Jastalni wa xyala ja 1 Corintios 15:8, ja Pablo yala: «Sok tsaʼan, tixa sjeʼa sbʼaj jmok jastal june maʼ wa xpojki bʼa mito yoraʼiluk». Ja bʼa tyempo ekʼta jcholunejtik ke ja Pablo lajan sok jani wan stajel tiʼal ja bʼa ekʼele yila bʼa jun nakʼsat ja sniwanil ja bʼa satkʼinal ja Jesús. Bʼa lajansok ajitayi ja cholal bʼa pojkel, ma sakʼwel, ja bʼa sakʼanil bʼa ikʼ ason bʼajtanto ja bʼa styempoʼili, sigloʼik bʼajtanto oj ekʼuk ja sakʼwelal ja bʼa satkʼinali. Pe yajni paklaxi mas ja bersikulo it, wa xkilatik stʼilanil bʼa oj tukbʼestik ja jastal wa xcholxi ajyi.

Ama ja bʼa bersikulo it ja Pablo jani wan stajel tiʼal ja bʼa sjutsʼinil yajni tukbʼi. ¿Pe jasa kʼan yal soka yaljel «june maʼ wa xpojki bʼa mito yoraʼiluk»? Bʼobʼta ayni tuk jas wa stojolan.

Junta chʼay kʼujol sok jelni chaʼanyabʼal ja jastal tukbʼi. Bʼa tʼusan mi spetsaniluk ekʼele, yajni jun alats wa xpojki bʼa mito yoraʼiluk juntani chʼay kʼujol wa x-ekʼi. Yajni ja Saulo, bʼa mas tsaʼan kʼot najuk sbʼaj jastal Pablo, ti wajum bʼa Damasco bʼa oj yiʼ spatik ja snochumanik Kristo, mini wa smajlay bʼa oj yil bʼa jun nakʼsat ja Jesús bʼa sakʼwelxa. Ja jastal tukbʼi ja Pablo mini kechanuk yeʼn cham yabʼi, pes ja snochumanik Kristo bʼa oj waj yiʼ spatik ja bʼa Damasco cha mini snaʼawe ajyi. Chomajkil, ja jasunuk jaw jelni chaʼanyabʼal ekʼi pes mini yila kʼinal jujuntik kʼakʼu (Hech. 9:1-9, 17-19).

Ja jastal tukbʼi «mitoni styempoʼiluk». Ja mero yaljel bʼa griego bʼa sutubʼal «maʼ wa xpojki bʼa mito yoraʼiluk» cha wani xbʼobʼ sutxuk maʼ wa xpojki bʼa «mito styempoʼiluk». Ja la Traducción Kadosh Israelita Mesiánica de estudio wa sutu jachuk: «Pojkiyon ja bʼa sjutsʼinil mi stojoliluk». Yajni tukbʼi ja sakʼanil ja Pablo, ja Jesús kumxitani bʼa satkʼinal. Ja stukil ja jasa yala ja Pablo ja bʼa bersikulo it bʼajtanto, ja yeʼn mini yilunejuk ja Jesús ja sakʼwi bʼajtanto oj wajuk ja bʼa satkʼinal (1 Cor. 15:4-8). Ja jastal sjeʼa sbʼaj ja Jesús bʼa mi wanuk smajlajel ajyi ja Pablo yaʼanikan bʼa oj bʼobʼ yile, anima lajansok «mito styempoʼiluk».

Wan yaljel sbʼaj bʼa jun modo chʼin. Jujuntik maʼ jel chapan wa xyalawe, ja yaljel ya makunuk ja Pablo ja bʼa bersikulo it, jelni skoʼelal sbʼaj yabʼi. Ta ja Pablo ya makunuk soka modoʼal jaw, jani wan snajel ke mi wa sbʼajin ja cholal bʼa kʼotel jekabʼanum. Pes cha yala: «Yujni keʼn ja mas skoʼelal ja bʼa jekabʼanumiki, sok mi xbʼajin oj aljukabʼ jekabʼanum, yujni kiʼajyi spatik ja skongregasyon ja Dyosi. Pe yuja lekil skʼujol mi xbʼajintik ja Dyos kʼotelon jekabʼanum» (1 Cor. 15:9, 10).

Ja yujil, lajansok ja Pablo jani wan stajel tiʼal sbʼaja modo jel chaʼanyabʼal sok junta chʼay kʼujol sjeʼa sbʼaj ja Jesusi, ja ekʼele mi wanuk smajlajel ja yajni tukbʼesjiyi ja sakʼanili sok yuja mini sbʼajin oj yil ja jasunuk jel chaʼanyabʼalili. Chikani jastal, ja jasunuk ekʼ sbʼaji jelni tʼilan waj bʼa yeʼna. Chiktesjikanyi jaman lek ke ja Jesús sakwitani. Jakʼayuj tikʼanxta wa staʼayi tiʼal ja tuk ja yajni wa xcholo sbʼaja sakʼwelal ja Jesús (Hech. 22:6-11; 26:13-18).