1. ¿Jasa wane skʼulajel jitsan hermanoʼik bʼa oj yaʼteltaye mas ja Jyoba?

 JA XCHʼAKELAL ja luʼumkʼinal it jelxa mojan sok jelni ja kaʼteltiki (Mat. 24:14; Luc. 10:2; 1 Ped. 5:2). Jpetsaniltik wa xkʼanatik oj kaʼteltaytik ja Jyoba ja janekʼ wa xbʼobʼkujtiki. Jitsan wane slejel tuk modo bʼa aʼtel mas. Jujuntik ayiʼoje ja skʼelsate bʼa ochel precursor, jaxa tuki wa skʼanawe oj aʼtijuke bʼa Betel ma koltanel bʼa yajel kʼeʼuk naʼitsik bʼa wa xmakuni bʼa yajelyi stoyjel ja Jyoba. Sok jitsan hermanoʼik wane skʼujolajel bʼa oj kʼotuke skoltuman ansyano ma ansyanoʼik (1 Tim. 3:1, 8). Wani xkʼuʼantik lek ke ja Jyoba jelni lek xyila ja yaʼtijumik bʼa jel puestoʼaye (Sal. 110:3; Is. 6:8).

2. ¿Jastal oj kabʼ oj ajyukotik yajni mi xlajxikujtik jun jkʼelsatik?

² Pe ta ekʼta ja tyempo sok mito xlajxikujtik ja jkʼelsatiki, bʼobʼta elelxa jganatik xkabʼtik. Ma bʼobʼta yaj wa xkabʼtik yuja ayxa jkʼujoltiki ma yuja jastal wala taxtiki bʼa mixa xbʼobʼ jkʼuluktik jujuntik jastik ja bʼa xchonabʼ ja Jyoba (Prov. 13:12). Jani jaw ja jas ekʼ sbʼaj ja Melissa, * bʼa jel skʼulan gusto aʼtel bʼa Betel ma wajel ja bʼa Eskuela bʼa Cholumanik sbʼaja sGobyerno ja Dyosi. Wa xyala: «Mixani ay kiʼoj ja jabʼil bʼa ojto wajkon. Kechta jun wayichal bʼa keʼna ajyelkuj ja cholalik jaw. Ayni ekʼele wa x-el jgana».

3. ¿Jasa bʼobʼta tʼilan oj skʼuluke jujuntik bʼa oj ajukyile jujuntik cholalik?

³ Ay jujuntik mito ay skʼujole sok jel lek aye, pe bʼa oj ajyukyujile mas cholalik, bʼajtan tʼilani oj yijbʼuk ja spensareʼi sok ajyelyujile jujuntik modoʼalik. Bʼobʼta jel listoʼe, puestoʼaye  sok wa xkʼankʼuniyujile skʼulajel chikan jas aʼtel, pe tʼilan oj snebʼe bʼa ajyelyujile mas pasensya, bʼa wa skʼulane lek ja yaʼteleʼi ma wa xkiswaniye. Ta skʼujolane bʼa oj ajyukyujile ja modoʼalik it jel tʼilani, bʼobʼta ojni ajukyile jun cholal ja yajni mi wanuke smajlajeli. La kiltik ja jas ekʼ sbʼaj ja Nick. Yajni ayxa yiʼoj 20 jabʼil jelni och stristeʼil yuja mi ajiyi ja cholal jastal skoltanum ansyano. Wa xjul skʼujol: «Jpensaraʼan ta ay jas wanon skʼulajel bʼa mi lekuk». Pe mini el sgana. Jani waj skʼujol ja bʼa jas wa xbʼobʼ skʼuluk ja bʼa kongregasyon sok ja bʼa xcholjeli. Ja wego kʼotelni june ja bʼa Olomalik bʼa Naʼits Betel.

4. ¿Jasa oj jpaklaytik ja bʼa artikulo it?

⁴ ¿Elel maʼ jganatik yuj mi jtaʼunejtik jun jkʼelsatik? Ta jachkʼa, la kaltikyabʼ ja Jyoba jastal wa xkabʼ ayotik (Sal. 37:5-7). La loʼilanukotik sok hermanoʼik bʼa ayxa yiʼoje mas tyempo bʼa oj yalkabʼtik jasun mas oj bʼobʼ jkʼuluktik sok la jkʼujoluktik bʼa skʼuʼajel ja srasoniki. Ta wa xkʼulantik, bʼobʼta ojni kʼot meran ja jkʼelsatiki. Pe jaxa ta mi mixa xbʼobʼ lajxukujtik ja jkʼelsatik ja wego, jastalni wan ekʼel sbʼaj ja Melissa, ¿jasa oj jkʼuluktik bʼa mi oj chʼaykujtik ja gustoʼil? Bʼa sjakʼjel ja sjobʼjel it, ja artikulo it oj xchol oxe punto. Bʼajtan, jasa oj bʼobʼ yakitik gustoʼil. Xchabʼil, jasa oj jkʼuluktik bʼa oj kabʼtik mas gustoʼil. Sok yoxil, jas jkʼelsatik oj ajyukujtik bʼa mas gusto oj ajyukotik.

