JA Museo de las Tierras de la Biblia, ja bʼa Jerusalén, ay jun ton tsʼijbʼunubʼal bʼa wa sjeʼa tsʼijbʼaji bʼa jabʼil 700 sok 600 bʼajtanto yuja jtyempotiki. Ja toni tini taji kʼot bʼa jun kʼeʼen bʼa wa xyawe makunuk jastal jun lugar bʼa wa xmukji ja chamwiniki, bʼa mini jel najatuk yiʼoj ja chonabʼ bʼa Hebrón (Israel). Ja jas tsʼijbʼunubʼal wa xyala: «Atajuk tiʼal malo ja Hagaf yunin ja Hagav yuja Yahweh Sabaot». Ja jas tsʼijbʼunubʼal it wa skoltay ja jas wa xyala ja Biblia, yujni wa sjeʼa ja sbʼiʼil ja Dyos, ja Jyoba ma Yahweh, tsʼijbʼunubʼal ja bʼa poko hebreo soka letraʼik YHWH, bʼa jelni naʼubʼal sbʼaj ja bʼa najate sok ja kristyanoʼik wani xyawe makunuk ja bʼa sakʼanile. Pes cha staʼunejeni tuk stsʼijbʼajelik bʼa kʼeʼenik bʼa wa smukuwe chamwinik, bʼa tikʼanxtani, ja matik wa xyawe makunuk ja kʼeʼenik it jastal lugarik bʼa tsomjelal ma bʼa snakʼjel sbʼaje, wani stsʼijbʼane ja sbʼiʼil ja Dyos sok cha tuk bʼiʼilalik bʼa tini eleljan ja bʼa sbʼiʼil ja Dyosi.

Ja Rachel Nabulsi, paklanum bʼa yechalil ja kʼumal ja bʼa universidad bʼa Georgia, yala sbʼaja jastik tsʼijbʼunubʼal it: «Ja yajel makunuk tikʼan ja bʼiʼilal YHWH tʼilani [...]. Ja jastik tsʼijbʼunubʼal ja bʼa [Biblia] soka jastik tsʼijbʼunubʼali wani sjeʼa ja janekʼto stʼilanil wa yilawe ja kristyanoʼik bʼa Israel sok Judá ja YHWH». Ja it wani skoltay ja jas wa xyala ja Biblia, ja bʼa sbʼiʼil ja Dyos bʼa wa staʼa tiʼal mil ekʼeleʼik tsʼijbʼunubʼal soka letraʼik bʼa hebreo ja YHWH. Jitsan sbʼiʼilik ja kristyano tini wa xyawe eluk ja bʼa sbʼiʼil ja Dyosi.

Ja yaljelik Yahweh Sabaot, tsʼijbʼunubʼal ja bʼa ton alxi ja bʼajtanto, wa stojolan «Jyoba bʼa kʼakʼanumik». Ja it lajansok wani xchiktes ja sbʼiʼil ja Dyos cha jastalni ja yaljel ja «Jyoba bʼa kʼakʼanumik» kʼajyelni wa xyawe makunuk ja bʼa najate. Cha wani skoltay ja wa xya makunuk ja bʼa Biblia ja yaljel «Jyoba bʼa kʼakʼanumik», bʼa wa xtax mas ja 250 ekʼele ja bʼa Juʼunik Tsʼijbʼunubʼal bʼa hebreo, bʼa masni jitsan wa xtax ja bʼa libro bʼa Isaías, Jeremías sok Zacarías.