1. ¿Jastal wa skoltayotik ja 2 Corintios 3:1-3 bʼa yiljel juni niwan cholal skoltajel jun estudiante bʼa Biblia bʼa oj kʼot yiʼ jaʼ? (Kʼela ja poto ja bʼa skʼeʼulabʼil bʼa spatiki).

¿JASTAL wa xkabʼtik yajni wa xyiʼaj jaʼ jun estudiante bʼa Biblia ja bʼa sterritorio ja jkongregasyontiki? Sen jelni la gustoʼaxitik (Mat. 28:19). Sok ta keʼn katikyi estudio, mastoni wala gustoʼaxitik (1 Tes. 2:19, 20). Ja nebʼumanik bʼa ajkʼachto yiʼoje jaʼ kʼotele jastal «jun carta» bʼa mi kechan jel lek xtajiye tiʼal ja smaestroʼe, cha jachuk yibʼanal ja kongregasyoni (kʼuman ja 2 Corintios 3:1-3).

2. a) ¿Jas sjobʼjel jel tʼilan oj kaʼ jbʼajtik, sok jas yuj? b) ¿Jasun kʼotel jun estudio bʼa Biblia? (Kʼela ja nota).

² Jelni xyakitik gustoʼil yabʼjel ja bʼa chane jabʼil ekʼeli wan axel kada ixaw junuk 10,000,000 estudio bʼa Biblia * ja bʼa yibʼanal ja luʼumkʼinali. Sok bʼa snajtil ja tyempo jaw yiʼuneje jaʼ kada jabʼil mas ja 280,000 kristyanoʼik. Ja it wa sjeʼa aytoni jitsan miyonik estudianteʼik bʼa ojto kʼot yiʼe jaʼ. ¿Jastal oj bʼobʼ jkoltaytike? Ja Jyoba ayni spasensya sok wanto yajelyi tyempo ja kristyanoʼik bʼa akʼotuke nebʼumanik bʼa Kristo. Pe yuja wanxa chʼakel ja tyempo, ja yuj wani xkʼana oj jkʼuluktik ja janekʼ oj bʼobʼkujtiki bʼa oj jkoltaytike yajel kʼot mas wego bʼa skʼujole sok akʼot yiʼe jaʼ (1Cor. 7:29a; 1 Ped. 4:7).

3. ¿Jasa oj paklaxuk ja bʼa artikulo it?

 ³ Jelni stʼilanil oj koltaxuke ja estudianteʼik bʼa mas wego oj kʼot yiʼe jaʼ. Pe bʼa oj lajxuk ja it, ja Tsome Tojwanum sjobʼoyi tuk Betelik. Ja bʼa artikulo it sok ja bʼa jakumi, oj kiltik ja jas oj bʼobʼ jnebʼtik bʼa jujuntik biajanteʼik, misioneroʼik sok precursorik bʼa jelxa chapane (Prov. 11:14; 15:22). * Ja jastik wa xyalaweʼi wa sjeʼa ja jasa wa xbʼobʼ skʼuluke tanto maestroʼik sok estudianteʼik bʼa masto lek oj wajyujile. Ja artikulo it oj paklaxuk joʼe jasunuk bʼa tʼilan oj skʼuluk kada estudiante bʼa jachuk oj kʼot yiʼ jaʼ sok jastal oj bʼobʼ koltajukyuj ja smaestro.

4. ¿Jasa tʼilan oj kabʼtik stojol sbʼaja estudioʼik wa x-axi bʼa pwerta?