5. ¿Jas oj waj jkʼujoltik ta wa xkʼana gusto oj ajyukotik? (Eclesiastés 6:9).

⁵ Ta wa xkʼana gusto oj ajyukotik, tʼilani oj jkʼuluktik ja jas wa xyala ja Eclesiastés 6:9 (kʼuman). Ja kristyano bʼa wa xyabʼ stsamalil «ja jas wa xyila ja jsatiki» gustoni wa x-ajyi soka jas yiʼoji, jastalni soka jastal wa xtaxi. Pe ja kristyano bʼa ekʼum bʼejxta ay ekʼ yijel spatik ja jastik wa skʼana, tolabida wanxta kʼankʼunelyuj ja jas mi xbʼobʼ ajyukyuji. ¿Jasa wa xnebʼatik ja bʼa it? Ta wa xkʼana gusto oj ajyukotik tʼilani oj waj jkʼujoltik ja bʼa jas kiʼojtiki, sok mi jaʼuk ja bʼa jas mi xlajxikujtiki.

6. ¿Jas sjejel oj jpaklaytik sok jasa oj jnebʼtiki?

⁶ Jpetsaniltik wani xkʼanatik skʼulajel probar tuk jastik junuk. Anto, ¿wan maʼ xbʼobʼ ajyukotik gusto soka jas ayxa kiʼojtiki? Waniʼa. Sok wani xbʼobʼ kabʼtik stsamalil ja bʼa jas ayxa kiʼojtiki. ¿Jastal? Bʼa oj jnatik, la jpaklaytik ja sjejel yaʼa ja Jesús sbʼaja talentoʼik sok ti wa xtax bʼa Mateo 25:14-30. Oj jnebʼtik jasa oj jkʼuluktik bʼa ajyel gusto sok ajyel masto gusto ja bʼa jastal wala taxtiki.

7. Cholo bʼa tʼusan yaljel ja sjejel bʼa Jesús sbʼaja talentoʼiki.

⁷ Ja bʼa sjejel yaʼa ja Jesús, yala bʼa jun winik bʼa oj waj bʼa jun biaje. Bʼajtanto oj wajuk, spaya ja smosoʼiki sok yayi talentoʼik cada jujune bʼa oj bʼobʼ yaweyisok negosyo. * Ja jun moso yayi joʼe talento, ja juni chabʼe jaxa juni juneʼita, jani yayi ja janekʼ wa xlajxiyujile. Ja chabʼ mosoʼali jelni snaʼawe yaʼteltajel sok staʼawe mas takʼin sbʼaja yajwaleʼi. Pe ja yoxil mosoʼali mini jas skʼulan soka talento ajiyiʼi, ja yuj nutsjiyuj ja yajwali.

8. ¿Jas yuj wani xbʼobʼ gustoʼaxuk ja bʼajtan moso bʼa sjejeli?

⁸ Bʼobʼta ja bʼajtan mosoʼali yila jun chaʼan cholal yuja ajiyi joʼe talento yuja yajwali. Ja jaw jitsani takʼin sok xchiktes janekʼto wa sjipa skʼujol bʼa yeʼna  ja yajwali. ¿Sok jas wa xbʼobʼ kaltik sbʼaja xchabʼil mosoʼali? Ja it ojni bʼobʼ el sgana ajyi ja yajni mi ajiyi jitsan talento jastal ja juni. Pe ¿jasa skʼulani?

9. ¿Jasa mi yala ja Jesús sbʼaja xchabʼil moso? (Mateo 25:22, 23).

⁹ (Kʼuman ja Mateo 25:22, 23). Ja Jesús mi yala ta tajki ja xchabʼil moso ma tuk yila yuja kechan ajiyi chabʼ talento yuja yajwali. Sok mini kʼan yal ta ja moso yala jastaltik it: «¿Kechan maʼ ja it ja jas oj ajukiʼi? ¡Pe ja keʼn cha jelni listoʼon jastalni ja maʼ ajiyi joʼe talento!, ta ja kajwal mi chaʼanyabʼal xyilawon, mas lek oj jmuk ja chabʼ talento it sok ja oj waj jkʼujol ja jastik bʼa keʼn».

