JA Diana ayxa yiʼoj mas ja 80 jabʼil. Ja statami yamji yuja chamel sbʼiʼil Alzheimer sok tixani ekʼyuj ja tsaʼanikxta jabʼil ja bʼa sakʼanil bʼa jun naʼits wa x-ajyi ja matik awelexa. Ja Diana yiʼajni wokol yuja cham ja chabʼ yuntikili sok skʼulani luchar soka cáncer de mama. Yajni ja jmoj-aljeltik bʼa skongregasyon wa xyilawe ja bʼa tsomjeli sok ja bʼa xcholjeli, wa xyalawe tolabida gustoʼay.

Ja John wajni biajante bʼa mas ja 43 jabʼil. Jelni wa skʼana ja cholal jaw, pe yilani stʼilanil oj yakan bʼa oj stalnay june ja bʼa spamilya yuj maloʼay. Yajni ja jmoj-aljeltik ja bʼa wa snaʼawe sbʼaj bʼa jitsan jabʼil yilawe bʼa jun niwan tsomjelal wa xyalawe mitoni wa xtukbʼi ja smodo. Pes jeltoni gusto wa x-ajyi.

¿Jastal wa xbʼobʼyujile ja Diana sok ja John bʼa mi oj chʼayujile ja gustoʼili? ¿Jastal modo wa xbʼobʼ ajyuk gusto ja maʼ wan yijel wokol ma bʼa yajelkan jun cholal bʼa jel skʼana? Ja Biblia wa sjakʼa: «Ja maʼ toji oj gustoʼaxuk bʼa Jyoba» (Sal. 64:10). Bʼa yabʼjel mas stojol ja it, la jpaklaytik ja jasa wa xyakitik ja meran gustoʼil soka bʼa miyuki.

Ja bʼa jsakʼaniltiki, ayni jujuntik jasunuk wa xya ajyukotik gusto, jastal ja nupanel, ajyel jun kuntikiltik ma stajel jun cholal bʼa yaʼteltajel ja Dyosi. Sok stojolni ja jach wa xkabʼtiki, pes ja jastik junuk jaw majtanalik bʼa Jyoba. Yeʼn ja maʼ yaʼa kulan ja nupaneli, skʼulanotik bʼa oj ajyuk kuntikiltik sok yeʼn wa xyaʼakitik ja aʼtel oj jkʼuluktik ja bʼa xchonabʼili (Gén. 2:18, 22; Sal. 127:3; 1 Tim. 3:1).

Pe anima, jujuntik ja bʼa gustoʼil jaw kechanta bʼa jun tyempo. Ayni ekʼele ja snup june wa xbʼobʼ chamuk ma oj sloʼlay ja snupi (Ezeq. 24:18; Os. 3:1). Bʼobʼta ja untiki oj skʼok-e yabʼal ja snantate sok ja Dyosi sok tʼilan oj eluke ja bʼa xchonabʼili. Jun sjejel, ja yuntikil ja aluman Samuel mi yaʼteltaye ja Jyoba ja jastalni wa skʼana; sok ja mandaranum David sleʼa smul sok yuja jaw jelni yila ja swokolil ja bʼa spamilya (1 Sam. 8:1-3; 2 Sam. 12:11). Ja tikʼe wokolik  jaw wa xya chʼayuk ja gustoʼil sok wa xya jak wokol sok syajal.

Bʼa junxtani, ja cholalik bʼa yaʼteltajel Dyos wani xbʼobʼ chʼayuk yuj chamelik, ma bʼa jpamilyatik ma ja jastik wa xtukbʼi ja bʼa xchonabʼil ja Dyosi. Jitsan jmoj-aljeltik bʼa tʼilani yaʼawekan ja cholal yiʼoje wani xyalawe jel wa snaʼawe ja gustoʼil wa x-ajyi yujile.

Jelni pasil yiljel, ja tikʼe gustoʼil jaw ayni stikʼanil ma bʼaj ita jun tyempo. Pe ja sjejelik bʼa Samuel, ja David sok bʼa tuk wa sjeʼa ay pilan tikʼe gustoʼil bʼa mi xchʼayi ja yajni ay jas wa xtukbʼi ma ja yajni wa xjak wokol.

