Ja Jyoba wani skʼana ja matik wa xnupani gusto aʼajyuke, tsats aʼajyuk ja snupaneleʼi sok mok spil sbʼaje (Mat. 19:4-6). Ta ja weʼn waxa kʼana oj nupanan, ¿jastal oj bʼobʼa ta juna lekil atatam ma acheʼum? Yuja Jyoba yeʼn skʼulunejotik, wani snaʼa jasa tʼilan oj jkʼuluktik bʼa lek oj waj kujtik ja yajni ay jmakbʼentiki sok ja bʼa jnupaneltiki. Yajni wa xkatik makunuk ja rasonik bʼa Biblia masni lek wa x-el kʼote. La kiltik jujuntik ja bʼa rasonik it.

Bʼajtan, tʼilani oj kabʼtik stojol jun jasunuk bʼa ay kiʼojtik jpetsaniltik: «Ja kʼujolal jani ja jasunuk mas jel xchʼaykʼujolani yuj chikan jasa sok mi xmajlani» (Jer. 17:9). Yajni chabʼ kristyano bʼa wa skʼana oj nupanuke wa x-elye ekʼ lajan, bʼobʼta mas wego oj kʼiʼuk ja jastal wa xyabʼyeʼi sok oj chʼayjuk ja spensareʼi. Ta jaʼ wa xnupaniye yuja jastal wa xyabʼyeʼi, ojni bʼobʼ snaʼe malaya (Prov. 28:26). Ja yuj mini lekuk ja makbʼenalik oj yal-e ja jastal jel skʼana sbʼaje ja yajni kʼeʼumto ma ay jas oj skʼap sbʼaje bʼajtanto oj snaʼ sbʼaje lek.

Ja proverbios 22:3 wa xyala: «Ja maʼ wa spensaran leki wa xyila ja jas xiwela sbʼaji sok wa snakʼa sbʼaj, pe ja maʼ mi spensaran leki wa x-ekʼ toj sok wa xyila ja swokolil». ¿Jasa jel xiwela sbʼaj yajel makunuk ja sitioʼik bʼa Internet? Jelni triste yabʼjel, pe jujuntik yiluneje ja smaloʼil bʼa loʼlubʼale yuj kristyanoʼik bʼa snaʼawe sbʼaj bʼa Internet. Chomajkil, ay kristyanoʼik bʼa mi xkʼixwiye bʼa wa skʼulane lom skuentaʼe bʼa sloʼlajel ja tuk kristyano sok wa xyelkʼaneyi takʼin. Ay ekʼele ja maʼ wa skʼulan ja jastik it bʼa jel malo wa xyalawe kʼotele taʼumantiʼ bʼa Jyoba.

La kiltik jas pilan jel xiwela sbʼaj. Jujuntik ja bʼa sitioʼik bʼa Internet wa xyawe makunuk jun programa bʼa computadora bʼa ti wa xbʼobʼ staʼe ja snupe. Pe mini ay jun prueba ta meran ja iti. ¿Stojol maʼ ja oj katikan ke jun programa oj stsakitik jun jasunuk bʼa jel tʼilan jastal ja nupaneli? Miniʼa. Jun programa bʼa computadora mini tʼun oj slaj sbʼaj soka rasonik bʼa Biblia (Prov. 1:7; 3:5-7).

Ja bʼa Proverbios 14:15 wa xtaʼatik pilan jas meran. Ja tiw wa xyala: «Ja maʼ mi snaʼa kʼinali wa skʼuʼan bʼa jujune ja yaljeliki, pe ja maʼ wa snaʼa kʼinali wa spensaraʼan jujune ja xeteʼik wa xyayiʼi». Bʼajtanto oj tsaxuk ta oj kʼot jun lekil tatamal ma cheʼumal jelni tʼilan  oj kʼot snaʼ sbʼaj lek. Pe mini pasiluk oj kʼulaxuk ta ti naxi sbʼaj bʼa Internet. Sok ama wa sjeka sbʼaje ja sdatoʼe sok jitsan ora wa xloʼlaniye jach bʼa Internet, ¿wan ma xbʼobʼ alxuk meran wa snaʼa sbʼaje? Jujuntik spensaraʼane staʼaweta ja maʼ mero wa skʼanaweʼi, pe jelni cham xyabʼye ja yajni wa xkʼot snaʼ sbʼaje merani.