10. ¿Jasa skʼulan ja xchabʼil moso soka stalento ajiyiʼi?

¹⁰ Jastalni skʼulan ja bʼajtan moso, ja xchabʼili cha yilani chaʼanyabʼal ja cholal ajiyiʼi sok jelni tsats aʼtiji sbʼaja yajwali. Yuja jach skʼulani, skʼulan ganar chabʼ talento mas. Yuja sgustoʼili, ja ajwalali stupu yuja janekʼ skʼujolani sok yayi mas cholalik.

11. ¿Jasa oj bʼobʼ jkʼuluktik bʼa oj ajyukotik mas gusto?

¹¹ Jachni junxta, ja keʼntiki wani xcha xbʼobʼ ajyukotik mas gusto ta wa xkʼujolantik ja janekʼ wa xbʼobʼkujtik bʼa chikan jas aʼtel x-ajikitik ja bʼa yaʼteltajel ja Jyoba. Jaʼ xwaj jkʼujoltik ja xcholjeli sok la koltanukotik ja bʼa aʼtelik wa xkʼulaxi ja bʼa kongregasyon (Hech. 18:5; Heb. 10:24, 25). La jchap jbʼajtik lek bʼa stsatsankʼujolajel ja tuk soka jkomentariotik ja bʼa tsomjeliki. La kiltik chaʼanyabʼal ja loʼilik wa xkoʼ jbʼajtik ja bʼa tsomjelal bʼa yoj semana. Ta  wa xkʼanji oj jkʼuluktik jun aʼtel ja bʼa kongregasyon, mok katik ekʼ ora sok ajipjuk jkʼujoltik. Mok jpensaraʼuktik ta jujuntik aʼtel mi jel tʼilanuk sok mini yajnaluk spiljelyi jitsan tyempo. La jkʼujoluktik bʼa stojbʼesel ja kaʼteltiki (Prov. 22:29). Yajni mas latsan wala ajyitik ja bʼa kaʼteltiki sok ja bʼa cholalik kiʼojtik ja bʼa xchonabʼil ja Dyosi, masni wego oj kʼikotik ja bʼa yaʼteltajel ja Dyosi sok mas gusto oj ajyukotik (Gál. 6:4). Sok mas mi wokoluk oj kabʼtik gustoʼaxel yajni ja tuk x-ajiyile cholalik bʼa wa xkʼulantik gusto oj ajukitik ajyi (Rom. 12:15; Gál. 5:26).

12. ¿Jasa skʼulan ja Melissa sok ja Nick bʼa mas gusto oj ajyuke?

¹² ¿Wanto maʼ xjul jkʼujoltik ja Melissa, ja hermana jtaʼatik tiʼal ja bʼa parrapo 2 ja it wa skʼana oj wajuk bʼa Betel ma oj wajuk ja bʼa Eskuela bʼa Cholumanik sbʼaja sGobyerno ja Dyosi? Ama ja kʼelsatik it mixani xbʼobʼ ajyukyuj, ja yeʼn wa xyala: «Wani xkʼulan ja janekʼ wa xbʼobʼkuj ja bʼa aʼtel bʼa precursor sok wani xkʼujolan koltanel ja bʼa tuktukil modo bʼa xcholjeli. Sok jelni yaʼunej gustoʼaxukon». Jaxa Nick, ja it jtaʼatik tiʼal ja bʼa parrapo 3, ¿jasa skʼulan bʼa jachuk mi oj el sgana ja yajni mi aji ochuk jastal skoltuman ansyano? Ja yeʼn wa xjul skʼujol: «Jani waj jkʼujol ja bʼa jas wa xbʼobʼ jkʼuluki: elel ja bʼa xcholjel sok yajel jkomentarioʼik bʼa wa stsatsankʼujolani ja bʼa tsomjeliki. Cha jbʼutʼu ja jsolicitud bʼa betel, sok kechan ekʼ jun jabʼil ja yajni tixa lokjiyoni».

13. ¿Jasa oj ekʼuk ta wa xkʼujolantik ja janekʼ wa xbʼobʼkujtik ja bʼa cholalik kiʼojtik ja wego? (Eclesiastés 2:24).

