Jujuntik yaʼtijumik Dyos wa xyawe makunuk ja aparatoʼik bʼa loʼilanel soka spamilyaʼe ma tuk Taʼumantiʼik. Ja hermanoʼik bʼa takʼane wa xyawe tʼabʼan skʼujole ja rason it: «Ja ixuk winik maʼ wa spensaran leki wa xyila ja jas xiwela sbʼaji sok wa snakʼa sbʼaj, pe ja maʼ mi wa spensaran leki wa x-ekʼ toj sok wa xyila ja swokolili» (Prov. 27:12).

Wa xnaʼatik ja Jyoba wa skʼana oj stalnayotik. Ja yuj mi xmojtaytik ja kristyanoʼik bʼa wa sleʼawe modo bʼa spiljel ja tuki, ja matik expulsado aye ma ja matik wa sjeʼawe jastik junuk bʼa mi stojoluk (Rom. 16:17; 1 Cor. 5:11; 2 Juan 10, 11). Bʼobʼta ay jujuntik ja matik wa stsomo sbʼaje jmoktik mini skʼuʼane ja jastik kujlajel ja bʼa Biblia (2 Tim. 2:20, 21). Masni pasil stsajel ja matik oj jmojtaytik yajni wa xkilatike, pe mini jach wa x-ekʼ yajni wa xkatik makunuk ja aplikasyonik bʼa mensajeʼik.

Ta wantik pensar ochel bʼa jun niwan grupo bʼa mensajeʼik, la jobʼ jbʼajtik jas tikʼe kristyanoʼik oj loʼilanukotiksoke. Jujuntik hermanoʼik ochele ja bʼa grupoʼik jastal it sok mini lek wajel yujile. ¿Jastal oj jtalnay jbʼajtik, yajni bʼa jun grupo ay jitsan kristyano? Mini oj bʼobʼ jnatik jastal mero kʼotele sok jastal wa xtaxye soka Dyosi. Ja Salmo 26:4 wa xyala: «Mini xmojtay ja winike matik wa xloʼlani; sok wani xjitsa jbʼaj soka matik wa snakʼa ja jastal mero kʼotele». Masni lek kechanta oj loʼilanukotik soka kristyanoʼik bʼa wa xnaʼatik sbʼaji.

Ama chʼinuk ja grupoʼik, tʼilani oj jtalnay jbʼajtik sok ja janekʼ tyempo wa xjekatik mensajeʼik sok ja bʼa jas wala loʼsilanitiki. Mini tʼilanuk oj jakʼtik spetsanil ja mensajeʼik chikan jas wan alxel ama ja loʼil wa x-albʼi jitsan tyempo. Ja Pablo yala yabʼ ja Timoteo a-stalnay sbʼaj soka kristyanoʼik bʼa kechantani «xchole huas sloiltaye ecʼ ja cristiano. Huax yochelane spetzanil» (1 Tim. 5:13). Ja bʼa jtyempotik cha wani xbʼobʼ ekʼukʼ ja it ja bʼa Internet.

Ja yaʼtijumik Dyos bʼa takʼanexa mini xchʼika sbʼaje bʼa loʼilik bʼa wa sloʼiltay ja tuk ma bʼa wa alxi jastik bʼa mito xbʼobʼ abʼxuk (Sal. 15:3; Prov. 20:19). Mi skʼanawe oj smaklaye ma spukjel loʼilik bʼa chamyabʼjel ma bʼa mi snaʼawe ta meran (Efes. 4:25). Wani x-ajikitik ja waʼelal wa xjak bʼa Dyos sok ja notisyaʼik bʼa wa xbʼobʼ jipjkʼujoltik ja bʼa sitio jw.org sok ja programaʼik bʼa kada ixaw ja bʼa JW Broadcasting^®.

Jujuntik Taʼumantiʼ wa xyawe makunuk ja aplikasyonik bʼa mensajeʼik bʼa oj xchon-e jastik junuk, smanjel sok skʼapjel chikan jasa ma aʼtelik. Ja jastik it kʼotelni loʼilik bʼa aʼtel, bʼa negosyoʼanel sok mini ti chʼikanuk ja bʼa yaʼteltajel ja Dyos. Ja yaʼtijumik Dyos bʼa mi skʼana oj waj skʼujole «ja taqʼuini» mini xyawe makunuk ja yermanoʼe bʼa oj staʼe slekilal soka stakʼine (Heb. 13:5).

¿Jaxa ta katik makunuk ja aplikasyonik it bʼa skʼanjel takʼin bʼa skoltajel ja kermanotik bʼa ay snesesidaʼe ma yajni wa x-ekʼ jun desgrasya? Yuja jel xyajtaytik ja kermanotik, ja yuj wa xcham jkʼujoltik bʼa stsatsankʼujolajele sok skoltajel ta wa xmakuniyujile (Sant. 2:15, 16). Pe ta wa xkʼulantik bʼa jun niwan grupo bʼa mensajeʼik, bʼobʼta wanotikni sjomjel ja yaʼtele ja betel ma ja ansyanoʼik bʼa kongregasyon, bʼa masni lek wa skʼulane (1 Tim. 5:3, 4, 9, 10, 16). Mini jun yaʼtijum Dyos wa skʼana oj iljuk bʼa lajansok akʼubʼalyi jun cholal jel chaʼanyabʼalil bʼa oj stalnay ja hermanoʼiki.

Wani xkʼanatik spetsanil ja jas wa xkʼana oj jkʼuluktik jani bʼa stoyjel ja Dyos (1 Cor. 10:31). Ja yuj, yajni stsaʼatik oj katik makunuk jun aplikasyon bʼa mensajeʼik ma chikan jas aparato, la jpensaraʼuktik ja bʼa peligroʼik sok bibo la ajyukotik.