1. Ja snebʼumanik ja Jesús, ¿jasa yalawe yabʼ jun tsome kristyano ja bʼa jas tʼilan oj skʼuluke?

JITSAN winike sok ixuke skʼuluneje biajar bʼa Jerusalén. Jakele bʼa tuktukil país sok tuktukil ja kʼumal wa xkʼumaniye. Ja kʼakʼu jaw ay jas ekʼ bʼa jel chaʼan yabʼjel: junta chʼaykʼujol, jujuntik judío kʼe kʼumanuke ja bʼa skʼumale ja kristyanoʼik jaw. Pe ja mas chamyabʼjeli mi jaʼuk yuja wa xkʼumaniye ja kʼumal jaw, jani ja bʼa jas yalawe ja judíoʼik soka jas cha alji yabʼye spetsanile yuja ja jekabʼanum Pedro. Bʼa tuk jastik junuk, xcholo yabʼye oj bʼobʼ kanuke sakʼan ta skʼuʼane bʼa Jesukristo. Ja yaljelik jaw kʼot man skʼujole bʼa sjobʼowe: «¿Jas mas lec oj cʼulticon ba?». Sok ja Pedro sjakʼayile: «Iajic xa jaʼ» (Hech. 2:37, 38).

2. ¿Jasa oj jpaklaytik ja bʼa artikulo it? (Kʼela ja poto ja bʼa skʼeʼulabʼil bʼa spatiki).

² Ja jas cha ekʼ mas tsaʼani jelni chaʼanyabʼalil waji: yiʼajni jaʼ 3.000 kristyano ja bʼa kʼakʼu jaw sok jach kʼotye nebʼuman bʼa Kristo. Ja it jani ja skʼeʼulabʼil bʼa jun niwan aʼtel bʼa yajel och nebʼumanik bʼa jani yakanyi ja cholal it ja snochumanik ja Jesús. Sok man wego ja aʼtel jaw wani kʼulaxel. Ja bʼa jtyempotik mi malanukta jujuntik ora bʼa skoltajel june bʼa chapanxa oj ayuk bʼa oj yi jaʼ. Bʼa oj bʼobʼ lajxukyuj ja jaw jun estudiante, bʼobʼta oj yi yuj ixaw ma jun jabʼil ma mas. Yajel och nebʼuman wani skʼana oj kʼujolaxuk, jastalni wa snaʼawe ja matik wane yajelyi estudio bʼa Biblia. Ja bʼa artikulo it, oj paklaytik jas oj jkʼuluktik bʼa skoltajel ja estudianteʼik bʼa oj yiʼe jaʼ.

3. Jastalni wa xyala ja Mateo 28:19, 20, ¿jas oj skʼuluk ja estudiante bʼa oj kʼot yi jaʼ?

³ Bʼajtanto oj yi jaʼ ja estudiante tʼilani oj ya makunuk ja jas wa sjeʼa ja Biblia (kʼuman ja Mateo 28:19, 20). Yajni  skʼulan jachni oj kʼot jastal ja «huinic ba jel vivo» ja bʼa sjejel yaʼa ja Jesús bʼa chaʼan lek sjoto ja bʼa yijil toniki bʼa oj ya kʼeʼuk ja snaji (Mat. 7:24, 25; Luc. 6:47, 48). La kiltik ja yan oxe jasunuk bʼa oj bʼobʼ jkoltaytik ja estudiante bʼa oj ya makunuk ja jas wan snebʼjeli.

4. ¿Jastal oj bʼobʼ jkoltaytik ja estudiante bʼa oj kʼot yi jaʼ? (kʼela ja rekwagro « Koltay ja estudiante bʼa oj ajyuk skʼelsat sok oj lajxukyuj»).

⁴ La jkoltaytik ja estudiante bʼa oj ajyuk skʼel sate. ¿Jas yuj jel tʼilan ja it? La jPensaraʼuktik ja bʼa sjejel it: ta yujkʼa oj jkʼultik biajar najat jach bʼa karretera, bʼobʼta oj kʼotkotik tekʼan bʼa jujuntik lugar lek xkilatik. Jachuk mini jel najatuk oj kabʼtik ja bʼa wa xkʼana oj kʼot kotiki. Bʼa juntikxta, yajni ja estudiante wa x-ajyi yuj skʼel sat bʼa tʼusan tyempo sok wa xlajxiyuj, bʼobʼta ojni ya sbʼaj kuenta ja skʼelsat bʼa yijel jaʼi ojni lajxukyuj. Ojni bʼobʼ katik makunuk ja rekwagro «Leʼa modo skʼulajel ja it» ja bʼa libro Abʼan tsamalil jawa sakʼanili bʼa skoltajel ja estudiante bʼa oj takʼanbʼuke. Ja xchʼakulabʼil bʼa kada sjejel, la jcholtik yabʼ ja jas ti chʼikan soka skʼelsat ja bʼa jas chʼak snebʼi. Ta yujkʼa wa xkʼanatik oj ya ajyuk tuk skʼelsat, ojni bʼobʼ jtsʼijbʼuktik ja bʼa wa xyala «Tuk taregaʼik». Tolabida la katik makunuk ja ekʼele it bʼa yiljel soka kestudiantetik ja skʼelsat wa skʼana oj staʼ bʼa tʼusan tyempo soka bʼa oj yi yuj tyempo.