¹³ Anto, ¿wan maʼ xkʼan yal ke oj ajukitik mas cholalik ja bʼa tyempo jakum ta jkʼujolantik ja bʼa cholalik kiʼojtik ja wego? Bʼobʼta ojniʼa, jastalni ekʼ sbʼaj ja Nick. Pe ta miyuk, jastalni ekʼ sbʼaj ja Melissa, gustoni oj ajyukotik sok mini jas oj skʼulkitik palta (kʼuman ja Eclesiastés 2:24). Chomajkil, sen jelni gusto oj ajyukotik yujni wa xnaʼatik ke ja janekʼ wa xkʼujolantik lekni wa xyila ja kajwaltiki, ja Jesukristo.

14. ¿Jasa tʼilan oj jul jkʼujoltik ja bʼa jkʼelsatik bʼa yaʼteltajel ja Dyosi?

¹⁴ Ta wantikxa skʼulajel ja janekʼ wa xbʼobʼkujtik ja bʼa yaʼteltajel ja Jyoba, ¿wan maʼ stojolan ke mixa oj jpensaraʼuktik skʼulajel mas? Miniʼa. Wani xbʼobʼkujtik sok tʼilani oj katik ajyuk jkʼelsatik bʼa oj skoltayotik kʼotel lekil cholumanik sok jeʼumanik, sok bʼa oj yakan oj koltaytik ja kermanotiki. Ojni lajxukujtik ta biboʼotik sok wa xnaʼatik ja janekʼ wa xlajxikujtiki, sok jani oj waj jkʼujoltik skoltajel ja tuk sok mi bʼa keʼnuktik oj waj jkʼujoltik (Prov. 11:2; Hech. 20:35).

15. ¿Jas jujuntik kʼelsat oj ya ajyukotik mas gusto?

¹⁵ ¿Jas jkʼelsatik oj bʼobʼ ajyukujtik? La jkʼantikyi ja Jyoba bʼa a-skoltayotik bʼa mi oj jelxukotik spensarajel sok yiljel ja jas wa xbʼobʼ jkʼuluktik ja bʼa jastal wala taxtiki (Prov. 16:3; Sant. 1:5). ¿Wan maʼ xbʼobʼ ajyukujtik jujuntik ja kʼelsat tax tiʼal ja bʼa  bʼajtan parrapo ja bʼa artikulo it, jastal ochel precursor auxiliar ma regular, wajel bʼa Betel ma koltanel yajel kʼeʼuk naʼitsik? ¿Wan maʼ xbʼobʼ jnebʼtik pilan kʼumal bʼa oj jcholtik yabʼ mas kristyanoʼik ma wajel bʼa jun lugar bʼa wa xkʼanxi mas koltanel? Ta wa xkʼana oj jnatik mas sbʼaja kʼelsatik it, ojni bʼobʼ jkʼumuktik ja kapitulo 10 bʼa libro Organizados para hacer la voluntad de Jehová sok loʼilanel soka  ansyanoʼik bʼa jkongregasyontiki. * Yajni wantik skʼujolajel bʼa stajel ja kʼelsatik it, gustoni oj ajyukotik jaxa tuki oj yile ja jastal wantik kʼiʼel ja bʼa yaʼteltajel ja Jyoba.

16. ¿Jasa oj bʼobʼ jkʼuluktik ta ja wego mi xbʼobʼ jtatik jun jkʼelsatik?

¹⁶ ¿Jaxa ta ja wego mi xlajxikujtik stajel jujuntik ja jkʼelsatik jtaʼunejtik tiʼali? La katik ajyuk jun jkʼelsatik bʼa mi jel wokoluk bʼa ojni lajxukujtik. La jpensaraʼuktik ja bʼa kʼelsatik it.

