Ja Jyoba yalayabʼ ja israʼelenyoʼik ke tʼilani oj ajyuke sak jastal chonabʼ. Bʼa skoltajele bʼa oj lajxukyujile, yayile ja mandar it: «Mok abʼaltanan ekʼ ja bʼa wa chonabʼi. Mok ocha wil kontra ja sakʼanil jawa moji. Keʼnon ja Jyoba» (Lev. 19:2, 16).

Ja yaljel «ochel yiljel kontra» wani xchiktes lek ja jas wa xkʼan yal ja mero yaljel bʼa hebreo. Pe ¿jas wa stojolan? Jun komentaryo judío sbʼaja libro bʼa Levítico wa xcholo: «Ja parte it bʼa bersikulo mini pasiluk yaljel jas wa stojolan yujni wokol yaljel jas mero wa stojolan ja yaljel bʼa hebreo, pe ja yaljel it bʼa hebreo wa stojolan ‹mi ajyel tekʼan bʼa stsʼeʼel ma mojan›».

Jujuntik matik jel chapan wa spensarane ke ja yaljel jaw jani syakulabʼil soka bʼajtan bersikulo, bʼa wa xyala: «Mokni akʼulukex ja bʼa mi stojoluk ja bʼa tojwaneli. Mokni awil bʼa jun modo mi lekuk ja pobre sok mok jata lek awil ja maʼ riko. Sok stojolil oja toj jawa moji» (Lev. 19:15). Lekbʼi meranuk ja jas wa xyalawe, ja mandar ja bʼa bersikulo 16 bʼa ochel kontra sok june ojni bʼobʼ stojoluk ke ja israʼelenyoʼik mini oj skʼuluke ja bʼa mi stojoluk ja bʼa tojwaneli, ja bʼa negosyoʼiki ma ja bʼa pamilya. Sok mini oj och skʼabʼe bʼa kechan yeʼnle oj yile slekilal. Meraniʼa, mini oj jkʼuluktik ja jastik jaw, pe ayni jun modo mas stojolil bʼa yabʼjel stojol ja yaljel jaw ja bʼa bersikulo 16.

La kiltik ja bʼajtan parte ja bʼa bersikulo jaw. Ja Dyos wa xyalayabʼ ja israʼelenyoʼik bʼa mok abʼaltanuke ekʼe. La kaʼ jul jkʼujoltik ke ja abʼaltanel mini junukxta soka yaljel ekʼ jun loʼil, ama ja it cha wani xbʼobʼ ya wokolik (Prov. 10:19; Ecl. 10:12-14; 1 Tim. 5:11-15; Sant. 3:6). Bʼa tʼusan mi spetsaniluk, ja abʼaltaneli ganani wa xkʼulaxi bʼa kechan sjomjel ja jastal wa xnaji sbʼaj june. Ja maʼ wa x-abʼaltani, bʼobʼta wani xyala jun jasunuk mi meranuk sbʼaja pilan kristyano ama ja jaw xiwela sbʼaj xya ajyuk ja sakʼanili. Jani jaw ja jas ekʼ sbʼaj ja Nabot. Jujuntik winike yalawe jun jasunuk mi meranuk bʼa yeʼna, sok yuja abʼalik yalawe, chʼojubʼal ton milji ama mini ayuk smul (1 Rey. 21:8-13). Ja yuj, jastalni wa xyala ja xchabʼil parte bʼa Levítico 19:16, june maʼ wa x-abʼaltani ojni bʼobʼ ochuk kontra soka sakʼanil jun kristyano.

Chomajkil, bʼobʼta jun kristyano wani xyabʼaltay ja jun yuja wa xyilkʼujolan. Ja bʼa 1 Juan 3:15 wa xyala: «Yibʼanal ja maʼ wa xyilkʼujolan ja yermano kʼotelni jun milwanum, sok jaxa weʼnlexi wani xa naʼawex ke mini jun milwanum oj ajukyi sakʼanil bʼa tolabida». Jelni chaʼanyabʼalil ke tsaʼan yajni yaʼa ja mandar ja bʼa Levítico 19:16, ja Dyos yala: «Moka wilkʼujoluk jawa wermano ja bʼa wa kʼujoli» (Lev. 19:17).

Ja yujil, ja mandar jel chaʼanyabʼal bʼa Levítico 19:16 wani x-aji jul skʼujole jun jasunuk jel tʼilan ja snochumanik ja Kristo. Tʼilani mi oj kistik ja pensarik mi lekuki sok nunka mok abʼaltanukotik. Ta ay maʼ och kiltik kontra, wa xkʼan kaltik, ta wa xkabʼaltaytik yuja mi lek xkilatiki ma yuja ay kiʼojtikyi imbidia, ja it ojni xchiktes ke yuj wa xkilkʼujolantik. Sok mini xbʼobʼ ajyuk ilkʼujol ja bʼa sakʼanil jun snochuman Kristo (Mat. 12:36, 37).