Bʼa oj skʼuluke ja cholal akʼubʼalyile, ja Paklanumik bʼa Biblia tʼilani mi oj xiwuke. Ojni xchol-e yabʼ «ja lekil rasonik ja mansoʼiki», sok cha jachuk ja ‹kʼakʼu bʼa oj yi kastigo› ja matik malo.

Jun hermano ti ajyi bʼa Canadá sbʼiʼil John Hoskin, ja yeʼn xcholo sok mini tʼun xiwel ama wane iljel kontra. Ja bʼa skʼeʼulabʼiljan ja 1921, loʼilanisok jun choluman metodista sok kʼe yal yabʼi: «Jelni lek oj ajyuk jun jloʼiltik laman bʼa Biblia. Sok ta mini akuerdo ayukotik sbʼa jujuntik jasunuk, ojni bʼobʼ jkʼutstikan ja jloʼiltik bʼa jun modo laman sok skʼumajelkan jbʼajtik jastal kamigo jbʼajtik». Pe mini jach ekʼi. Ja hermano Hoskin yala: «Kechanto jutsʼin loʼilanelotikon yajni ja cholumani slutukan tsats lek ja spuerta sok jpensaraʼan ke ojni pojuk ja sbidrioʼil ja puerta».

Sok ja choluman metodista yala: «¿Jas yuj mi jaʼuk xwaja cholyabʼ ja matik mi snochumanuk Kristo?». Ja hermano Hoskin mini jas yala, pe yajni waji yala sbʼaj: «¡Wani xkala ta jaʼ jaw ja jas wanon skʼulajeli!».

Aytoni jas mas ekʼ ja bʼa pilan kʼakʼu, yajni ja cholumani yala ja sloʼili. Ja hermano Hoskin wa xjul skʼujol: «Yalayabʼ ja matik wa xwaj bʼa yiglesya bʼa a-stalnay sbʼaje bʼa keʼna. Yalayabʼ keʼnanibʼi ja tan loʼlanum kʼotelon ja bʼa chonabʼi sok ojnikebʼi miljukon ja mero». Pe mini tʼun yopesji yuja it ja hermano. Ja yeʼn mini yaʼakan ja xcholjel sok loʼilani sok jitsan kristyano. Sok cha yala: «Mini bʼa jel kabʼunej stsamalil ja xcholjel bʼa naʼits naʼitsʼ. Asta jujuntik kristyano yalawekabʼi: ‹Wa xnaʼatikon yeʼnani sjekuneja ja Dyosi› sok sjobʼoweki ta ay jas wa xbʼobʼ skoltayone bʼa jachuk mi jas oj skʼulki palta».

Ja Paklanumik bʼa Biblia yawe eluk programaʼik bʼa spaklajel ja Biblia ja bʼa rebista The Golden Age bʼa skoltajel ja matik wa skʼanawe snebʼjel. * Ja programa “Juvenile Bible Study” (Estudio bʼa Biblia sbʼaja keremtik akʼixuk) kʼotelni sjobʼjelik bʼa oj spaklaye soka yuntikile. Ja nantataliki tʼilani oj «yaweyi ja sjobʼjelik sok skoltajele stajel ja sjakʼjelik bʼa Biblia». June ja bʼa sjobʼjeliki jaʼa it «¿janekʼ libro yiʼoj ja Biblia?», wa sjeʼa jastik mi jel wokoluk yabʼjel stojol. Sok ja sjobʼjel it, «¿Tʼilan maʼ oj smajlaye ke ojni ijuk spatike yibʼanale ja meran snochumane ja Kristo?», Wa xchapxi ja keremtik akʼixuk bʼa oj kʼotuke cholumanik bʼa mi oj xiwuke.

