Jpetsaniltik mini xbʼobʼkujtik skʼulajel estudiar ja Biblia ja janekʼ tyempo wa xkʼanatik. Anto, ¿jasa oj skoltaya bʼa oj wa makunuk lek ja tyempo? Bʼajtan, amakunuk lek ja tyempo yajni oja kʼul estudiar. Masni oj wa el slekilal skʼulajel lek estudiar tʼusan impormasyon yuja wegoxta oja kʼul estudiar jitsan.

Tsaʼan ila bʼaya mas tʼilani (Efes. 5:15, 16). Ja il oj taʼ jujuntik rason:

• Kʼuman kada kʼakʼu ja Biblia (Sal. 1:2). Jun modo jel lek skʼulajel jani oja kʼumuk ja kapituloʼik wa xpaklaxi ja bʼa reunión bʼa yoj semana.

• Chapaxa bʼajtan ja jas oj kʼulaxuk estudiar ja bʼa reunionik, ja bʼa Spaklajel Ja Juʼun Cholumani sok ja bʼa reunión bʼa yoj semana. Chapabʼaj lek bʼa oja waʼ juna komentario (Sal. 22:22).

• Ta wanto xkanawuj mas tyempo, cha leʼa modo skʼumajel sok skʼeljel ja tuk waʼelalik bʼa Dyos, jastal ja rebistaʼik bʼa xcholjel, ja bideoʼik sok spetsanil ja jas wa x-el ja bʼa jw.org.

• Kʼeʼan kʼulan estudiar jun tema waxa wiʼaj gusto. Ojni bʼobʼa leʼ impormasyon bʼa jun wokol wan ekʼelabʼaj, jun sjobʼjela wiʼoj ma bʼa jun tema bʼa Biblia waxa kʼana oja wabʼ mas stojol. Oja taʼ mas modoʼik bʼa skʼulajel estudiar ja bʼa xetʼan «Actividades para estudiar la Biblia», bʼa jw.org.