⁴ Jitsan hermanoʼik ti wa xyaʼawe ja estudio bʼa spwerta ja kristyano. Anima ja it jun modo bʼa oj skʼan oj snebʼ mas, pe ja it mini jel x-albʼiye loʼilanel sok bʼobʼta mini wa xyaʼawe kada semana. Sok bʼa oj sjeʼeyi mas, jujuntik hermanoʼik wa skʼanaweyi ja sdatoʼe sok tsaʼan wa skʼumane ma wa sjekaweyi jun mensaje bʼa stajelyi tiʼal jun pensar bʼa Biblia. * Ja jastal it wani xbʼobʼ ekʼ ixawik sok mini xkʼot man skʼujol ja estudiante. Pe tʼilani oj kabʼtik stojolil jelni wokol oj kʼot yayi ja sakʼanil ja Dyos sok oj yiʼ jaʼ ta ja estudiante mi jel skʼujolan sok mi jel xya ekʼ tyempo spaklajel ja Yabʼal ja Dyosi.

5. ¿Jasa sjeʼa ja Jesús ja bʼa Lucas 14:27-33 bʼa oj bʼobʼ skoltayotik soka kestudiantetiki?

⁵ Bʼa jun ekʼele, ja Jesús ya makunuk chabʼ slajelal bʼa sjejel ja jas oj bʼobʼ skʼuluk june bʼa oj kʼot nebʼuman. Staʼa tiʼal bʼa jun winik bʼa wa skʼana oj ya kʼe jun chaʼanil naʼits sok bʼa jun rey bʼa oj waj tiroʼanel sok pilan rey. Ja yeʼn yala ja maʼ wa skʼana oj skʼuluk ja chaʼanil naʼitsi tʼilani oj och kulan bʼajtan ‹bʼa skʼulajel pensar ta oj staʼ ja takʼin bʼa oj chʼak skʼuluk›, jaxa reyi tʼilan oj och kulan bʼajtan sok sjobʼjel bʼa oj yil ta ja soldadoʼiki oj skʼul-e ganar (kʼuman ja Lucas 14:27-33). Junxta soka it, ja Jesús wani snaʼa chikan maʼ wa skʼana oj kʼot snebʼuman tʼilani oj spensaraʼuk lek ja jasa oj skʼuluk bʼa oj lajxukyuj. Bʼa oj kʼot skʼuluk ja jas yala ja Jesús, tʼilani oj  jtsatsankʼujoluktik ja kestudiantetik bʼa yajelyi estudio kada semana. ¿Jastal oj lajxukujtik?

6. ¿Jasa oj bʼobʼ jkʼuluktik bʼa jachuk ja estudiante oj kʼot bʼa skʼujol?

⁶ Ja bʼajtan jas oj kʼulaxuki jani albʼel mas tyempo yajel estudio ja bʼa pwerta. Jun sjejel, bʼa kada ekʼele, la jpaklaytik mas bersikuloʼik bʼa Biblia. Yajni wanxa skʼana oj kankotik mas tyempo ja bʼa ulataneli, la jobʼtikyi ta ay jun lugar bʼa oj bʼobʼ ochkotik kulan bʼa snochjelyi ja jloʼiltiki. Ja jastal oj sjakʼi oj ya jnatik ta wan yijel stʼilanil ja estudio bʼa Biblia. Sok yajni x-ekʼ ja tyempo, asta oj bʼobʼ jobʼtikyi ta wa skʼana oj katikyi estudio chabʼ ekʼele ja semana, sok ja it oj koltajuk bʼa mas wego oj kʼot bʼa skʼujol. La kiltik jas pilan jasunuk oj skʼuluk ja estudiante.

7. ¿Jastal oj xchap sbʼaj ja maestro bʼa kada estudio?

⁷ Jelni tʼilan ja maestro a-xchap sbʼaj lek kada estudio bʼa Biblia. Oj bʼobʼ kʼe jchap jbʼajtik skʼumajel ja jas oj jkʼuluktisok estudiari sok skʼumajel ja tekstoʼiki. La jletik ja puntoʼik mas tʼilani. La jpensaraʼuktik ja yolomajeli, ja yal chʼin yolomajeliki, ja sjobʼjeliki, ja tekstoʼik bʼa wa xyala «kʼuman», ja dibujoʼik ma potoʼik sok chikan jas bideo bʼa oj skoltayotik xcholjel lek ja yolomajeli. Sok tixa la jpensaraʼuktik ja jastal wa xtax ja kestudiantetiki sok jastal oj jcholtik yabʼ bʼa jun modo pasil sok chikan lek sbʼej bʼa jachuk oj yabʼ stojol sok oj ya makunuk (Neh. 8:8; Prov. 15:28a).

