Yuja institusyon kiʼojtiki wa skʼapa juʼunik elel bʼa Biblia jach kʼebʼubʼal, jujuntik wa skʼuʼane wa xbʼobʼ skʼuluke kopyar sok yajel kʼeʼuk bʼa tuk sitio bʼa Internet ma bʼa paginaʼik bʼa loʼilanel. Pe ja jaw waneni skʼokjel ja bʼa xetʼan wa xyala «Ja jastal oja wa Makunuki» * ja bʼa jsitiotik bʼa Internet sok yiʼojan jitsan wokol. Ja tiw wa xyala mi maʼ ayiʼoj permiso bʼa «yajel kʼeʼuk dibujoʼik, juʼunik jach bʼa aparatoʼik, markaʼik sbʼaja jastik junuki, kʼinik, potoʼik, bideoʼik ma tuk artikuloʼik ja bʼa jsitiotik bʼa pilan sitioʼik bʼa Internet (mini bʼa paginaʼik bʼa loʼilanel bʼa wa xbʼobʼa kʼep bideoʼik ma archiboʼiki)». ¿Jas yuj tʼilan stimjel ja jaw?

Spetsanil ja jastik junuk wa xtax ja bʼa jsitiotik bʼa Internet talnanubʼal yuja matik wa skʼulane. Ja matik wa xkʼumaniye mi lekuk sbʼaja skʼuʼajeli (apóstatas) soka matik kontraʼaye wa sleʼawe modo yajel kʼeʼuk ja juʼuntiki ja bʼa sitio yiʼoje bʼa oj spay-e ja taʼumantiʼik bʼa Jyoba soka tuk ixuk winik. Pe ja bʼa sitioʼe cha ay jas xchapuneje bʼa oj yawe ochyi duda ja tuki (Sal. 26:4; Prov. 22:5). Tuk ixuk winik wa xyawe makunuk ja jas yiʼoj ja juʼuntiki ma ja dibujo jw.org bʼa anunsyoʼik, bʼa jastik junuk wa xchonowe sok aplikasyonik bʼa telepono sok tabletaʼik. Yajni wa xtalnaxi ja permiso yiʼoj ja matik wa skʼulani soka markaʼik sbʼaja jastik junuki, ja institusyon kiʼojtiki ayiʼoj jun skujlayubʼ bʼa ley bʼa stimjel ja matik mi tojuk wa xyawe makunuki (Prov. 27:12). Ta ja institusyon kiʼojtiki gana wa xyaʼakan jujuntik ixuk winik, ama Taʼumantiʼuke, ayawe kʼeʼuk bʼa tuk paginaʼik bʼa Internet ja jastik kiʼojtik ja bʼa jsitiotik ma wa xyawe makunuk ja dibujo jw.org bʼa xchonjel jastik junuk,  ja jwesiki bʼobʼta mi oj koltanuke ja janekʼ wa xkʼujolantik bʼa skomjel ja matik kontraʼaye ma ja empresaʼik bʼa xchonjel jastik junuk.

Yajel koʼuk ja juʼuntik bʼa tuk sitioʼik bʼa mi jaʼuk ja jw.org xiwelani sbʼaj. Ja Jyoba kechanta yaʼunejyi ja «moso mas jel toj ayi» ja cholal bʼa yajel ja waʼelali (Mat. 24:45, Ja yajkʼachil sju‘unil ja dyosi). Ja moso jaw kechanta wa xya eluk waʼelalik bʼa Dyos ja bʼa jsitiotik www.pr418.com, tv.pr418.com soka wol.pr418.com. Jaxa oxe aplicasyon kiʼojtik bʼa telepono soka tabletaʼik ja it: JW Language^®, JW Library^® soka JW Library Sign Language^®. Wa xbʼobʼ jipjkʼujoltik ja aplikasyonik jaw soka paginaʼik bʼa Internet mey yiʼoj anunsyoʼik bʼa xchonjel jasunuk sok mini sokanuk soka sluʼumkʼinal ja Satanás. Ta ja waʼelal wa xjul jbʼajtik bʼa tuk lugar, mini xbʼobʼ jipjkʼujoltik ta mi jomubʼal ma sokubʼal soka sluʼumkʼinal ja Satanás (Sal. 18:26; 19:8).

Ta ay maʼ ya kʼeʼuk ja juʼuntik bʼa sitioʼik bʼa Internet bʼa wa xbʼobʼ axuk komentarioʼik, wa xyayi ja apostataʼiki soka matik wa skʼenayotik jun lugar bʼa oj yawe och duda sbʼaja xchonabʼil ja Jyoba. Jujuntik jmoj-aljeltik kʼeʼele kʼumal ja bʼa komentarioʼik jaw, soka jaw yaʼuneje kuxbʼuk ja sbʼiʼil ja Jyoba. Ja bʼa paginaʼik bʼa Internet bʼa ochel loʼil mini jaʼuk ja lugar oj jetikyi «ta ay cʼa maʼ mix cʼocxi» (2 Tim. 2:23-25; 1 Tim. 6:3-5). Cha taxel kwentaʼik bʼa paginaʼik bʼa ochel loʼil sok bʼa tuk sitioʼik bʼa Internet bʼa ja yaʼunejeyi ja sbʼiʼil ja institusyon sbʼaja Taʼumantiʼiki, ja bʼa Tsome Tojwanumi ma june bʼa yeʼnle, pe ja kwentaʼik jaw mi yeʼn sbʼajuk ja institusyon kiʼojtiki ma ja Tsome Tojwanumi. Pes mini june ja bʼa Tsome Tojwanumi ayiʼoje jun sitio bʼa Internet jach stuchʼile, cha mini ayiʼoje jun página bʼa ochel loʼil.

Yajni wa xjeʼatikyile ja tuk jastal oj ochuke ja bʼa jw.org, wala koltanitik bʼa xcholjel ja «lekil rasonik» (Mat. 24:14, TNM). Ja yamkʼabʼalik wa xtax bʼa Internet bʼa wa x-ajikitik ja bʼa xcholjeli wanxtani tojbʼel. Wa xkʼanatik spetsanil ja ixuk winik ayawe el slekilal. Ja yuj, jastalni wa xyala «Ja jastal oja wa Makunuki», wani xbʼobʼa jekyi june jach bʼa correo jun juʼun bʼa Internet ma jun link bʼa oj ya koʼuk ja bʼa jw.org. Yajni wa xkalatik yabʼye aʼochuke ja bʼa jsitiotik ja matik meran wa skʼanawe snebʼjeli, jani wa xjekatik soka «ja moso mas jel toj ayi», bʼa kechantani yeʼn ja wa xyaʼa ja meran waʼelal bʼa Dyos.