5. Jastalni wa xyala ja loʼil bʼa Marcos 10:17-22, ¿Jasa yala yabʼ ja Jesús jun winik riko sok jas yuj?

⁵ La jkoltaytik ja estudiante bʼa oj stukbʼes ja sakʼanili (kʼuman ja Marcos 10:17-22). Ja Jesús yala yabʼ jun winik riko bʼa oj xchon spetsanil ja jas yiʼoji, anima wa snaʼa mini tʼun pasiluk bʼa yeʼna (Mar. 10:23). ¿Jas yuj jach yala yabʼi? Yujni wa xyabʼ syajal bʼa yeʼna. Bʼobʼta ay ekʼele oj kʼan oj kaltik yabʼ ja estudiante bʼa  oj ya makunuk ja jas wan snebʼjeli yujni wa xnaʼatik mito chapanuk. Ja smeranili, ajyelawuj ja yajkʼachil modo sok stukbʼesel jujuntik jastik junuk wani xyiʼaj tyempo (Col. 3:9, 10). Pe yajni mas wego wa xkalatik yabʼ sbʼaja jas wantik yaljeli, masni wego oj bʼobʼ skʼuluk. Ja tikʼe loʼil it wa sjeʼayi wa xyajtaytik (Sal. 141:5; Prov. 27:17).

6. ¿Jas yuj jel tʼilan oj katik sjobʼjelik bʼa spensarajel?

⁶ Jelni tʼilan oj katikyi sjobʼjelik ja estudiante bʼa oj spensaraʼuk. Ja tikʼe sjobʼjelik it oj skoltayotik bʼa oj jnatik ja jas wa xyabʼ stojol sok ja jas wa skʼuʼani. Ta kʼajyelxa wa xkʼulantik, masni pasil loʼilanel mas tsaʼan soka yeʼn bʼa jastik jel xiwela sbʼaj. Ja libro Abʼan tsamalil jawa sakʼanili ayiʼojan jitsan sjobʼjelik bʼa spensarajel. Jun sjejel, ja bʼa sjejel 4 wa sjobʼo: «¿Jastal waxa kʼuʼan ja weʼn wa xyabʼ ja Jyoba ja yajni wa xwa makunuk ja sbʼiʼili?». Soka bʼa sjejel 9 wa xcha jtaʼatik pilan sjobʼjel: «¿Bʼa jastik junuk waxa kʼulan gusto oja wayi?». Ja bʼajtani, bʼobʼta ja estudiante oj skʼan oj katikyi tyempo bʼa oj snaʼ sjakʼjel ja tikʼe sjobʼjelik it. Ojni bʼobʼ jkoltaytik sjejelyile bʼa oj spensaraʼuke ja bʼa tekstoʼik bʼa Biblia sok ja bʼa potoʼik wa xtax ja bʼa sjejel.

7. ¿Jastal oj bʼobʼ katik makunuk ja experienciaʼik bʼa meran ekʼeli bʼa skoltajel ja estudiante?

⁷ Yajni yabʼta stojol ja jas tʼilan oj skʼuluk ja estudiante, la stsatsankʼujoluktik bʼa oj ya makunuk ja experienciaʼik bʼa meran ekʼel. Jun sjejel, ta yujkʼa wokol wa xyabʼ wajel ja reunioniki, oj bʼobʼ jetikyi ja bideo Jehová se interesa por mí, wa xtax ja bʼa xetʼan «Leʼa tuk jastik» ja bʼa Sjejel 14. Jitsan sjejelik ja bʼa libro Abʼan tsamalil jawa sakʼanili ayiʼojan experienciaʼik ja bʼa xetʼanik «La jnebʼtik mas » ma bʼa «leʼa tuk jastik». * mok la katik slaj sbʼaj sok pilan kristyano ja estudiante yaljel yabʼ: «Ta ja yeʼn wa xbʼobʼ yuj, ja weʼn cha ojni bʼobʼukawuj». La katikan bʼa akʼot snaʼ yeʼna. La jtatik yi tiʼal jastik junuk bʼa koltaji ja kristyano bʼa bideo bʼa yajel makunuk ja sjejelik bʼa Biblia, jastal jun teksto bʼa jel tʼilan ma pilan jasunuk. Tolabida ta yujkʼa xbʼobʼi, la jchiktestik yi jastal skoltay ja kristyano jaw ja Jyoba.

