1, 2. a) ¿Jas tyempo mas wa xjul jkʼujoltik june maʼ chamelkujtik? b) ¿Jasa ya kujlajuk ja Jesús ja akwal bʼajtanto oj chamuki?

YAJNI ay maʼ wa xchamkujtik, ama x-ekʼ jitsan tyempo, tolabida wa xjul jkʼujoltik. Mastoni wa xjul jkʼujoltik bʼa yeʼna ja yajni wa staʼa ja tyempo chami.

² Kada jabʼil, jitsan miyon kristyano bʼa sutanal ja luʼumi, wa stsomo jbʼajtik bʼa skʼintajel ja xchamelal june maʼ jel xkʼanatik: ja Jesukristo (1 Ped. 1:8). Wa xkʼulantik bʼa yajel juljkʼujoltik ja maʼ yaʼa ja sakʼanil bʼa oj ya elkotik libre ja bʼa mulal soka chamelal (Mat. 20:28). Ja Jesús wani skʼana ke ja snebʼumanik oj julskʼujole ja xchamelali. Ja akwal bʼajtanto oj chamuk, ya kujlajuk jun cena jel chaʼanyabʼal sok yaʼa ja mandar it: «Nochowik skʼulajel ja it bʼa oj juluka kʼujolex bʼa keʼna» (Luc. 22:19). *

3. ¿Jasa oj kiltik ja bʼa artikulo?

³ Ja bʼa miyonik kristyano wa x-ochye ja bʼa Conmemoración bʼa xchamelal ja Kristo, kechani jun yal tsome wane smajlajel oj wajuke bʼa satkʼinal, pe tʼusan mi spetsaniluk tini wane smajlajel ajyel bʼa Luʼum. Ja bʼa artikulo it, oj kiltik jas yuj ja chabʼ grupo it wa skʼana oj wajuke kada jabʼil ja bʼa Conmemoración. Cha ojni kiltik jas yuj wa xkatik el slekilal ja oj ochkotiki. La kʼe kiltik jujuntik rason jas yuj wa xwajye ja matik oj wajuke bʼa satkʼinal.

4. ¿Jas yuj ja matik oj wajuke bʼa satkʼinal wa xyabʼye ja pan sok wa xyuʼaje ja vino bʼa Conmemoración?

⁴ Jun rason yuja kada jabʼil wa skʼana oj wajuke ja bʼa Conmemoración ja matik oj wajuk bʼa satkʼinal jani bʼa oj yabʼye ja pan sok oj yuʼe ja vino. ¿Jas yuj wa xbʼobʼ skʼuluke? Bʼa snajel ja sjakʼjeli, la ka jul jkʼujoltik ja jas skʼulan ja Jesús ja tsaʼanxta akwal ajyi sakʼan ja bʼa Luʼumi. Tsaʼan yajni skʼulan ja Pascua, ja Jesús ya kujlajuk ja jas kʼotel najuk sbʼaj jastal ja Cena ja Kajwaltiki. Yayi ekʼuk ja pan soka vino ja 11 sjekabʼanumik toji sok yala yabʼye ayuʼe sok ayabʼye. Staʼayile tiʼal chabʼ akuerdo: ja yajkʼachil trato sok ja trato bʼa sGobyerno ja Dyos (Luc. 22:19, 20, 28-30). * ja tratoʼik it yaʼakan ke ja jekabʼanumik jaw sok ja tuk snochumanik Kristo bʼa tsaʼubʼale oj kʼotuke reyik sok sacerdoteʼik bʼa satkʼinal (Apoc. 5:10; 14:1). Jaxa janekʼto kanel ja bʼa matik tsaʼubʼaleʼi * tini chʼikane ja bʼa chabʼ trato it, sok ja yuj kechan yeʼnle wa xbʼobʼ yabʼye ja pan sok wa xyuʼaje ja vino bʼa Conmemoración.

5. ¿Jasa wa snaʼawe ja matik tsaʼubʼale oj wajuke bʼa satkʼinal sbʼaja smajlajel yiʼoje?