Ja Jesús wani snaʼa ja ajyel gusto merani. Ja yajni ajyi ja bʼa satkʼinal, ja sakʼanili jelni tsamal. Ja yuj ‹tolanibida gusto ajyi ja bʼa stiʼ sat ja Jyoba› (Prov. 8:30). Pe ja yajni jak ja bʼa Luʼumi, ayni ekʼele jak sbʼaj wokolik bʼa jel tsats. Anima jachuk, jelni wa xyabʼ stsamalil skʼulajel ja jasa wa skʼana ja sTati (Juan 4:34). ¿Jasa koltajiyuj bʼa oj kuchyuj ja syajal yabʼ ja ojxta chamuki? Ja Biblia wa xyala: «Yuja gustoʼil ajyiyuj ja bʼa stiʼ sati kuchniyuj ja aji kʼe lokan ja bʼa teʼ» (Heb. 12:2, TNM). La jpaklaytik chabʼ jasunuk yala ja Jesús sbʼaja meran gustoʼili.

Bʼa jun ekʼele, ja 70 snebʼumanik ja Jesús jel gusto kumxiye ja yajni wajye bʼa jun campaña bʼa xcholjel pes yujni skʼulane milagroʼik, jastal yajel eluk ja pukujik. Anto, ja Jesús yala yabʼye: «Jel lec ja scʼuanex ja pucuj jumasa. Jel juntiro agustoex pero ay to jun cosa mas jel nihuan. Ja hua biilexi ti xa ni tzʼijbanubal ja ba libro ja ba satqʼuinal tac, jayuj sbej que mas to jel gusto oj ajyanic yuj ja jahui» (Luc. 10:1-9, 17, 20). Ja yuj, anima ja ajyelkujtik jun cholal ja bʼa yaʼteltajel ja Jyoba wa xyaʼakitik gustoʼil, pe ja jasa mas jel tʼilan jani lek ayil-otik ja Jyoba sok ja jaw wa xya ajyukotik meran gusto.

Bʼa pilan ekʼele, yajni ja Jesús wan sjejelyi jun nole, jun ixuk judía yala tsats lek jelni maʼ gusto ay ja snan yuja kʼotel jun lekil jeʼuman. Pe ja Jesús yala yabʼ: «[Miyuk,] mas to jel lec huax yila ja maʼ huax yab ja yabal ja Diosi soc ja maʼ huas scʼuani» (Luc. 11:27, 28). Ta ay kʼa june jel lek ja yuntikili, jelni maʼ gusto wa x-ajyi ja nantatal jaw. Pe mastoni gusto oj ajyuk ta  ja yuntikili kʼuʼabʼal x-ajyi soka Jyoba sok lek ayil sbʼaj soka yeʼn.

Jachniʼa, ja jasa tʼilan wa skʼana bʼa ajyelkujtik jun niwan gustoʼil, jani snajel lekni wa xyilawotik ja Jyoba. Meran, ja wokolik mini wa xyiʼajan kitik gustoʼil, pe mini cha wa xbʼobʼ xchʼay kitik. Jaʼukto maʼ, yajni wa xkuchkujtik sok wala ajyitik toj soka Jyoba, ja gustoʼil jaw masni wa stsatsbʼi (Rom. 5:3-5). La juljkʼujoltik ja Jyoba wani xcha yayi ja yip ja matik wa sjipa skʼujole bʼa yeʼn, sok june ja modoʼal wa xya ajyuk bʼa keʼntik ja yip ja Dyosi jani ja gustoʼil (Gál. 5:22). Ja yuj ja Salmo 64:10 wa xyala: «Ja maʼ toji oj gustoʼaxuk bʼa Jyoba».