8. ¿Jastal oj bʼobʼ jkoltaytik ja estudiante bʼa oj syajtay ja Jyoba?

⁸ La jkoltaytik ja estudiante bʼa oj syajtaye ja Jyoba. La jletik ja sjutsʼinil bʼa loʼilanel sbʼaja smodoʼik ja Jyoba. La jkoltaytik ja estudiante bʼa ayil ja Jyoba juni Dyos bʼa gustoʼil bʼa tolabida tey mojan sbʼaja matik wa syajtayi (1 Tim. 1:11; Heb. 11:6). La jetikyi jastal oj ya el slekilal ta wa xya makunuk ja jas wa snebʼa sok la jcholtik yabʼi ja it juni prueba ja bʼa syajal skʼujol ja Jyoba wa xyabʼ bʼa yeʼna (Is. 48:17, 18). Yajni mas wa syajtay ja Jyoba masni oj ajyuk yuj ja kʼankʼunel bʼa stukbʼesel ja jas mas tʼilani.(1 Juan 5:3).

9. Jastalni wa xyala ja Marcos 10:29, 30, ¿jasa oj koltajuk yuj jun kristyano bʼa oj xchʼak sbʼaj bʼa oj kʼot yi jaʼ?

⁹ Bʼa oj kʼot yiʼe jaʼ ja estudiante tʼilani oj xchʼak sbʼaje. Jastal ja winik riko tax tiʼal bʼa parrapo 5, bʼobʼta jujuntik estudianteʼik tʼilan oj yaʼekan ja jastik junuki. Ma  tʼilan oj yaʼekan ja yaʼteleʼi bʼa kontra ay sok ja rasonik bʼa Biblia. Jitsan bʼa yeʼnle bʼobʼta oj yaʼekan smojtajel ja kristyanoʼik bʼa mi syajtaye ja Jyoba. Jaxa tuk wa xwokolaniye yuja mi xkʼanjiye yuja spamilyaʼe bʼa kontra aye sok ja taʼumantiʼik bʼa Jyoba. Ja Jesús yala jujuntik kristyano wokolni oj yabʼye ja oj xchʼak sbʼajeʼi. Pe skʼapani ke ja Jyoba oj yaʼ koʼyi slekilal ja snebʼumaniki sok jun tsamal pamilya bʼa wa xyaʼteltaye ja Dyosi, (kʼuman ja Marcos 10:29, 30). ¿Jastal oj bʼobʼ jkoltaytik ja estudiante bʼa oj yawe el slekilal ja tsamal majtanal it?

10. ¿Jasa wa xnebʼatik ja bʼa jas yala ja Manuel?

¹⁰ La kamigoʼuktik ja estudiante. Jelni tʼilan la jetik jel chaʼanyabʼal wa xkilatike. ¿Jas yuj? La kiltik jas wa xyala jun hermano bʼa México sbʼiʼil Manuel sbʼaja tyempo yajni ajiyi estudio bʼa Biblia: «Bʼajtanto oj kʼekotikon ja estudio, ja jmaestro tolabida wa sjobʼoki jastal ayon. Ja it wa skoltayon bʼa gusto oj ajyukon sok xcholjel yabʼ ja jastal wala taxyoni. Wa xkabʼ meran wa xcham skʼujol bʼa keʼna».

11. ¿Jas yuj ja jel lek oj katik ekʼ tyempo sok ja kestudiantetiki?

