JA Yomara, ja Marcelo sok ja Hiver yoxwanil yermano sbʼaje mi x-ilwaniye ke ti aye bʼa jun chʼin lugar bʼa Guatemala. Ja Yomara kʼe skʼul estudiar ja Biblia soka Testigoʼik, sok tsaʼan ja yermanoʼik skʼanawe skʼulajel estudiar. Pe ayni jun wokol: mi snaʼawe skʼumajel braille. Ja yuj ja smaestro yeʼn wa skʼumanyile ja parrapoʼik sok ja tekstoʼik bʼa Biblia.

Wajel ja bʼa reunionik cha jelni wokol bʼa yeʼnle. Ja Naʼits bʼa Tsomjelal mas mojan yiʼoje wa xkan 40 minuto, sok mini xbʼobʼ wajuke stuchʼile. Ja yuj, ja hermanoʼik ja bʼa kongregasyon wa skʼulan sbʼaje turnar bʼa oj yiʼe och ja bʼa reunionik. Sok yajni yoxwanile kʼe koltanuke ja bʼa asignasyon bʼa reunión bʼa yoj semana, ja hermanoʼik wani skoltaye bʼa oj kan bʼa spensare ja jas oj yal-e.

Ja mayo bʼa 2019, ja Testigoʼik kʼe skʼuluke ja reunión ja bʼa lugar bʼaye, sok jun nupanum precursor regular aye wajye koltanel ja tiw. Ja nupanum it ajyi ja skʼelsate bʼa oj sjeʼeyi ja oxwane hermano bʼa skʼumajel sok stsʼijbʼajel braille, anima ja yeʼnle cha mi snaʼawe jastal skʼulajel. Ja yuj wajye bʼa jun biblioteca bʼa oj snebʼ-e sbʼaja braille sok ja modoʼik wa x-aji makunuk bʼa sjejel.

Mini ekʼ mas tyempo mixani xyiʼaje wokol skʼumajel braille, ja jaw koltajiye bʼa oj kʼiʼuke mas ja bʼa yaʼteltajel ja Dyos. a Ja wego, ja Yomara, ja Marcelo sok ja Hiver precursor regular aye, sok jaxa Marcelo siervo ministerial. Kada semana wa spilawe jitsan tyempo bʼa yaʼteltajel ja Dyos. Jelni gusto x-aʼtijiye bʼa wani snikawe ja tuk.

Yoxwanile jel xyaʼawe tsʼakatal bʼa yibʼanal ja jas kʼulubʼalyile yuja kongregasyon sok ja yajalkʼujol jeʼubʼalyile. Ja Yomara wa xyala: «Man ja kʼakʼu jnaʼa jbʼajtikon, ja hermanoʼik sjeʼawekitikon meran yajalkʼujol». Sok ja Marcelo cha wa xyala: «Ayni kiʼojtikon lekil kamigotikon ja bʼa jkongregasyon sok ti aytikon bʼa jun pamilya bʼa sutanal ja luʼum ke tsoman aye yuja yajalkʼujol». Ja Yomara sok ja yermanoʼik jelni skʼanawe oj kʼotuk ja kʼakʼu oj paxuk ja Luʼum jun tsamal lugar (Sal. 37:10, 11; Is. 35:5).