⁵ Pilan rason yuja wa skʼana oj wajuke bʼa Conmemoración ja matik tsaʼubʼale oj wajuke bʼa satkʼinal jani yuja wa x-ajyiyujile ja cholal bʼa spensarajel ja smajlajel yiʼoje. Akʼubʼalyile yuja Jyoba jun smajlajel chaʼanyabʼal: yabʼjel stsamalil jun sakʼanil bʼa mi xbʼobʼ chʼakuk sok mi xjom ja bʼa satkʼinal, aʼtel lajan soka Jesukristo sok ja tuk ja bʼa 144.000, pe ja masto jel tʼilani, bʼa stiʼ sat ja Jyoba (1 Cor. 15:51-53; 1 Juan 3:2). Ja matik tsaʼubʼali wani snaʼawe ke akʼubʼalyile ja lokjelal bʼa yabʼjel stsamalil ja cholal it. Pe bʼa oj bʼobʼ ochuke ja bʼa satkʼinal tʼilani toj oj ajyuke man xchamye (2 Tim. 4:7, 8). Jelni gusto x-ajyiye yajni wa spensarane ja smajlajel yiʼoje (Tito 2:13). Sok ¿jas wa xbʼobʼ kaltik sbʼaja «pilan chejik»? (Juan 10:16). ¿Jas yuj wa xwajye ja bʼa Conmemoración? La kiltik jujuntik rason.

6. ¿Jas yuj wa xwajye kada jabʼil ja bʼa Conmemoración ja pilan chejiki?

⁶ Pilan rason yuja wa xwajye ja pilan chejik ja bʼa Conmemoración jani bʼa oj skʼele, pe mi bʼa oj yabʼye ja pan soka vino. Ja sbʼajtanil ekʼele lokjiye ja matik ayiʼoje ja smajlajel ajyel sakʼan bʼa Luʼum waj bʼa 1938. Ja rebista bʼa abril bʼa 1938 bʼa La Torre del Vigía yala ke «stojolni lek sok sbʼejni» ke ja pilan chejik «ti oj ajyuke ja bʼa reunión jaw sok ayil-e ja jas wa xkʼulaxi». Sok cha yala: «Tʼilani sok styempoʼilni bʼa gusto oj cha ajyuke ja yeʼnleʼi». Jastalni ja matik lokubʼale bʼa jun boda gustoxta wa xwajye bʼa yiljel, ja pilan chejiki gustoxtani wa xwajye bʼa yiljel jastal wa xkʼintaxi ja Conmemoración.

7. ¿Jas yuj wa skʼana oj smaklaye ja loʼil bʼa Conmemoración ja pilan chejiki?

⁷ Ja pilan chejiki cha wani spensarane ja smajlajel yiʼoje. Wani skʼana oj smaklaye ja loʼil bʼa Conmemoración, pes jun parte lek jani wa staʼa tiʼal ja jas oj skʼuluke sbʼaja kristyanoʼik ja Kristo soka 144.000 ja bʼa Mandaranel bʼa Mil Jabʼili. Soka stojelal ja  sReye, ja Jesukristo, ja mandaranumik it bʼa satkʼinali oj koltanuke yajel paxuk ja Luʼum bʼa jun tsamal lugar sok yibʼanal ja matik kʼuʼabʼale oj cha kʼot ajyuke toj. Jelni tsamal sbʼaja jitsan miyon wa xwajye bʼa Conmemoración spensarajel ja yajni oj chʼak kʼot smeranil ja yaljelik jastal bʼa Isaías 35:5, 6; 65:21-23 sok Apocalipsis 21:3, 4. Yiljel lajansok tixa aye bʼa yajkʼachil luʼum soka matik chamelyujile, wa stsatsbʼi ja smajlajel yiʼoje sok ja puesto ajyel bʼa yaʼteltajel ja Jyoba (Mat. 24:13; Gál. 6:9).

8. ¿Jas tuk rason yuja wa xwajye ja bʼa Conmemoración ja pilan chejiki?

⁸ Ja pilan chejiki cha wani xwajye ja bʼa Conmemoración yujni wa skʼana oj sjeʼe yajalkʼujol sok skoltajel ja matik oj wajuke bʼa satkʼinal. Ja Yabʼal ja Dyos yalunejxa ke ja matik oj wajuke bʼa satkʼinal sok ja matik ti oj ajyuke bʼa Luʼum tsomani lek oj ajyuke. La kiltik jujuntik jas alubʼalkan bʼa jachni wa xchiktes.