¹¹ Jastalni ja Jesús ya ekʼ tyempo sok ja snebʼumani, la ni cha katik ekʼ tyempo soka kestudiantetiki (Juan 3:22). Ta wa xkilatik jelxa lek wajum sok ojxa bʼobʼ jlok bʼa jnatik bʼa yujel kajpe, waʼel ma skʼeljel lajan ja programa bʼa JW Broadcasting. Seguro jelni oj ya tsʼakatal yuja jlokotik ja bʼa styempo kʼinik bʼa bʼobʼta stuchʼil wa xyabʼi. Ja Kazibwe, bʼa ti sbʼaj bʼa Uganda, wa xyala: «Ja jutsʼinik ajyi jmok ja jmaestro sjeʼaweki jitsan jastik junuk sbʼaja Jyoba jastal ja estudioʼik bʼa Biblia. Kila jastal jel chaʼanyabʼal wa xyila ja Jyoba ja yaʼtijumiki sok ja jastal jel gustoʼayeʼi. Jani jaw ja jas wa xkʼana ja keʼn».

12. ¿Jas yuj jel lek oj kitik och tuktukil cholumanik ja bʼa estudio bʼa Biblia?

¹² La jloktik tuktukil cholumanik ja bʼa  estudio bʼa Biblia. Bʼobʼta ay ekʼele lajan sok mas pasil oj wajtik jtuchʼiltik ma soka junxta cholumani. Ama bʼa jujuntik ekʼele ja it jelni lek, ja estudiante ojni ya el slekilal ja yajni la wajtik sok tuktukil hermanoʼik. Ja Dimitri, bʼa ti sbʼaj bʼa Moldavia, wa xcholo: «Kada choluman wa smojtay ajyi ja jmaestro tuktukil modo ja jastal wa xcholowe ja jastik juniki. Ja it skoltayon bʼa oj kil ja jas wanon snebʼjeli bʼa tuktukil ja jastal wa spensaraneʼi. Sok cha mixa jel kʼixwiyon ja yajni wajyon ja bʼajtan ekʼele ja bʼa reunión yujni wanxa xnaʼa sbʼaj jitsan hermanoʼik sok hermanaʼik».

13. ¿Jas yuj tʼilan oj jkoltaytik ja estudiante bʼa oj wajuke ja bʼa reunioniki?

¹³ La jkoltaytik ja estudiante bʼa awajuke ja bʼa reunionik. ¿Jas yuj? Yujni ja reunioni juni mandar bʼa Jyoba sok jani ti chʼikan ja bʼa jastal wa xkatikyi stoyjeli (Heb. 10:24, 25). Cha ja hermanoʼik ja bʼa kongregasyoni kʼoteleni jpamilyatik ja bʼa yaʼteltajel ja Dyosi. Yajni teytik soke ja bʼa reunionik, lajan sok teytik bʼa junta naʼits bʼa wantik yajel el slekilal bʼa jun lekil waʼelal. Yajni wa xkoltaytik ja estudiante bʼa oj wajuke ja bʼa reunioniki, wantikni skoltajel bʼa oj skʼuluk ja jas mas tʼilani bʼa oj kʼot yi jaʼ. Pe bʼobʼta ay jun jas junuk bʼa oj ajuk wokolanuk bʼa mi oj skʼuluk jaw. ¿Jastal oj katik makunuk ja libro Abʼan tsamalil jawa sakʼanili bʼa skoltajel?

14. ¿Ja jastal oj bʼobʼ jniktik yi skʼujol ja estudianteʼik bʼa oj wajuke ja bʼa reunioniki?

¹⁴ Oj bʼobʼ katik makunuk ja sjejel 10 ja bʼa libro Abʼan tsamalil jawa sakʼanili bʼa oj nikjuk yuj ja estudiante bʼa wajel ja bʼa reunioniki. Bʼajtanto oj jexuk ja libro it, kʼanjiyile jujuntik cholumanik bʼa ayxa yiʼoje experiencia bʼa oj spaklaye ja sjejel it soka yestudianteʼe, sok jelni yawe el slekilal. Meran mini oj majlaytik oj kʼot kotik ja bʼa sjejel 10 bʼa slokjel ja estudiante ja bʼa reunioniki. Laxani jloktike sok la jkʼuluktik tikʼan. Kada estudiante tuktukil sok ayni swokole. Ja yuj la waj kʼujoltik ja jas wa xmakuniyujile kada jujune sok la jpensaraʼuktik jastal oj jkoltaytike. Mok la el jganatik ta mi xkʼe wajuke wego ja bʼa reunioniki. La ajyuk jpasensyatik pe la jkʼujoluktik.

15. ¿Jastik xiwel oj bʼobʼ ajyukyuj ja estudiante?

