Ta ay maʼ jel wego skʼuman ja loʼil it, bʼobʼta ojni ajyukyuj sjobʼjel. Pe ajyi chabʼ winik sbʼiʼilane Mefibóset; sok ta jpaklaytik ja jas ekʼi, ayni jas oj bʼobʼ jnebʼtik.

Ja rey Saúl bʼa Israel ajyiyuj juke skerem sok chabʼ yakʼix. Ja bʼajtani jaʼa Jonatán. Tsaʼan, ja pilan xcheʼum sbʼiʼil Rizpá ajyiyuj jun skerem sbʼiʼil Mefibóset. Jaxa Jonatán cha ajyiyuj jun skerem sbʼiʼil Mefibóset. Ja yuj, tanto ja yij soka skerem ja Saúl sbʼiʼilane Mefibóset.

Pe ¿jas yuj ja David skʼulan entregar jitsan winike bʼa oj miljuke? Ajyi jun tyempo ke ja rey Saúl kʼe yilkʼujoluk ja gabaonitaʼik bʼa teye soka israʼelenyoʼiki sok sleʼa modo bʼa oj xchʼaysnajele. Lajansok smila jitsan bʼa yeʼnle. Ja jaw wajni jun chaʼan mulal, pes ja bʼa styempo ja Josué, ja olomalik bʼa Israel yaʼawe jun trato bʼa lamanil soka gabaonitaʼik (Jos. 9:3-27).

Soka trato jaw mito xkʼuts ja yip ja bʼa styempo ja Saúl. Pe ja yeʼn mini skisa, sok sleʼa modo xchʼayjel snajel ja gabaonitaʼik. Sok ¿jasa ekʼi? Ja Saúl sok ja matik bʼa snaji ‹staʼawe smul bʼa spekʼjel chikʼ› (2 Sam. 21:1). Yajni ja David och rey, ja gabaonitaʼik bʼa kanye sakʼani xcholoweyabʼ ja jasa ekʼi. Ja David sjobʼoyile jastal oj ya slokʼoluk yuja chaʼan smul sleʼa ja Saúl sok jachuk ja Jyoba oj ya koʼ slekilal ja luʼumi. Ja yeʼnleʼi mini skʼanawe takʼin, kechan skʼanawe amiljuke ja juke yuntikil ja winik maʼ sleʼa modo oj chʼayjuk snajeleyuji (Núm. 35:30, 31). Sok jachni skʼulan ja David (2 Sam. 21:2-6).

Ja bʼa tyempo jaw, ja Saúl soka Jonatán chamyeta ja bʼa tiroʼaneli. Pe sakʼanto ay ja skerem ja Jonatán, ja Mefibóset. Ja yeʼn ekʼ sbʼaj jun desgrasya yajni chʼinto sok kan renko sok mini ti ajyi chʼikan ja yeʼn ja jas skʼulan ja statawelo soka gabaonitaʼiki. Pe ja David soka Jonatán skʼuluneje jun trato bʼa yamigoʼajel sbʼaje, sok ja it wantoni syama ja yintileʼi, bʼa ti chʼikan ja Mefibóset (1 Sam. 18:1; 20:42). Ja loʼili wa xyala ja it sbʼaja David: «Pe ja reyi snaʼa syajulal ja Mefibóset, ja skerem ja Jonatán, ja skerem ja Saúl, yuja skʼapjelal yaʼuneje bʼa stiʼ sat ja Jyoba ja David soka Jonatán» (2 Sam. 21:7).

Ama jachuk, ja David yayile ja jas skʼanawe ja gabaonitaʼiki. Skʼulanyile entregar ja chabʼ yuntikil ja Saúl, june ja bʼa yeʼnle cha sbʼiʼilan Mefibóset, sok ja joʼe yij ja Saúl (2 Sam. 21:8, 9). Sok jachuk, ja David xchʼaya snajel ja jastal taʼubʼal tiʼal malo ja luʼumi yuja chikʼ pekʼeli.

Ja loʼil it ay jas wa sjeʼakitik. Lekbʼi mey smule ja chabʼ yuntikil ja Saúl sok ja joʼe yiji, ja Jyoba mini oj skʼan ajyi bʼa jach oj kʼulajukyile, yujni ja sLey ja Dyos wa xyala jaman lek ke ja untiki mini xbʼobʼ chamuke yuj smul ja tataliki. Ja ley cha wa xyala: «Kada kristyano oj chamuk yuja smuli» (Deut. 24:16). Ja it wa xchiktes ke ja juke yintil ja Saúl bʼa chamyeʼi koltaniyeni ja bʼa slejel modo bʼa xchʼayjel snajel ja gabaonitaʼiki. Ja yuj ja jukwaneʼi stupuwe ja smuleʼi.

Anto, ¿jasa wa xnebʼxi ja bʼa loʼil it? Ke mini maʼ xbʼobʼ sleʼ modo spensarajel ma yaljel ke ja jas skʼulani kechan wan skʼuʼajel mandar. Pes kada jujune yeʼnani oj ajyuk sbʼaj kajan yuja jastik oj skʼuluki. Jun proverbio wa xyala: «Jama jawa bʼej bʼa oj koʼuk jawa woki, sok seguro oj ajyuk yibʼanal jawa bʼejiki. Mok wajan ja bʼa stojola kʼabʼi mini ja bʼa wa surda. Pila wa bʼej ja bʼa malo» (Prov. 4:24-27; Efes. 5:15).