Ja yaljelik axel makunuk bʼa hebreo wa xyaʼakan oj abʼxuk stojol bʼa tuktukil modo. Yajel tʼabʼan jkʼujoltik ja it, ja jastik ti nochani oj skoltayotik bʼa oj kabʼtik stojolil ja jasa mero wa stojolani:

1. Paklay ja tuk bersikuloʼik ja bʼa salmo it. Ja yajel makunuk ja yaljel «anto (entonces)» ja bʼa bersikulo 12 wa xya kabʼtik stojol ja lekilalik wa xtax ja bʼa bersikulo 12 man 14 jaʼ wa xkʼot sbʼaj ja matik toji, ja matik wa skʼanawe oj ‹ajuk eluke libre sok oj koltajuke› sbʼaja matik mi lekuke (bersikulo 11). Ja jasa wa stojolani jani cha wa xchiktes ja bʼa bersikulo 15, ja bʼa xchabʼil ekʼele wa xtax ja yaljel «gusto» jani wa xcha kʼot sbʼaje ja ixuk winike jaw, ja matik jaʼ «sDyose ja Jyoba».

2. Ja jastal wa x-abʼxi stojol ja it wa syaka sbʼaj sok tuk tekstoʼik bʼa Biblia bʼa wa skʼapayi slekilalik ja xchonabʼ ja Jyoba bʼa toj ay. Ja salmo it wa xyala ja smajlajel bʼa tsʼunan lek ajyiyuj ja David, bʼa tsaʼan yajni ja Dyos ya el libre ja Israel ja bʼa skontraʼiki, ja yeʼn oj ya koʼyi slekilal ja xchonabʼi yajelyi gustoʼil sok bʼa oj ajyukyujile jastik junuk (Lev. 26:9, 10; Deut. 7:13; Sal. 128:1-6). Jun sjejel, ja bʼa Deuteronomio 28:4 wa xyala: «A pojxuk jawa wuntikili sok ja satinel ja bʼa wa luʼumi, soka yalik jawa wakaxi, jawa beserroʼik soka wa chejiki». Jachniʼa, ja bʼa smandaranel ja Salomón, ja yunin ja David, ja chonabʼi yabʼ stsamalil bʼa ajyel laman sok ajyel yujile jastik junuk bʼa mini ajyeluk yujile ajyi. Pe mi kechanuk, ja jastik skʼulan ja bʼa smandaranel ja Salomón wa xchiktes ja jasa oj skʼuluk ja bʼa smandaranel ja Mesías (1 Rey. 4:20, 21; Sal. 72:1-20).

Bʼa xchʼakulabʼil, ja jastal abʼxel stojol ja Salmo 144 wa xya staʼ yip ja salmo bʼa wa xchiktes jaman lek ja tsamal smajlajel yiʼoj ja yaʼtijumik ja Jyoba, bʼa xchʼayjel snajel ja matik mi lekuki sok tixta oj ajyuk ja lamanili sok oj ajyukyujile jastik junuk bʼa tolabida ja matik toji (Sal. 37:10, 11).