Ja bʼa 2 Corintios 12:2, 3 (TNM), ja Pablo yala sbʼa jun winik bʼa «ijikʼe bʼa yoxil satkʼinal». ¿Maʼ winikil wan stajel tiʼal? Ja bʼa karta it stsʼijbʼanyi ja kongregasyon bʼa Corinto, ja yeʼn ya chiknajuk lek wa x-aji makunuk yuja Dyosi jastal jekabʼanum (2 Cor. 11:5, 23). Anto staʼa tiʼal ja bʼa «swayichi cha jachʼni ja jastik wa xya‘a ilxuk ja kajwaltiki». Ja bʼa syakulabʼil ja karta it, mini jaʼ staʼa tiʼal bʼa pilan jmoj-aljeltik. Ja yuj, sbʼejni yaljel yeʼnani ja Pablo ja maʼ aji ekʼyi ja nakʼsatik jaw soka jastik aji ekʼyi yuja Dyosi (2 Cor. 12:1, 5, Ja yajkʼachil sju‘unil ja dyosi).

Ja yuj ja winik «ijikʼe bʼa yoxil satkʼinal» sok ja bʼa «kʼachinubʼ», yeʼnani ja Pablo (2 Cor. 12:2-4). Yuja staʼa tiʼal ja «jastik wa xya‘a ilxuk ja kajwaltiki» wa sjeʼa aljiyabʼ jastik junuk bʼa ojto ajyuk ja bʼa tyempo jakumto.

¿Jasunkiluk ja «yoxil satkʼinal» yila ja Pablo?

Ja bʼa Biblia, ja yaljel satkʼinal wa xbʼobʼ stojoluk tuktukil jasunuk. Jun sjejel, bʼobʼta ja wa xkʼan yal ja mero satkʼinali (Gén. 11:4; 27:28; Mat. 6:26). Ay ekʼele ja wa staʼa tiʼal ja gobyernoʼik bʼa luʼumi (Dan. 4:20-22). Chomajkil, wa xbʼobʼ staʼ tiʼal ja gobyerno bʼa satkʼinali, ja Gobyerno oj ya makunuk ja Dyosi (Apoc. 21:1).

Anto, ¿jas kʼan staʼ tiʼal ja Pablo soka yaljel ja «yoxil satkʼinali»? Ay ekʼeleʼik, ja Biblia wa xyala oxe ekʼele jun jasunuk bʼa oj ya staʼ yip ja jasa wa xyala (Is. 6:3; Ezeq. 21:27; Apoc. 4:8). Jastalni wa x-ilxi, yajni ja Pablo yala ja «yoxil satkʼinal», jani wan stajel tiʼal bʼa jun gobyerno masto jel chapan: ja sGobyerno ja Dyos bʼa tey bʼa skʼabʼ ja Jesukristo soka 144,000 matik oj yaʼe mandar lajan soka yeʼn (kʼela ja Perspicacia para comprender las Escrituras, volumen 1, slamik 473, 476). Ja jekabʼanum Pedro jani stsʼijbʼan sbʼaja it, ja yajni yala bʼa wantik smajlajel «ja satqʼuinal jau ba yajcʼachili» bʼa skʼapunej ja Dyosi (2 Ped. 3:13).

¿Sok jasunkiluk ja «kʼachinubʼ» staʼa tiʼal ja Pablo?

Ja yaljel kʼachinubʼ wani xbʼobʼ stojoluk tuktukil jasunuk. Sbʼajtanil, yuja jani mero snaj ajiyi bʼa oj ajyuk sakʼan ja winiki, wa xkilatik jani wa xbʼobʼ staʼ tiʼal ja mero Kʼachinubʼ oj ajyuk ja bʼa Luʼumi. Xchabʼil, cha jani wa xbʼobʼ staʼ tiʼal ja lamanil jel chaʼanyabʼal oj yayi ja xchonabʼ ja Dyos ja bʼa yajkʼachil luʼumkʼinali. Sok yoxil, wa xbʼobʼ staʼ tiʼal ja jastal jel stsamal ay ja bʼa satkʼinali, «ja skʼachinubʼ ja Dyosi» wa staʼa tiʼal ja Revelación 2:7, TNM (kʼela Ja Juʼun Cholumani ja bʼa 1 bʼa julio bʼa 2015, slam 13, parrapo 8).

Bʼobʼta ja Pablo ja wan stajel tiʼal ja oxe jasunuk it ja yajni xcholo ja jasa ekʼ sbʼaj wa xtax ja bʼa 2 Corintios 12:4.

Bʼa tʼusanta yaljel:

Ja «yoxil satkʼinal» wa staʼa tiʼal ja 2 Corintios 12:2 bʼobʼta jani kʼotel ja Gobyerno bʼa Dyos bʼa tey bʼa skʼabʼ ja Jesukristo soka 144,000, wa xkʼan kaltik «ja satqʼuinal jau ba yajcʼachili» (2 Ped. 3:13).

Wa sbʼiʼilan ja «yoxil satkʼinal» yujni ja sGobyerno ja Dyosi jani ja tikʼe gobyerno mas jel chapan.

Bʼobʼta ja «kʼachinubʼi» bʼa «ijikʼe» ja Pablo ja bʼa nakʼsati jani wa stojolan: 1) ja Kʼachinubʼ oj ajyuk ja bʼa Luʼumi, 2) ja kʼachinubʼ bʼa kechan wa senyaʼan bʼa ojni ajyuk sok ojni niwanbʼuk el, sok 3) «ja skʼachinubʼ ja Dyos» tey bʼa satkʼinali; spetsanil ja it jumasaʼ ojni ajyuk junta lajan ja bʼa ajkʼach luʼumi.

Ja yuj, ja ajkʼach luʼumi jani oj slaj sbʼaj sok «ja satqʼuinal jau ba yajcʼachili» soka «ja luum jau yajcʼachil». Ja it juni jasunuk yajkʼachil bʼa tini chʼikan oj ajyuk ja sGobyerno ja Dyos sok cha jachuk ja ixuk winik bʼa oj yaʼteltaye ja Jyoba ja bʼa Kʼachinubʼ bʼa luʼumi.