¹⁵ Ta wa xjul jkʼujoltik ja yajni wanto ajel kitik estudio bʼa Biblia, ¿wan maʼ xyakitik tʼun xiwel ja ochel taʼumantiʼ bʼa Jyoba? Bʼobʼta jpensaraʼantik mini oj bʼobʼkujtik ja xcholjel bʼa naʼits naʼitsi. Ma wala xiwtik yuja jpamilyatik ma kamigotik bʼa oj yil-otike kontra. Ja bʼa ekʼeleʼik jastal it, ojni bʼobʼ kabʼtik stojol ja jastal ay xyabʼ ja estudiante. Ja Jesús yala jujuntik kristyano ojni ajyuk yujile ja xiwel jaw. Pe stsatsankʼujolan ja snebʼumaniki bʼa mi oj yaʼekan ja xiweli atimjuke yuj ja bʼa yaʼteltajel ja Jyoba (Mat. 10:16, 17, 27, 28). ¿Jastal skoltay bʼa mi oj kʼulajuke ganar yuja xiweli? Sok ¿jastal junxta oj jkʼuluktik ja keʼntiki?

16. ¿Jastal oj bʼobʼ jetikyi ja estudiante bʼa a-xchol ja jas wan snebʼjeli?

¹⁶ La jetikyi takal takal ja estudiante bʼa oj xchol ja jas wan snebʼjeli. Seguro och xiwele ja snebʼumanik ja Jesús yajni jekjiye bʼa xcholjeli. Pe ja Jesús skoltani bʼa yaljel yabʼye matik oj xchole yabʼi sok jas oj yale (Mat. 10:5-7). ¿Jastal oj bʼobʼ jnochtik ja sjejeli? Skoltajel ja estudiante bʼa ayil matik kristyanoʼik oj xchole yabʼi. Jun sjejel, la jobʼtikyi ta wa snaʼa sbʼaj june bʼa oj ya el slekilal snebʼjel ja jas meran lek  wa sjeʼa ja Biblia. Tsaʼan la jkoltaytik bʼa oj xchap sbʼaj ja bʼa jas oj yali sjejelyi jun modo bʼa pasil oj xchol ja smeranil jaw. Ta lek kilatik, ojni bʼobʼ katik makunuk soka yeʼn ja xetʼan «Ja jas wa xyalawe jujuntik» sok ja «Ja jas wa sjobʼowe jujuntik» ja bʼa libro Abʼan tsamalil jawa sakʼanili. Ja bʼa xetʼan it bʼa snebʼjeli, jani oj waj jkʼujoltik bʼa sjejelyi jastal oj ya makunuk ja Biblia bʼa pasil sok tsamal oj sjakʼ.

17. ¿Jastal oj bʼobʼ katik makunuk ja Mateo 10:19, 20, 29-31 bʼa skoltajel ja estudiante bʼa oj sjip skʼujol bʼa Jyoba?

¹⁷ La jkoltaytik ja estudiante bʼa oj sjip skʼujol bʼa Jyoba. Ja Jesús yala yabʼ ja snebʼumaniki bʼa wani xyajtajiye yuja Jyoba sok ja yuj wa xkoltajiye (kʼuman ja Mateo 10:19, 20, 29-31). La katik julskʼujol ja estudiante bʼa cha tini ay smoke ja Jyoba. Ojni bʼobʼ jetikyi jastal oj skolta sbʼaj bʼa Jyoba bʼa yajelyi orasyon sbʼaja skʼelsatik. Ja Franciszek, bʼa ti sbʼaj bʼa Polonia, wa xyala: «Ja bʼa yorasyonik ja jmaestro wa staʼa tiʼal jitsan ekʼele ja jkʼelsatiki. Yajni kila wa sjakʼa ja Jyoba, tixta cha kʼe kayi orasyon ja keʼn. Kabʼ skoltayon ja Jyoba yajni tʼilan jkʼana kʼakʼuʼik libre ja bʼa yajkʼachil kaʼteli bʼa oj bʼobʼ wajkon ja bʼa reunioniki sok ja bʼa asamblea».

18. ¿Jastal wa xyabʼ ja Jyoba yuja janekʼ wa skʼulane ja maestroʼik bʼa Biblia?

¹⁸ ¿Jaxa ta mini jun estudio xkaʼatik ja bʼa yan jtyempo? ¿Ojto maʼ jkoltaytik ja estudianteʼik bʼa oj skʼane oj yiʼe jaʼ? Ojniʼa. ¿Jastal? Smojtajel ja tuk cholumanik ja bʼa yestudioʼe. Chikan lek ja Jyoba wani cham skʼujol ja kestudiantetik bʼa Biblia. Cha chaʼanyabʼal wa xyila ja jas wa xkʼulantik bʼa skoltajele bʼa amojxuke soka yeʼn sok wa syajtayotik yuja jaw (Is. 52:7).