▪ Miyuk. Ja jas tsʼijbʼan ja David mini jelxi sok stojolni.

Pensaraʼan ja jas stsʼijbʼan ja bʼa bersikulo jaw sok bʼa tuk oj slajtik. Yala: «Oj tsʼebʼantay sok tsʼebʼoj jawa bʼiʼil bʼa tolabida malan wanon stupjel kada kʼakʼu ja jas jkʼapuneji», «Wa xtoyowa sok spetsanil ja jkʼujoli, ah, Jyoba kala Dyos, sok oj ka niwanbʼuk jawa bʼiʼil bʼa tolabida» sok «Oj toy jawa bʼiʼil bʼa tolabida» (Sal. 61:8; 86:12; 145:1, 2).

Ja jas yala ja David mini jelxeluk. Ja yeʼn wani snaʼa oj kʼotuk ja skʼakʼujil oj chamuk, yujni soka mulal wala chamtik. Sok ja David wani snaʼa ke juni mulanum (Gén. 3:3, 17-19; Sal. 51:4, 5). Wani snaʼa ke asta ja matik lek wa x-iljiye yuja Jyoba jastal ja Abrahán, ja Isaac soka Jacob, chamyeni. Cha wani snaʼa ke ojni chʼakuk ja sakʼanili (Sal. 37:25; 39:4). Pe ja yaljelik bʼa Salmo 61:8 wani sjeʼa ke stsaʼunejni oj stoy ja Dyos bʼa tolabida, wa xkʼan alxuk, yajni sakʼanto ayi (2 Sam. 7:12).

Ay ekʼele ja David stsʼijbʼan sbʼaja sakʼanili, jastalni wa xbʼobʼ kiltik ja bʼa yolomajelik ja bʼa Salmos 18, 51 sok 52. Ja bʼa Salmo 23, wani xchiktes ja Jyoba jastal jun talna chej bʼa wa xtojwani, wa xya likikuk sok wa stalnay ja xchejiki. Ja David jachni stalnay ja yal xchejiki, sok ja yuj skʼana oj yaʼteltay ja Jyoba snajtil ja sakʼanili (Sal. 23:6).

Cha la juljkʼujoltik ke ja jas stsʼijbʼan ja David jani aji ekʼyi yuja Dyosi. Jujuntik ja bʼa jas stsʼijbʼani jani ja jastik ojto ekʼuk ja bʼa tyempo jakum. Jun sjejel, ja bʼa Salmo 110, ja David yala ke oj kʼotuk ja skʼakʼujil ke ja Yajwali oj kulanuk «ja bʼa stojol skʼabʼ ja Dyos» ja bʼa satkʼinal sok jel oj ajukyi jitsan ipal. Soka yip it, ojni skʼul ganar ja skontraʼik ja Dyosi sok «oj skʼul jusgar ja chonabʼiki». Ja David wajni june ja maʼ ekʼpaxtayuj ja Mesías, bʼa yeʼnani oj ya mandar man satkʼinal sok oj kʼot «sacerdote bʼa tolabida» (Sal. 110:1-6). Ja Jesús yala ke ja jas alubʼalkan ja bʼa Salmo 110 yeʼnani wan kʼotel sbʼaj sok ojni kʼot smeranil ja bʼa tyempo jakumi (Mat. 22:41-45).

Jastalni kilunejtik, ja Jyoba stojo ja David bʼa oj stsʼijbʼuk jastik bʼa ajyi chʼikan soka tyempo ajyi sakʼani sok bʼa jastik oj ekʼuk ja bʼa tyempo jakum yajni sakʼwi sok bʼa oj bʼobʼ yayi stoyjel ja Jyoba bʼa tolabida. Sok ¿jastal wa skoltayotik yabʼjel stojol ja it ja bʼa Salmo 37:10, 11, 29? Ja bersikuloʼik it wani xcholo jastal ajyi ja sakʼanil ja bʼa poko chonabʼ Israel sok jastal oj kabʼtik stsamalil yajni ja Dyos xya kʼot smeranil ja jastik skʼapunej ja bʼa tyempo jakum bʼa yibʼanal ja luʼumkʼinal (kʼela ja bʼa rebista it ja parrapo 8 ja bʼa artikulo «Ti oj ajyan jmok ja bʼa tsamal lugari»).

Ja yujil, ja Salmo 61:8 sok tuk bersikuloʼik oj slajtik, wani skoltayotik yiljel ke ja David wani skʼana oj stoy ja Jyoba ja bʼa poko chonabʼ Israel yajni sakʼantoʼi. Sok bʼa jun modo mi jelxeluk wani sjeʼakitik ja jas oj skʼuluk ja bʼa tyempo jakum yajni ja Jyoba xya kumxukyi ja sakʼanili.