 Ja programa «Advanced Studies in the Divine Plan of the Ages» (Spaklajelik jel chapan sbʼaja jas wa skʼana ja Dyos ja bʼa tyempoʼiki) yayi ja Paklanumik bʼa Biblia bʼa takʼanexa sjobʼjelik bʼa spensarajel bʼa tini el bʼa bʼajtan tomo bʼa Estudios de las Escrituras. Jitsan mil kʼumumanik yawe el slekilal ja programaʼik it. Pe ja bʼa snumeroʼil bʼa 21 bʼa diciembre bʼa 1921 bʼa The Golden Age, alxi ke mixani oj axuk eluk. ¿Jas yuj junta jalon tukbʼesxi?

Ja hermanoʼik matik wane stojel ja kaʼteltiki yaʼa sbʼaje kuenta ke ja ajkʼach Paklanumik bʼa Biblia tʼilani oj snebʼe ja jastik mas tʼilan wa sjeʼa ja Biblia bʼa jun modo mas chapan. Yuja jaw, ja bʼa noviembre bʼa 1921 axi eluk ja libro The Harp of God (jaxa bʼa 1925 axi eluk ja bʼa español sok sbʼiʼilan El Arpa de Dios). Ja kristyanoʼik bʼa skʼana oj yiʼe ja libro aji ochuke juʼun bʼa oj ajukyile estudio, wa sbʼiʼilan The Harp Bible Study Course. Ja bʼa estudio it, bʼa yeʼnani wa skʼana oj yiʼ ja kristyano, wa xkoltajiyuj bʼa oj yabʼ stojol «ja jas xchapunej ja Dyos bʼa yajel koʼ slekilal sok sakʼanil bʼa tolabida ja kristyanoʼiki». ¿Jastalxa wa xkʼulaxi?

Yajni ja kristyano wa xyiʼakan jun libro, cha wani x-ajikanyi jun yal tarjeta bʼa tini wa xyala ja slamik tʼilan oj skʼumuki. Jaxa bʼa pilan semana, wa xcha ajikanyi pilan tarjeta sok jitsan sjobʼjelik bʼa tini elel ja bʼa jastik skʼumuneji sok jaxa bʼa xchʼakulabʼili ti wa xyiʼajan ja jas tʼilan oj skʼumuk ja bʼa semana jakum.

Bʼa 12 semanaʼik, ja estudiante kada semana wa x-ajikanyi jun yajkʼachil tarjeta ke wa xjekjiyi jach bʼa correo yuja clase (ma ja kongregasyon) bʼa lugari. Ja tarjetaʼik jaw ojni bʼobʼ sjeke ja hermanoʼik matik ayxa skʼujole ma ja matik mi xbʼobʼ wajuke bʼa naʼits naʼits yuja jastal wa xtaxye. Jun sjejel, ja Anna Gardner, bʼa Millvale (Pensilvania, Estados Unidos), wa xjul skʼujol: «Yajni el ja libro, ja kermana Thayle bʼa mini xbʼobʼ bʼejyuk, koltaji bʼa oj skʼuluk mas, pes ja wego wanxani xbʼobʼ sjek tarjetaʼik kada semana». Yajni wa xchʼakyuj ja yestudio ja estudiante, ja hermanoʼik wa xyulataye bʼa oj skoltaye mas bʼa oj snebʼe ja Biblia.

ja bʼa xchʼakulabʼil ja jabʼili, ja hermano Joseph Rutherford sjekayi jun karta yibʼanal ja kongregasyon. Ja yeʼn yala: «Ja xcholjel sbʼaja sGobyerno ja Dyos ja jabʼil it mastoni ekʼxel sok mastoni lek kʼulaxel ke yuja tuk jabʼilik bʼa stuljeli». Spensarajel ja bʼa tyempo jakumi, ja yeʼn yala: «Wantoni kanel jitsan aʼtel. Tsatsankʼujolanik ja tuk bʼa oj koltanuke ja bʼa aʼtel it bʼa Dyos». Chikani lek ke skʼuʼane ja Paklanumik bʼa Biblia. Ja bʼa 1922 xcholowe sok mini tʼun xiwel sok bʼa jun modo jel chaʼanyabʼalil ja sGobyerno ja Dyos.