9. Jastalni yalunejxa oj ekʼuk ja Zacarías 8:23, ¿jastal wa xyabʼye ja pilan chejik sbʼaja matik oj wajuke bʼa satkʼinal?

⁹ (Kʼuman ja Zacarías 8:23). Sok jun tsamal sjejel, ja jas alubʼalkan it wa xchiktes ja jastal wa xyabʼye ja pilan chejik sbʼaja yermanoʼik sok yermanaʼik oj wajuke bʼa satkʼinal. Ja yaljelik ‹jun judío› sok ‹amokex› jani wan yaljel bʼa junxta kʼole: ja janekʼto kanel ja bʼa matik tsaʼubʼale (Rom. 2:28, 29). Ja «lajune winik bʼa spetsanil ja kʼumalik bʼa chonabʼik» jani wa senyaʼan ja pilan kʼole chejiki. Wa syamawe tsats lek ja matik oj wajuke bʼa satkʼinal, wa xkʼan kaltik, kʼuʼabʼal wa x-ajyiye soka yeʼnle, sok lajan wa stoyowe ja Jyoba bʼa jun modo toj. Ja yujil, ja bʼa akwal bʼa Conmemoración, ja pilan chejiki wani sjeʼawe jastal tsoman lek aye soka matik tsaʼubʼale oj wajuke bʼa satkʼinal smojtajele ja bʼa ekʼele jaw.

10. ¿Jasa skʼulunej ja Jyoba bʼa oj kʼot smeranil ja jas wa xyala ja Ezequiel 37:15-19, 24, 25?

¹⁰ (Kʼuman ja Ezequiel 37:15-19, 24, 25). Ja Jyoba yaʼunej kʼot smeranil ja yaljelik it yajni wa xyaʼakan ke ja matik tsaʼubʼal oj aʼtijuke lajan soka pilan chejiki. Ja jas tsʼijbʼunubʼalkani wa staʼa tiʼal bʼa chabʼ yal teʼik. Ja matik ayiʼoje ja smajlajel bʼa ajyel sakʼan bʼa satkʼinal jachuke jastal ja yal teʼ «sbʼaja Judá» (Ja kʼole bʼa ti wa stsaji ja reyik bʼa Israel). Sok ja matik wa smajlaye ajyel sakʼan bʼa Luʼum jachuke jastal ja yal steʼ «ja Efraín». * Ja Jyoba ojni stsom xchabʼil grupo bʼa jachuk «jun ita yal teʼ oj kanuk». Ja it wa stojolan ke lajan oj aʼtijuke soka único sReyeʼi, ja Kristo Jesús. Kada jabʼil, ja matik tsaʼubʼale sok ja tuk chejiki wani xwajye ja bʼa Conmemoración, pe mi jastal chabʼ kʼoleʼuk, jachni jastal «jun ita nole sok jun ita stalnanume» (Juan 10:16).

11. ¿Jastal wa skoltaye ja yermanoʼik ja Kristo ja «chejik» wa staʼa tiʼal ja Mateo 25:31-36, 40?

¹¹ (Kʼuman ja Mateo 25:31-36, 40). Ja «chejik» wa staʼa tiʼal ja bʼa sjejel it jani wa senyaʼan ja kristyanoʼik bʼa toj aye bʼa xchʼakulabʼil ja tyempo sok ayiʼoje ja smajlajel bʼa ajyel sakʼan bʼa Luʼum, wa xkʼan kaltik, ja pilan chejiki. Bʼa jun modo toj, wa skoltaye ja janekʼto wa xkan ja bʼa yermanoʼik tsaʼubʼal ja Kristo sok mastoni wane koltanel sbʼaja niwan cholal yiʼoje: ja aʼtel bʼa xcholjel sok sjejel bʼa sutanal ja luʼumi (Mat. 24:14; 28:19, 20).

12, 13. ¿Jas tuk modo wa skoltaye ja pilan chejik ja yermanoʼik ja Kristo?