Ja tsʼijbʼanum bʼa jun salmo yala: «Mini xmojtay ja winike matik wa xloʼlani; sok wani xjitsa jbʼaj soka matik wa snakʼa ja jastal mero kʼotele» (Sal. 26:4). Jitsan kristyano mi maloʼuk xyilawe ja oj sleʼe abʼal ja bʼa sdatoʼe wa xyawe kʼeʼuk ja bʼa Internet bʼa sloʼlajel ja tuki. Bʼobʼta wa snakʼawe ja jastal mero kʼotele ma mi chikanuk ja jastal mero ja smodoʼe ja bʼa mensaje wa sjekaweʼi. Bʼobʼta jujuntik oj yal-e taʼumantiʼe bʼa Jyoba, pe ¿meran maʼ yiʼuneje jaʼ? ¿Nochumane maʼ bʼa Kristo bʼa takʼanexa? ¿Lek maʼ wa xtaxye soka Jyoba? ¿Lek maʼ wa xtajiye tiʼal yuja kongregasyoni? Ma ¿wa sjeʼawe jun smodoʼe bʼa mi lekuk sok mi lek smojtajele? (1 Cor. 15:33; 2 Tim. 2:20, 21). ¿Libre maʼ aye bʼa oj nupanuke jastalni wa xyala ja Biblia? Tʼilani oj naxuk ja jastik junuk it, pe jelni wokol oj kʼot naxuk ta mi la loʼilanitik sok jun hermano bʼa wa snaʼa sbʼaj lek ja kristyano jaw (Prov. 15:22). Sok chikani lek, jun yaʼtijum Dyos mini tʼun oj ekʼ bʼa spensar bʼa oj ajyuk «bʼa junxta yuko» sok june ma mito yiʼojuk jaʼ (2 Cor. 6:14, TNM; 1 Cor. 7:39).

Yuja jel xiwela sbʼaj ja sitioʼik bʼa Internet, ¿ay maʼ modoʼik mas lek bʼa slejel sok snajel sbʼaj jun kristyano bʼa bʼobʼta oj kʼot jun lekil tatamal ma cheʼumal? Yajni mi timubʼaluk stsomjel jbʼajtik jitsan, ojni bʼobʼ jtatik modo bʼa snajel sbʼaje tuk Taʼumantiʼik ja bʼa reunionik, bʼa asambleaʼik sok bʼa tuk ekʼeleʼik.

Yajni mi xbʼobʼ jtsom jbʼajtik jitsan, jastal yuja chamel COVID-19 bʼa wa spuku sbʼaji, wani xkatik makunuk ja aparatoʼik bʼa ochel ja bʼa reunioniki, sok ja tiw oj bʼobʼ naxuk sbʼaj tuk taʼumantiʼik bʼa Jyoba bʼa solteroʼe sok solteraʼe. June ojni bʼobʼ yil ja yajni wa xyaʼ ekʼ sloʼile sok wa smaklajel ja jastal wa xyaʼawe ja skomentarioʼe bʼa wa sjeʼawe jastal ay ja skʼuʼajel yiʼojeʼi (1 Tim. 6:11, 12). Cha ojni bʼobʼ loʼilanukotik ja bʼa grupo wa spila ja zoom ja yajni xchʼak ja reunioni. Ja pilan modo jas oj bʼobʼ jkʼuluktiki jaʼa yajni wa stsomo sbʼaje jujuntik hermanoʼik bʼa yajel ekʼ gusto jutsʼin jach bʼa Internet. Ja bʼa ekʼeleʼik jaw, ojni bʼobʼ yil jastal wa sjeʼayi ja smodo ja tuki sok jastal mero kʼotel (1 Ped. 3:4). Yajni wane snajel sbʼaje, xchawanile ojni bʼobʼ yil-e ta junxta ja skʼelsate sok ta wa slaja sbʼaj ja smodoʼe, sok ta lajan kʼotele.

Yajni jun soltera ma jun soltero wa snocho ja tojelal wa xyaʼa ja rasonik bʼa Biblia yajni wa sleʼa ay maʼ oj nupanusok, bʼobʼta masni gusto oj ajyuk ja bʼa snupaneli. Jastalni wa xyala ja proverbio: «Ja maʼ wa staʼa jun lekil xcheʼum [ma jun lekil statam] staʼunej jun jasunuk bʼa lek, sok ja yeʼn wa x-ajiyi ja skoltanel ja Jyoba» (Prov. 18:22).