JA DANIEL SOKA MÍRIAM nupaniye bʼa septiembre bʼa jabʼil 2000 sok jelni lek wan ekʼelyujile ajyi ja sakʼanile ja bʼa Barcelona (España). Ja Daniel wa xcholo: «Ja janekʼ wala tupjitikon wani xyaʼa bʼa wajel waʼel bʼa lekil restauranteʼik, wajel bʼa pilan país sok slapjel lekil jkʼutikon. Chomajkil, wani xbʼobʼ elkotikon tikʼan ja bʼa xcholjel». Pe ayni jas stukbʼes ja sakʼanile.

Bʼa jun niwan tsomjelal bʼa jabʼil 2006, ja Daniel kʼot man skʼujol jun sjobʼjel aji bʼa jun loʼil: «¿Wantik maʼ skʼulajel ja janekʼ wa xbʼobʼkujtik bʼa stojel ja bʼa bʼej wa x-ikʼwani och ja bʼa sakʼanil bʼa tolabida ja matik wajum bʼa oj miljuk?» (Proverbios 24:11). Ja bʼa loʼili cholxi ay kiʼojtik ja cholal bʼa xcholjel ja rason bʼa Biblia yujni jach oj staʼe ja sakʼanil ja ixuk winik (Hechos 20:26, 27). Ja Daniel wa xjul skʼujol: «Lajansok yeʼn wan yaljel kabʼ ja Jyoba». Ja bʼa loʼili cha cholxi yajni wa xkʼujolaxi mas yaʼteltajel ja Jyoba mas gusto wa xyaʼa ajyukotik. Ja Daniel wani snaʼa merani ja jaw, yujni kʼotelxa precursora ja Míriam sok jelni gustoʼay.

Ja loʼil it jelni kʼot sbʼaj ja Daniel ja yuj spensaran jaxani styempoʼil oj stukbʼes yibʼanal ja sakʼanil. Masni tʼusan oraʼik kʼe aʼtijuk, och precursor sok spensaran ja gustoʼil oj ajyukyujile soka Míriam ta wajye bʼa jun lugar bʼa wa xkʼanxi mas choluman.

Ja bʼa mayo bʼa jabʼil 2007, ja Daniel soka Míriam yawekan ja yaʼtele sok wajye man Panamá, juni país bʼa yulatayeta bʼajtan. Wani xcholowe bʼa jujuntik islaʼik ja bʼa Bocas del Toro, ja bʼa mar Caribe. Tʼusan mi yibʼanal ja ixuk winik ti kulane tiw wa xkʼumaniye guaymí. Ja Daniel soka Míriam spensarane oj kanuke bʼa Panamá junuk waxake ixaw soka janekʼ takʼin snoluneje.

Wani sbʼejtaye ja islaʼik bʼa barko sok bicicleta. Wantoni xjul skʼujole ja bʼajtan ekʼele sbʼejtaye junuk 30 kilometro sok bicicleta kʼeʼel bʼa bʼalan wits sok jel yaj ja kʼaʼuji. Ja Daniel jelxani yajtik sok kolxa tup yikʼ. Pe jelni lek iljiye yuja pamilyaʼik guaymí ja matik snaʼawe sbʼaji, sok masto yajni ja Daniel soka Míriam snebʼawe jujuntik yaljel ja bʼa kʼumal guaymí. Bʼa tʼusan tyempo ayxa yiʼoje 23 estudio bʼa Biblia.

¿Jasa ekʼ yajni chʼak ja stakʼine? Ja Daniel wa xyala: «Wa xbʼutʼ ja yalel jsatikon yajni och jpensaraʼuktikon kumxel ja bʼa España. Jelni la triste axitikon yuja oj katikonkan ja matik wa xjeʼatikonyi ja bʼa Biblia». Pe jun ixaw tsaʼan ay jas aljikabʼtikon bʼa jel cham kabʼtikon. Ja Míriam wa xyala: «Lokjitikon bʼa ochel precursor especial. Jelni gusto kabʼtikon yuja ti oj kankotikon tiw».

Yuja jastik tukbʼel ja bʼa xchonabʼil ja Dyos, ja Daniel soka Míriam yawekan ja aʼtel bʼa precursor especial bʼa jabʼil 2015. ¿Jasa oj skʼuluke ja wego? Sjipawe skʼujol ja jas wa skʼapa ja Salmo 37:5: «Ayi jawa bʼej ja Jyoba; jipa akʼujol bʼa yeʼn, sok ja yeʼn ti oj ajyuka mok». Staʼawe jun yaʼtele bʼa wa xyaʼakan ajyele precursor regular, sok ja wego ti wane aʼtel bʼa kongregasyon bʼa Veraguas (Panamá).

Ja Daniel wa xyala: «Bʼajtanto oj elkotikon ja bʼa España mini xnaʼatikon lek ta oj bʼobʼ kitikon jun jsakʼaniltik bʼa sbʼisol. Ja wego jachxa ja jsakʼaniltikon, sok mini jas wa skʼulan kitikon palta bʼa ay meran stʼilanil». ¿Jasa meran gustoʼil staʼawe bʼa mi jas oj slaje? Ja yeʼnle wa xyalawe: «Skoltajel ja ixuk winik matik lek skʼujole bʼa snajel sbʼaj ja Jyoba wa xyaʼa jun gustoʼil bʼa mi jas oj slaje».