 ¹² Kada jabʼil, semanaʼik bʼajtanto ja bʼa Conmemoración, ja pilan chejiki wani sjeʼa wa skoltaye ja yermanoʼik ja Kristo. ¿Jastal? Jani kongana koltanel ja bʼa campaña wa xkʼulaxi bʼa sutanal ja luʼumi bʼa slokjel ja kristyanoʼik bʼa wa skʼana oj snebʼe (kʼela ja recuadro « ¿Wanaxa maʼ spensarajel jas oja kʼuluk ja bʼa styempoʼil ja Conmemoración?»). Bʼa sutanal ja luʼumi, wani xkʼulaxi ja jastik tʼilan bʼa oj kʼulaxuk ja Conmemoración ama ja bʼa kongregasyon mey matik tsaʼubʼal oj wajuk bʼa satkʼinal. Ja pilan chejiki jelni gusto xyabʼye skoltajel jastal jaw ja yermanoʼik ja Kristo. Wani snaʼawe ke ja jastik wa skʼulane sbʼaja matik oj wajuk bʼa satkʼinal, ja Jesús wa xyila lajansok yeʼn wan kʼulajelyi (Mat. 25:37-40).

¹³ Chikan jastal ja smajlajel kiʼojtik, ¿jas rasonik kiʼojtik kibʼanaltik bʼa wajel ja bʼa Conmemoración?

14. ¿Jastal sjeʼunej ja Jyoba soka Jesús ja janekʼto wa syajtayotiki?

¹⁴Yujni wa xkaʼatik tsʼakatal yuja syajal skʼujol ja Jyoba sok ja Jesús. Ja Jyoba sjeʼunejkitik ja syajal skʼujol bʼa jitsan modo. Pe ja mas ekʼxeli jani yuja sjekakon ja Yunin bʼa oj yi wokol sok oj chamuk yuj keʼntik (Juan 3:16). Ja Jesús cha sjeʼanikitik ja syajal skʼujol yajni puesto ajyi bʼa yajel ja sakʼanili (Juan 15:13). Ama mini xbʼobʼ jtuptikyile spetsanil ja jas skʼuluneje yuj yajalkʼujol, pe wani xbʼobʼ jetik wa xkaʼatik tsʼakatal yuja jastal wa xkiʼa ja jsakʼaniltiki (Col. 3:15). Yajni wala wajtik ja bʼa Conmemoración, wa xkatikyi tsʼakatal yuja syajal skʼujole sok wa xjeʼatik wa xyajtaytike.

15. ¿Jas yuj jel xyaʼawe tsʼakatal yuja majtanal bʼa koltanel ja matik tsaʼubʼal oj wajuk bʼa satkʼinal soka pilan chejiki?

¹⁵Yujni jel xkaʼatik tsʼakatal yuja majtanal bʼa koltaneli (Mat. 20:28). Sbʼaja matik tsaʼubʼal oj wajuk bʼa satkʼinal, chaʼanyabʼal wa xyilawe ja koltanel yujni wa x-ajiyileyuj jun smajlajel. Stsʼakatal yuja skʼuʼajel sbʼaja sakʼanil yaʼa ja Kristo, ja Jyoba wa xyala kʼotel toj sok wa xkʼot yil jastal yuntikil (Rom. 5:1; 8:15-17, 23). Sok jaxa pilan chejiki, cha jelni chaʼanyabʼal xyilawe ja koltaneli, stsʼakatal yuja skʼuʼajel yiʼoje sbʼaja xchikʼel spekʼa ja Kristo, wani xbʼobʼ iljuke lek yuja Dyosi, wani xbʼobʼ yaʼteltaye toj sok bʼa oj kanuke sakʼan ja bʼa «niwan wokoli» (Apoc. 7:13-15). Yajni ja chabʼ grupo it wa xwajye ja bʼa Conmemoración kada jabʼil, wa sjeʼa wa xyaʼawe tsʼakatal yuja koltaneli.

16. ¿Jas pilan rason kiʼojtik yuja wala wajtik ja bʼa Conmemoración?