8. Jastalni wa xyala ja Pablo ja bʼa Colosenses 1:9, 10, ¿jasa tʼilan oj jkʼuluktik bʼa skoltajel ja kestudiantetik?

⁸ Yaljel yabʼ ja Jyoba sbʼaja kestudiantetik sok sbʼaja jas wa xmakuniyuji cha tini chʼikan ja bʼa xchapjel jbʼajtiki. La jkʼantikyi bʼa a-skoltayotik yajel makunuk ja Biblia bʼa jun modo oj katik kʼot man skʼujol (kʼuman ja Colosenses 1:9, 10). La jpensaraʼuktik ta ay jun jasunuk wokol wa xyabʼ stojol ma bʼa skʼulajel aseptar. Mok chʼay jkʼujoltik ja jas wa xkʼanatiki jani skoltajel bʼa oj kʼot yiʼ jaʼ.

9. ¿Jastal oj jkoltaytik ja kestudiantetik bʼa oj xchap sbʼaj kada estudio?

⁹ Wani xmajlaytik ja yajelyi estudio tikʼani oj skoltay ja kestudiantetik bʼa ayil  chaʼanyabʼal ja Jyoba sok ja jas skʼulunej ja Jesús, sok oj skʼan snebʼjel mas (Mat. 5:3, 6). Bʼa oj ya el mas slekilal ja estudio, ja estudiante tʼilani oj waj lek skʼujol ja bʼa jas wan snebʼjeli. Bʼa oj lajxukyuj, la kaltik yabʼ jelni tʼilan oj xchap sbʼaj ja bʼa jas oj jpaklaytiksoki. Jun modo jani a-skʼumuk bʼajtan sok a-spensaraʼuk jastal oj ya makunuk. Ojni bʼobʼ jetikyi jastal oj xchap sbʼaj. * ¿Jastal? Jani xchapjel jbʼajtik lajan soka yeʼn. La jetikyi jastal slejel ja sjakʼjeli sok sjisjel jujuntik yaljel bʼa oj koltajuk oj julskʼujol ja sjakʼjeli. Sok tixa xkʼanatikyi oj yalkabʼtik jach mixa oj skʼel ja sjuʼuni. Jach oj jnatik ta yabʼta lek stojol. La kiltik ja yoxil jasunuk bʼa tʼilan oj snebʼ skʼulajel ja estudiante.

10. ¿Jas yuj jel tʼilan ja kestudiantetik a-skʼumuk kada kʼakʼu ja Biblia, sok jasa oj skʼuluk bʼa yajel el mas slekilal ja skʼumajeli?

¹⁰ Ja estudiante mini kechanuk oj ajukyi estudio kada semana yuja smaestro, cha jelni lek a-skʼuluk jujuntik jasunuk kada kʼakʼu. Tʼilani oj smaklay ja Jyoba sok ochel loʼilsok. Jun modo bʼa smaklajel jani skʼumajel kada kʼakʼu ja Biblia (Jos. 1:8; Sal. 1:1-3). La jetikyi jastal oj ya makunuk ja programa bʼa skʼumajel ja Biblia. Ja programa it ti wa xtax bʼa jw.org sok wa xbʼobʼ kʼulaxuk imprimir. * Pe bʼa mas oj ya el slekilal ja skʼumajel ja Biblia, la kaltik yabʼ a-spensaraʼuk ja jasa wan jejelyi sbʼaja Jyoba sok jastal oj ya makunuk ja bʼa sakʼanil ja jas wa snebʼa (Hech. 17:11; Sant. 1:25).

11. ¿Jastal oj snebʼ yajelyi orasyon jun estudiante, sok jas yuj jel tʼilan tikʼan oj skʼuluki?