Spetsanil ja it wa xcholo jas yuj ja Diana soka John bʼa jtaʼatikta tiʼali, mini chʼayujile ja gustoʼil ja yajni wan ekʼel sbʼaje wokol. Ja Diana wa xyala: «Jleʼunej jkoltajel bʼa Jyoba, jastalni jun yal kerem wa sleʼa skoltajel bʼa snantat». Cha wa xyala: «Wani xkabʼ ja Dyos yaʼunej koʼ jlekilal bʼa skoltunejon mi oj kakan ja xcholjel sok jun jniʼ sat gustoxta». ¿Jaxa John? Ja yeʼn wa xyala ja bʼa 1998 tʼoji jastal jeʼuman ja bʼa Eskwela de Entrenamiento Ministerial soka jaw yilani stʼilanil oj spaklay mas. Yuja jelni spaklayi, ja yajni yaʼakan ja aʼtel bʼa biajante, gustoni ajyi sok tikʼan wa x-el ja bʼa xcholjeli. Wa xyala ja yeʼn soka xcheʼumi mini jel wokol yabʼye ja jasa tukbʼi, pes tolabida pwesto ajyiye bʼa skʼulajel ja jasa wa skʼana ja Jyoba. Sok xchawanile wa xyalawe mini wa snaʼawe malaya.

Jitsan jmoj-aljeltik yiluneje jelni meran ja jasa wa xyala ja Salmo 64:10. La kiltik ja jasa ekʼ sbʼaje jun nupanum bʼa aʼtiji mas ja 30 jabʼil ja bʼa Betel bʼa Estados Unidos sok tsaʼan jekjiye precursor especial. Ja yeʼnle yalawe: «Yajni waxa chʼaya jun jasunuk bʼa jel waxa kʼana, sbʼejni ja wala tristeʼaxi. Pe mini jach oj ajyan snajtil jawa sakʼanili». Pe wegoxta kʼajyiye ja bʼa xcholjel soka kongregasyon bʼa wane koltaneli. Cha wa xyalawe: «Wani xkʼulantikon orasyonik jaman lek sbʼa jun jasunuk. Yajni wa xkilatikon jastal ja Jyoba wa sjakʼa kitikon, jelni gusto wala ajyitikon sok wani xtaʼa kiptikon. Tʼusan tsaʼan yajni kʼotikon ja bʼa kongregasyon, tuk jmoj-aljeltik cha ochye precursor. Chomajkil, kabʼtikon ja gustoʼil bʼa yajel chabʼ estudio bʼa kʼiye soka jas snebʼawe».

Mini tolabida pasiluk oj ajyukujtik ja gustoʼili. Ayni ekʼele oj och jtristeʼiltik. Pe ja Jyoba wa xyaʼa kulan jkʼujoltik sok ja yaljelik bʼa Salmo 64:10. Anima elel jganatik, wani xbʼobʼ jipjkʼujoltik «ja maʼ toji oj gustoʼaxuk bʼa Jyoba». Bʼa tuk yaljel, chikan jas wokol x-ekʼ jbʼajtik, gustoni oj ajyukotik ta toj wala ajyitik soka Jyoba. Wa xmajlaytik ja kʼakʼu oj kʼot smeranil ja jasa skʼapa bʼa oj ajyuk «yajkʼachil satkʼinalik sok jun yajkʼachil luʼum». Anto, ja yaʼtijumik ja Dyosi mixani oj ajyuk smule sok oj ajyuke ‹gusto bʼa tolabida› yuj spetsanil ja jas oj skʼuluk ja Jyoba (Is. 65:17, 18).

La jpensaraʼuktik ja jas wa stojolan ja jaw: mixani oj kokotik chamel sok spetsanil ja kʼakʼuʼiki jelni kongana oj kʼekotikjan. Chikan jastik kʼulajikitik bʼa mi lekuk ma yajbʼesjitik mixani ojto juljkʼujoltik. Ja Jyoba wa skʼapakitik ja «jastik junuk ekʼta mixa maʼ oj jak spensar sok mixa oj yajbʼesnuk». Stsʼakatal ja milagro sbʼaja sakʼwelali, tini oj cha ajyukotik soka jpamilyatik jel xkʼanatik bʼa chamelexa. Jitsan miyonik bʼa ixuk winik ojni yabʼye ja gustoʼil bʼa mini wa xbʼobʼ ekʼuk bʼa kolomtik, jastalni ja snantat ja yal akʼix ya sakʼwuk ja Jesús (Mar. 5:42). Sok ojni kʼotuk ja kʼakʼu spetsanil ja ixuk winik bʼa ti oj ayuke ja bʼa Luʼumi mixani oj ajyuk smule ja jastalni mero sbʼeji sok tolabida oj ‹gustoʼaxuke bʼa Jyoba›.