17. Jastalni wa xyala ja 1 Timoteo 4:13, 15, ¿jastik oj skʼuluk jun hermano bʼa oj kʼotuk jun lekil jeʼuman?

¹⁷ (Kʼuman ja 1 Timoteo 4:13, 15). Ta ja weʼn jun hermano awiʼonejxa jaʼ, ojni akʼujoluk bʼa stojbʼesel ja jastal waxa wa ekʼuk jawa loʼili sok ja jastal waxa jeʼa. ¿Jas yuj? Yujni ta jaʼ wa xwaja kʼujol ja bʼa skʼumajel, ja bʼa yajel ekʼ lek jawa loʼil sok bʼa sjejel, jelni oj koltajuk ja maʼ wa smaklaya. Aʼajyuk wa kʼelsat bʼa spaklajel sok yajel makunuk ja bʼa yolomajelik wa xcholo ja poyeto Kʼotan jun lekil kʼumuman juʼun sok jeʼuman. Ila jujune ja spaklajeliki, nebʼa lek ja bʼa wa naji sok kʼujolan oja wa makunuk ja bʼa wa loʼil ja jas anebʼuneji. Kʼanayi akoltajel ja akʼa rason * ma tuk ansyanoʼik bʼa «jel tsats wa x-aʼtijiye bʼa yaljel ja yabʼal ja Dyosi sok sjejel» (1 Tim. 5:17, TNM). Mok kechan wajuka kʼujol skʼulajel ja jas wa xyala ja bʼa spaklajel ja poyeto, cha jachni bʼa skoltajel ja matik wa smaklaya bʼa oj tsatsbʼuk ja skʼuʼajel yiʼoje sok yajel makunuk bʼa sakʼanile ja jas wa snebʼawe.  Ja it oj skoltaya bʼa mas gusto oj ajyan, sok cha jachni ja matik wa smaklaya.

18. ¿Jasa oj skoltayotik bʼa lajxelkujtik ja jkʼelsatik ja bʼa xcholjeli?

¹⁸ Jpetsaniltik ja snochumanotik ja Kristo ayni kiʼojtik ja cholal bʼa xcholjel sok yajel och nebʼumanik (Mat. 28:19, 20; Rom. 10:14). ¿Wan maʼ xkʼanatik oj katik tojbʼuk ja jastal wa xkʼulantik ja aʼtel it jel tʼilani? Ta wankʼa, wani xbʼobʼ jpaklaytik ja poyeto Kʼumuman sok jeʼuman sok ajyelkujtik jkʼelsatik bʼa oj skoltayotik yajel makunuk ja jas wantik snebʼjeli. Cha ojni bʼobʼ jtatik jkoltajeltik ja bʼa Juʼun bʼa spaklajel sbʼaja tsomjelal Ja Sakʼaniltik soka Kaʼteltik bʼa Dyos sok ja bʼa bideoʼik bʼa sjejel jastal loʼilanel ja bʼa tsomjelal bʼa yoj semana. La jkʼultik probar tuktukil modo bʼa oj kiltik bʼaya mas wa skoltayotik ja bʼa yoj jterritoriotiki. Ta jnochotik ja tojelalik it, cha ojni kabʼtik ja gustoʼil bʼa kʼotel lekil jeʼumanik (2 Tim. 4:5).

19. ¿Jasa oj skoltayotik bʼa oj ajyukujtik modoʼalik bʼa snochumanik Kristo?

¹⁹ Mok chʼay jkʼujoltik ke june ja jkʼelsatik mas tʼilani jani ja ajyelkujtik modoʼalik bʼa snochumanik Kristo (Gál. 5:22, 23; Col. 3:12; 2 Ped. 1:5-8). ¿Jastal oj lajxukujtik? Kechan la jpensaraʼuktik ke wanbʼi xkʼanatik oj ajyukujtik skʼuʼajel mas tsats. Wani xbʼobʼ jkʼumuktik ja bʼa juʼuntik bʼa wa xyala sbʼaja yolomajel jaw. Cha wani xbʼobʼ skoltayotik yiljel komik bideoʼik bʼa JW Broadcasting^® bʼa wa staʼa tiʼal bʼa hermanoʼik sok hermanaʼik ajyiyujile jun yijil skʼuʼajel bʼa tyempoʼik jel wokol. Tsaʼan, la jpensaraʼuktik jastal oj bʼobʼ ajyukujtik jun skʼuʼajel jastal bʼa yeʼnle.

20. ¿Jasa wa xbʼobʼ jkʼuluktik bʼa masni gusto oj ajyukotik sok mi oj el jganatik?

²⁰ Sen wani xkʼulantik gusto skʼulajel mas sbʼaja Jyoba ke yuja janekʼ wa xkʼulantik ja wego. Ja bʼa yajkʼachil luʼum skʼapunej ja Dyosi ojni bʼobʼ kaʼteltaytik tsʼikan lek. Malan xkʼot ja kʼakʼu jaw, ta wa xkatik el slekilal ja yajni wa xbʼobʼi, masni gusto oj ajyukotik sok mi oj el jganatik. Sok ja mas tʼilani, oj katikyi stoyjel sok stsʼebʼantajel ja Jyoba, ja ‹jDyostik maʼ jel gustoʼayi› (1 Tim. 1:11, TNM). Ja yujil, gusto la ajyukotik yuja jas wa xbʼobʼ jkʼuluktik yuja Jyoba.