Sjobʼjelik yiʼoj ja matik wa skʼumani
Ja Biblia wa xyala wa xkʼanxi chabʼ testigo bʼa yaljel ta meran ekʼel jun jasunuk (Núm. 35:30; Deut. 17:6; 19:15; Mat. 18:16; 1 Tim. 5:19). Pe ja bʼa Ley, ta jun winik xyixtalaʼan ja «bʼa jobʼ» jun akʼix bʼa ojxa nupanuk sok x-awani, ja winiki yeʼnani ay smul bʼa wayel soka ixuki, pe ja ixuki miyuk. ¿Jas yuj jach wa xkʼulaxi, pe mey testigoʼik bʼa oj yal-e ta meran yixtalaʼan ja ixuki?
Ja loʼil bʼa Deuteronomio 22:25-27 mi ja wan yajelyi stʼilanil sjejel ta yeʼn smul ja winiki, pes chiknajita lek. Ja Ley it jani wa xyayi mas stʼilanil ja ixuk mey smuli. La kiltik ja jas wa xyala ja tuk bersikuloʼiki.
Ja tuk bersikuloʼik bʼajtani jani wan yaljel bʼa jun winik wa xwaysok jun ixuk ‹ja bʼa chonabʼ› bʼa ojxa nupanuk. Ja bʼa tyempo jaw, ja ixuke matik ojxa nupanuke wa x-iljiye jastal nupanelexa, ja yuj ja winiki yeʼn staʼata smul bʼa wayel soka ixuki. ¿Jaxa ixuk bʼa? ‹Mi awani ja bʼa chonabʼi›. Lekukxta awani, ojni abʼxuk ja yawanel bʼa wan skʼanjel skoltajel sok ojni koltajuk ajyi. Pe yuja mi awani, ja yeʼn chomajkili ay smul bʼa wayel soka winiki. Ja yuj, xchawanile ay smule (Deut. 22:23, 24).
Pe ja Ley pilan ja jas wan xcholjeli: «Pe ta ja winik staʼa bʼa jobʼ jun akʼix bʼa ojxa nupanuk sok stʼena bʼa oj waysok, kechantani ja oj miljuk ja winik bʼa waysoki; jaxa akʼixi mini jas oja kʼulukyi. Ja yeʼn mi staʼunejuk smul bʼa wa sbʼajin oj chamuk. Ja bʼa it jani junxta soka winik wa xwaj yixtalaʼuk ja smoji sok wa smila. Yujni ja yeʼn ti staʼa bʼa job sok jaxa ja akʼix ojxa nupanuki awani, pe mini maʼ koltajiyuj» (Deut. 22:25-27).
Ja bʼa ekʼele it, ja jwesiki wa skʼuʼaneyi ja ixuki. Wa skʼuʼaneyi ja yeʼn «awani, pe mini maʼ koltajiyuj». Ja yuj, ja ixuki mi staʼunej smul bʼa wayel soka winiki. Pe ja winiki ay smul bʼa yixtalaʼan ja ixuk pes «stʼena bʼa oj waysok».
Ja yuj, ama ja ley jani wa xyayi mas stʼilanil ja ixuk mey smuli, ja loʼili wa sjeʼa ayni lek sbʼej ja wa xyala ja winiki yeʼnani smul bʼa yixtalajel ja ixuki sok stʼenjel bʼa wayelsok. Wani xkʼuʼantik lek ja jwesiki wani spaklaye lek masan snajel jastal mero ekʼel sok jachuk skʼulajel ja jastalni wa xyala ja jas yaʼunejkan kulan ja Dyos sok yalunej jitsan ekʼele (Éx. 20:14; Deut. 13:14; 17:4).