼ tyempo sok ja maʼ wa sleʼa bʼajtan ja sGobyerno ja Dyosi wa xya jipjkʼujoltikon bʼa skʼulajel probar jastik ajkʼach». Ja bʼa yan tyempo, xchawanile wane koltanel jastal precursor especial bʼa Serbia.

16. Jastalni wa xyala ja Lucas 12:16-21, ¿jas yuj tʼilan puesto oj ajyukotik bʼa xchʼakjel jbʼajtik?

¹⁶ Puesto ajyan bʼa oja chʼakabʼaj yuja Jyoba. Bʼa yajel gustoʼaxuk ja Jyoba, mini tʼilanuk yajelkan spetsanil ja jastik awiʼoji (Ecl. 5:19, 20). Pe ta mi xkʼulantik mas ja bʼa yaʼteltajel ja Dyos sok kechan wa xkʼanatik oj chʼak jbʼajtik bʼa skʼulajel ja jas wa xkʼanatiki, bʼobʼta oj kokotik ja bʼa junxta mulal koʼ ja winik bʼa sjejel yala ja Jesús bʼa ajyiyuj jun lekil sakʼanil pe chʼay skʼujol ja Dyosi (kʼuman ja Lucas 12:16-21). Jun hermano sbʼiʼil Christian, bʼa ti sbʼaj bʼa Francia, wa xyala: «Ja ajyi, mini wanukon yajelyi lek ja jtyempo sok ja kip ja Jyoba sok ja jpamilya». Ja yeʼn sok ja xcheʼumi yala oj ochuke precursoril, pe bʼa oj bʼobʼ yujile tʼilan yaʼawekan ja yaʼteleʼi. Bʼa oj smakʼla sbʼaje, yawe ajyuk jun yal snegosyoʼe bʼa xchonjel jastik bʼa limpiesa sok snebʼawe ajyel gusto sok ja jas tʼusan yiʼoje. ¿Lom maʼ xchʼaka sbʼaje? Ja yeʼn wa xyala: «Wa xkabʼtikon mas stsamalil ja xcholjeli, yiljel ja estudianteʼik bʼa Biblia sok ja kristyanoʼik bʼa wa xkulataytikon bʼa wane snebʼjel mas bʼa Jyoba».

17. ¿Jas yuj jujuntik wa xiwye skʼuljel probar ja jastik ajkʼach bʼa xcholjeli?

¹⁷ Mok xiwanik bʼa skʼulajel probar tuk  modoʼik bʼa yaʼteltajel ja Dyosi (Hech. 17:16, 17; 20:20, 21). Jun precursora bʼa Estados Unidos sbʼiʼil Shirley tʼilani stukbʼes ja jastal wa xcholo ja yajni kʼe ja chamel wa spuku sbʼaj ja COVID-19. Ja kʼetʼanjani mini skʼana oj xchol bʼa telepono. Pe ja bʼa yulatanel ja biajante, jejiyi jastal oj skʼuluk. Sok man tyempo jaw mini yaʼunejkan xcholjel jach bʼa telepono. Ja yeʼn wa xcholo: «Ja yajni kʼetʼani wani la xiwyon, pe ja wego jel xkʼulan gusto. Mastoni wa xbʼobʼ loʼilanukotiksok tuk kristyano ke yuja wala wajtik bʼa naʼits naʼitsi».

18. ¿Jasa oj skoltayotik bʼa oj kuchkujtik ja wokolik bʼa wani xya wokolanukotik skʼulajel mas ja kaʼteltik bʼa Dyos?

¹⁸ Aʼajyuk juna kʼelsat sok kʼujolan bʼa oj lajxukawuj. Yajni wa xtʼaspuntik wokolik, wa xkatikyi orasyon ja Jyoba sok wa xpensaraʼantik jastal tsamalxta oj jtojbʼestik (Prov. 3:21). Ja Sonia, bʼa wan koltanel jastal precursora regular bʼa jun kʼole bʼa wa xkʼumaniye romaní bʼa Europa, wa xyala: «Wani xkiʼaj gusto yajel och juʼun ja jkʼelsatik sok yajel ja juʼun jaw bʼa jun lugar chikan. Ja bʼa jmesa, ay kaʼunej jun dibujo bʼa jun jet bʼej. Yajni ay jas wa xtsaʼa skʼulajel, wa xkʼela ja dibujo sok wa xpensaraʼan bʼa maʼ oj yiʼon ja jas oj jtsaʼ skʼulajeli». Jaxa yajni wa x-ekʼ sbʼaj wokolik ja Sonia, mini xyaʼakan bʼa oj el sgana. Wa xyala: «Kada jastik yajkʼachil wa xtʼaspun wani xbʼobʼ kʼot jastal jun muro bʼa wa stimawon bʼa mi oj kʼotkon ja bʼa jkʼelsat kiʼoji ma jastal jun puente bʼa wa skoltayon bʼa oj kʼotkon. Jani ti chʼikan ja bʼa jastal wa xkila ja jastal wala taxyoni».

19. ¿Jastal wa xbʼobʼ jetik wa xkaʼatik tsʼakatal yuj spetsanil ja jas yaʼunejkitik ja Jyoba?

¹⁹ Ja Jyoba wani xya koʼ jlekilaltik bʼa jitsan modo. Wani xbʼobʼ jetik wa xkaʼatik tsʼakatal skʼulajel ja janekʼ wa xbʼobʼkujtik bʼa stoyjel (Heb. 13:15). Sok ja it tini chʼikan ja slejel tuk modoʼik bʼa skʼulajel mas ja bʼa yaʼteltajel ja Dyosi. Ta jach wa xkʼulantik, ja Jyoba masni oj ya koʼ jlekilaltik. Ja yujil, kada kʼakʼu la jletik modo bʼa oj kabʼtik sok oj kiltik ke jelni lek ja Jyoba. Jachuk oj kʼotkotik jastal ja Jesús, bʼa yala: «Jaʼ ni huala butʼiyon yuj cuando huax cʼulan ja jas huas scʼana ja maʼ seconejon coni, jayuj oj ni chʼac jcʼuluc ja yatela» (Juan 4:34).