¹¹ La jloktik ja kestudiantetik bʼa a-skʼumuk ja Jyoba yajelyi orasyon kada kʼakʼu. La katikyi orasyon ja bʼa kada skʼeʼulabʼil sok xchʼakulabʼil ja estudio pe aʼeluk man jkʼujoltik, sok la jtatik tiʼal ja kestudiantetik. Jachuk ja yeʼn oj snebʼ bʼa oj ya eluk man skʼujol ja orasyon oj skʼuluki sok oj yayi orasyon ja Jyoba bʼa sbʼiʼil ja Jesukristo (Mat. 6:9; Juan 15:16). Pensaraʼan janekʼto oj mojxuk soka Dyos yajni skʼuman kada kʼakʼu ja Biblia sok yajni skʼuman ja yeʼn (Sant. 4:8). Ja lekil kostumbreʼik it oj koltajukyuj  jun jasunuk bʼa oj lajxukyuj yajelyi ja sakʼanil ja Dyosi sok yijel jaʼ. La kiltik jasunkiluka.

12. ¿Jastal oj jkoltaytik ja kestudiantetik bʼa oj kʼot yamigoʼuk ja Jyoba?

¹² Ja jas wa snebʼa ja estudiante ja bʼa estudio mi kechan oj kʼot bʼa spensar, cha tʼilan oj kʼot bʼa skʼujol. ¿Jas yuj? Yujni ja kʼujolali, bʼa ti chʼikan ja jas wa skʼana sok ja jastal wa xyabʼ ayi, jani wa snikawotik bʼa skʼulajel. Ja Jesús ya kʼotyi bʼa spensar ja kristyano yujni ay lek sbʼej ja jastal sjeʼa. Pe nochji yuja kristyanoʼiki yujni ya kʼotyi man skʼujole (Luc. 24:15, 27, 32). Ja kestudiantetik tʼilani ayil ke ja Jyoba sakʼan ay, bʼa wa xbʼobʼ ajyuksok kʼubʼan lek sok yiljel jastal sTat, sDyos sok Yamigo (Sal. 25:4, 5). Ja yajni wantik yajel estudio, la jchiktestik ja tsamalik smodo ja jDyostiki (Éx. 34:5, 6; 1 Ped. 5:6, 7). Chikan jasa wan stajel tiʼal ja bʼa wantik spaklajeli, la katik yil jas tikʼe Dyos kʼotel ja Jyoba. La jkoltaytik bʼa ayil chaʼanyabʼalil ja syajal skʼujol, ja slekil skʼujol sok ja syajulal skʼujol. Ja Jesús yala ke ja mandarik «mas tʼilan soc mas nihuan» jani «yaj oja huab ja Huajual Diosi» (Mat. 22:37, 38). La jkʼujoluktik skoltajel ja kestudiantetik bʼa akʼot syajtay lek ja Jyoba.

13. Cholo sok jun sjejel jastal oj jkoltaytik ja kestudiantetik bʼa oj kʼot yil ja tsamal smodo ja Jyoba.

¹³ Yajni la ochtik loʼil soka kestudiantetik, la kaltik yabʼ ja jastal wa xkabʼtik sbʼaja Jyoba. Ja it bʼobʼta oj koltajuk yiljel bʼa tʼilan oj cha kʼot yamigoʼuk ja Dyos sok oj kʼot syajtay (Sal. 73:28). Jun sjejel, lekbʼi wantik spaklajel jun juʼun ma jun teksto bʼa wa xkʼot man jkʼujoltik yujni wan stajel tiʼal sbʼaja syajal skʼujol ja Jyoba, sbʼaja sbiboʼil, sbʼaja stojili sok sbʼaja yipi. Anto ojni bʼobʼ kaltik yabʼ ja kestudiantetik ke ja it jani june ja bʼa jitsan rasonik yuja wa xyajtaytik ja jTatik Dyosi. Ja wego la kiltik ja sjoʼil jasunuk bʼa tʼilan oj skʼuluk ja estudiante bʼa oj kʼot yiʼ jaʼ.

