Ja bʼa Eclesiastés 5:8, jun bersikulo bʼa wani xya jpensaraʼuktik, pes wa xyala: «Ta ja bʼa wa lugari waxa wila wa xkʼulajiyi jun jasun mi lekuk ja maʼ pobre sok mi xkʼulaji ja bʼa leki sok mi x-aji makunuk ja sderecho, ja jaw mokni cham awabʼ. Yujni ja maʼ chaʼan xchol jaw ay maʼ wan kʼeljel yuj bʼa mas chaʼan xchol yuja yeʼn, sok yuja bʼa yeʼnleʼi ay tuk bʼa masto chaʼan xchol».

Ja jastalni wa xyila ja kristyano, ja yaljelik it wani xchiktes lek sbʼaja matik ay xchol ja bʼa gobyernoʼik. Pe la jpensaraʼuktik bʼa pilan modo, cha wani sjeʼakitik jun smeranil sbʼaja Jyoba bʼa wa stsatsankʼujolanotik sok wa xyaʼa kulan jkʼujoltik.

Ja Eclesiastés 5:8 wa staʼa tiʼal bʼa jun gobyerno bʼa wa xyixtalaʼan ja pobreʼik sok wa skʼulanyi bʼa mi tojuk. Ja winiki tʼilani oj julskʼujol bʼa bʼobʼta ayni maʼ wan kʼeljel yuj bʼa june ayiʼoj chaʼan cholal ma mas chaʼan cholal yiʼoj yuja yeʼn. Pes bʼobʼta ayni tuk bʼa masto chaʼan ja xchol yiʼoje. Tristeni yabʼjel, ja gobyernoʼik bʼa luʼumi bʼobʼta spetsanil ja gobyernoʼik jaw wa xchono sbʼaje sok jaxa kristyanoʼik bʼa mey xchole yeʼnani wa xyiʼaje wokol.

Pe ama jelxani ipaxita ja jas wan ekʼeli, wani stsatsankʼujolanotik snajel ja Jyoba wan skʼeljel cha jachuk ja matik ay chaʼan xchol ja bʼa gobyernoʼik. Ojni bʼobʼ jkʼantikyi ja Dyos a-skoltayotik sok yajel ekʼyi ja jwokoltiki (Sal. 55:22; Filip. 4:6, 7). Wani xnaʼatik ja «sat ja Jyoba tixtani ay ekʼ bʼa yibʼanal ja luʼumi bʼa sjejel ja yip bʼa slekilal ja matik tsʼikan ja skʼujol soka yeʼn» (2 Crón. 16:9).

Pes ja bʼa Eclesiastés 5:8, wa xyaʼ jpensaraʼuktik jun jasunuk jel meran: ja gobyernoʼik bʼa luʼumi tolabida ay maʼ mas chaʼan xchol. Ja mas tʼilani, ja bʼa bersikulo it wa xya juljkʼujoltik ja Jyoba yeʼn ja mas chaʼan xchol ja bʼa sutsatkʼinali. Ja wego, ja yeʼn wan yajel mandar bʼa jani wan yajel makunuk ja Yunini, ja Jesukristo, ja mandaranum sbʼaja sGobyerno. Ja maʼ kechanta Yeʼn jel Juntiro ja Yipi, tojni lek ja jas wa skʼulani, cha jachuk ja Yunini.