JA LEY bʼa Moisés wa xyala ke ja Jyoba wani xyiʼaj jastal majtanal ja tortolaʼik sok ja palomaʼik. Ja chabʼ yal chanik it tolabida lajan wa xtajiye tiʼal ja bʼa leyik wa staʼa tiʼal ja majtanalik. Ja israʼelenyoʼiki wani xbʼobʼ skʼape june ja bʼa yal chanik it (Lev. 1:14; 12:8; 14:30). Ja it jelni lek pes mini tolabidaʼuk wa xbʼobʼ taxuk tortolaʼik. La kiltik jas yuj.

Ja tortolaʼik kʼotel yal chanik wa xwajye bʼa tuk lugar sok ti wa x-ajyiye bʼa Israel ja bʼa ixawik mas jel xyaʼa kʼaʼuj. Ja bʼa ixaw octubre (bʼa otoño), ja yal chanik it wa xwajye bʼa lado sur bʼa paisik mas ay kʼaʼuj sok wa xkumxiye bʼa Israel ja bʼa styempo kʼaʼuj (Cant. 2:11, 12; Jer. 8:7). Ja yuj ja bʼa styempo cheʼe mini pasiluk wa xbʼobʼ staʼe ja israʼelenyoʼik ja tortolaʼik bʼa skʼapjel jastal majtanal.

Pe ja palomaʼiki mini xwajye bʼa pilan lugar, ja yuj wani xbʼobʼ taxuk ja bʼa Israel snajtil ja jabʼil. Chomajkil, kʼotele yal chanik wa xbʼobʼ ajyuke bʼa naʼits (cha kʼela ja Juan 2:14, 16). Jastalni wa xyala jun juʼun, «bʼa spetsanil ja yal comonik sok lugarik ja bʼa parte jaw, ja kristyanoʼiki wani xyawe ajyuk bʼa snaje ja palomaʼiki. Yibʼanal ja naʼitsiki ayni jun snaj paloma, bʼa kʼotelni jun sjotanal ja bʼa yibʼ naʼitsi, bʼa tini wa x-ajyiye ja yal chaniki» (cha kʼela ja Isaías 60:8).

¿Jasa wa sjeʼakitik ja it bʼa Jyoba? Ke juni Dyos jel xyajtani sok wa xyabʼ stojol, pes skʼana bʼa oj kʼapjukyi yal chanik yuja israʼelenyoʼik bʼa ojni bʼobʼ staʼe snajtil ja jabʼili.