14. Jastalni wa xyala ja Hebreos 10:24, 25, ¿jasa oj koltajukyuj ja kestudiantetik bʼa oj kʼot bʼa skʼujol?

¹⁴ Kibʼanaltik wani xkʼanatik akʼot yiʼe jaʼ ja kestudiantetiki. Jun modo bʼa oj skʼuluk jani slokjel bʼa oj wajuk ja bʼa tsomjeliki. Ja maestroʼik bʼa chapanexa wa xyalawe ke ja estudianteʼik  matik wa xwajye ja bʼa tsomjeliki masni wego wa xkʼot bʼa skʼujole (Sal. 111:1). Jujuntik wa xcholowe yabʼ ja yestudianteʼe ke snalan ja xchapjeleʼi ti wa xyiʼaje bʼa estudio sok jaxa pilan snalani ti bʼa jtsomjeltik. La jkʼumuktik lajan soka kestudiantetik ja Hebreos 10:24, 25 sok la jcholtikyabʼ ja slekilal wa xkatik eluk ja bʼa jtsomjeltiki (kʼuman). Cha oj bʼobʼ jetikyi ja bideo ¿Jastal wa xkʼulaxi ja jtsomjeltikoni? * La jkoltaytik ja kestudiantetik bʼa oj skʼan oj wajuk yibʼanal ja jtsomjeltiki.

15. ¿Jasa oj jkʼuluktik bʼa snikjelyi skʼujol ja kestudiantetik bʼa oj wajuk ja bʼa tsomjeliki?

¹⁵ ¿Jasa oj bʼobʼ jkʼuluktik ta ja kestudiantetik mito bʼa wa xwaj ja bʼa jtsomjeltiki ma najtik ekʼele wa xwaji? Gustoxta la jcholtik yabʼ jun jasunuk jnebʼunejtik ja bʼa tsomjelal ajkʼachto kʼulaxeli. Ja jaw masni oj koltajukyuj ke yuja kechan oj jloktiki. Ayi Ja Juʼun Cholumani ma ja Juʼun bʼa spaklajel bʼa jani wan paklaxel ja bʼa ekʼele jaw. La jetikyi ja jas oj paklaxuk ja bʼa tsomjelal jakumi sok la jobʼtikyi bʼaya mas wa skʼulan gusto. Ja jas xyila ja bʼa bʼajtan tsomjel oj wajuki mastoni oj ekʼuk bʼa chikan jas yilunej ma yabʼunej bʼa pilan tsomjelal wajel bʼa tuk relijyon (1 Cor. 14:24, 25). Ojni snaʼ sbʼaj tuk hermanoʼik bʼa kʼotele jun lekil sjejel bʼa yeʼna sok oj skoltaye bʼa oj kʼot yiʼ jaʼ.

16. a) ¿Jastik oj jkʼuluktik bʼa oj jkoltaytik ja kestudiantetik bʼa oj kʼot yiʼe jaʼ? b) ¿Jasa oj jnebʼtik ja bʼa artikulo jakumi?

¹⁶ Soka jas kilatikta, ¿jastal oj jkoltaytik ja kestudiantetik jumasaʼ bʼa oj kʼot yiʼe jaʼ? Ja yeʼn tʼilan ayil stʼilanil ja yestudio, la jloktik yajelyi estudio kada semana sok a-xchap sbʼaj lek kada estudio. La jetikyi bʼa a-skʼumuk kada kʼakʼu ja Jyoba sok akʼot yamigoʼuk. Sok la jloktik bʼa awajuk ja bʼa tsomjeliki. (Kʼela ja rekwagro ja bʼa slam 12, « Ja jas tʼilan oj skʼuluk ja estudiante»). Pe jastalni oj kiltik ja bʼa artikulo jakumi, ay joʼe jasunuk bʼa tʼilan oj skʼuluk kada maestro bʼa Biblia bʼa jachuk oj bʼobʼ skoltay ja yestudiante bʼa oj kʼot yiʼ jaʼ.