¹⁶Yujni wa xkʼana oj jkʼuʼuktikyi ja Jesús. Chikan jas smajlajel kiʼojtik, jpetsaniltik jel chaʼanyabʼal wa xkilatik ja mandar yaʼa ja Jesús ja akwal ya kujlajuk bʼa skʼintajel ja Conmemoración: «Nochowik skʼulajel ja it bʼa oj juluka kʼujolex bʼa keʼna» (1 Cor. 11:23, 24).

17. ¿Jas yuj wajel ja bʼa Conmemoración wa xya mojxukotik mas soka Jyoba?

¹⁷Yujni wa xya mojxukotik mas soka Jyoba (Sant. 4:8). Jastalni kilunejtik, wajel ja bʼa Conmemoración wa xyakitik ja cholal bʼa spensarajel ja bʼa smajlajel yaʼunejkitik ja Jyoba sok ja bʼa syajal skʼujol sjeʼunejkitiki (Jer. 29:11; 1 Juan 4:8-10). Wani xkʼuʼantik lek ja smajlajel jaw sok bʼa mini skʼulan payar ja syajal skʼujoli.  Yajni wa xkan jpensaraʼuktik ja jaw, wa xyajtaytik mas ja Jyoba sok wa xkabʼtik mas mojan wala ajyitiksok (Rom. 8:38, 39).

18. ¿Jastal wa skoltayotik spensarajel ja sjejel bʼa Jesús?

¹⁸Yujni wa snikawotik snochjel ja sjejel bʼa Jesús (1 Ped. 2:21). Ja kʼakʼujik bʼajtanto bʼa Conmemoración, wa xpaklaytik ja loʼilik bʼa Biblia sbʼaja tsaʼanxta semana ajyi bʼa Luʼum ja Jesús, ja xchamelali sok ja sakʼwelali. Sok jaxa bʼa akwal bʼa Conmemoración, ja loʼili wa xya juljkʼujoltik janekʼto wa syajtayotik ja Jesús (Efes. 5:2; 1 Juan 3:16). Skʼumajel sbʼaja janekʼto xchʼaka sbʼaj ja Jesús sok spensarajel bʼa yeʼna wa snikawotik «bʼa yijel ja sakʼanil jastalni yiʼaj ja yeʼni» (1 Juan 2:6).

19. ¿Jasa tʼilan oj kʼuluktik bʼa ajyel ja bʼa syajal skʼujol ja Dyos?

¹⁹Yujni mas puesto wa xya ajyukotik ajyel ja bʼa syajal skʼujol ja Dyos (Jud. 20, 21). Yajni wa xkʼulantik ja janekʼ wa xbʼobʼkujtik bʼa skʼuʼajelyi, bʼa yajelyi sakbʼuk ja sbʼiʼili sok yajel gustoʼaxuk ja skʼujoli, tini wala ajyitik bʼa syajal skʼujol (Prov. 27:11; Mat. 6:9; 1 Juan 5:3). Wajel ja bʼa Conmemoración wa xyakitik ja ipal bʼa yaljelyabʼ ja Jyoba kada kʼakʼu soka jas wa xkʼulantik: «¡Wa xkʼana oj kamigoʼuka bʼa tolabida!».

20. ¿Jastik lekil rasonik kiʼojtik bʼa ajyel ja bʼa Conmemoración?

²⁰ Ama ja smajlajel kiʼojtik ti bʼa satkʼinal ma bʼa Luʼum, ayni kiʼojtik lekil rasonik wajel ja bʼa Conmemoración kada jabʼil. Yajni wa stsomo jbʼajtik bʼa skʼintajel, wa xjul jkʼujoltik june ma chamelkujtik bʼa jel xkʼanatik: ja Jesukristo. Cha wa xjul jkʼujoltik ja niwan yajtanel sjeʼunejkitik ja Jyoba: ke yaʼa ja Yunin bʼa oj ya elkotik libre. Ja jabʼil it, ja Conmemoración oj kʼulaxuk bʼa akwal viernes 15 bʼa abril bʼa 2022. Jel xkʼanatike ja Jyoba soka Yunini. Ja yuj ja yajtabʼ ja bʼa xchamelal ja Jesús, jelni tʼilan ajyel ja bʼa kʼakʼu jaw ja bʼa Conmemoración.