JA YALJELIK it yeʼn yala ja David, bʼa chonabʼ Israel, yajni stoyo jun ixuk sbʼiʼil Abigail. ¿Jas yuj jach yala? ¿Jasa wa xnebʼatik ja sjejel bʼa Abigail?

Ja David snaʼa sbʼaj ja Abigail yajni wan ijel spatik yuja mandaranum Saúl. Ja Abigail jani nupanel soka Nabal, jun winik riko sok jel jitsan ja xchanteʼik bʼa ti wa sleʼa swaʼele bʼa witsaltik ja bʼa sur bʼa Judá. Ja David soka swinik yeʼnani stalnuneje ja stalnuman chanteʼik ja Nabal soka xchanteʼik. Anto, ja David sjeka jujuntik swinik bʼa waj skʼaneyi chikan jastik oj bʼobʼ ajukyile bʼa oj yabʼye (1 Sam. 25:8, 15, 16). Mini lom wane skʼanjel, pes yujni stalnuneje ja jastik sbʼaj ja Nabal.

Pe ja Nabal xchiktes ja sbʼiʼil, bʼa wa stojolan «mi snaʼa kʼinal» ma «Sonso». Ja yeʼn sjakʼayi jel kalax sok utanel ja jas wan skʼanjel ja David. Ja yuj xchapa sbʼaj bʼa waj skʼul kastigar yuja mini tʼun spensaran sok yajbʼesni soka jas yala. Yuja mi snaʼa kʼinal ja Nabal jelni chaʼan ja jas oj stup ja yeʼn soka matik teysoki (1 Sam. 25:2-13, 21, 22).

Yajni skʼulan pensar ja jastik xiwela sbʼaj oj ekʼuk yuja jas wegoxta skʼana oj skʼuluk ja David, ja Abigail mini xiwi sok spensaran xchʼikjel sbʼaj. Ja yeʼn tsamalxta skʼanayi ja David bʼa a-spensaraʼuk, yajel julyi skʼujol jastal wa xtax soka Jyoba. Chomajkil, yayi jitsan waʼelal sok cha jachuk ja swiniki. Jaxa David snaʼa ja Dyos yaʼunej makunuk ja Abigail bʼa mi oj staʼ smul ja bʼa stiʼ sat ja Dyos. Yala yabʼ: «¡Sok lekxtayujil ja waxa kʼulan pensar! Akoʼuka lekilal yuja wa timawon ja bʼa kʼakʼu it bʼa mi oj jmuluk ja xchikʼeli» (1 Sam. 25:18, 19, 23-35).

Jelni pasil snajel bʼa mokni kʼotkotik jastal ja Nabal, bʼa mini yaʼa tsʼakatal yuja jastik lek kʼulajiyi. Chomajkil, yajni wa xkilatik ay jas ojxa ekʼuk bʼa mi lekuk, la jkʼuluktik ja janekʼ xbʼobʼkujtik bʼa stojbʼesel ja wokoli. La jkʼantikyi ja Dyos jastal ja tsʼebʼanum: «Jeʼaki bʼa skʼulajel pensar sok snajel» (Sal. 119:66).

Ja tuki bʼobʼta oj spensaraʼuke bibo lek wajtik soka jas jkʼulantiki sok jkʼulantik pensar. Anima xyalawe ma miyuk, bʼobʼta jachni oj spensaraʼuke jastal ja David, bʼa yala: «Lekxtayujil ja waxa kʼulan pensar».