Lajansok miyuk. Ja Dyablo mi yala yabʼ ja Eva ta sloʼo ja tekʼul alubʼal mok sloʼi, oj chamuk ja skwerpo sok oj eluk ja yaltsil bʼa ajyel sakʼan bʼa jun pilan lugar. Ja Satanás ya makunuk ja bʼitsʼbʼichan bʼa yaljel yabʼ mini oj chamuk. Kʼan yal yabʼ oj ajyuk sakʼan sok yabʼjel stsamalil jun sakʼanil mas lek ja bʼa Luʼumi, jun sakʼanil bʼa mi tʼilanuk ja Dyos (Gén. 2:17; 3:3-5).

Ta mi ti kʼejan bʼa Edén ja sjejel it mi meranuk bʼa ayto jas wa xkan sakʼan ja wala chamtiki, ¿bʼa eljana? Mi xnaʼatik mero. Wa xnaʼatik ja relijyon mi meranuki chʼayi ja yajni jak ja niwan Bʼutʼ Jaʼ. Kechanta ja Noé sok ja spamilya, bʼa yaʼtijume Dyos, kanye sakʼan, ja yuj spetsanil ja tuk pensarik bʼa relijyon chʼak chʼayuk.

Ja sjejel bʼa ayto jas wa xkan sakʼan ja wala chamtiki tini eljan tsaʼan ja ekʼ ja niwan Bʼutʼ Jaʼ. Yajni ja Dyos ya kʼumanuk tuktukil kʼumal ja bʼa Babel, ja kristyano chʼak spil sbʼaje ‹bʼa yibʼanal ja luʼumi›, sok yiʼaje ja spensare bʼa aytoni jas wa xkan sakʼan ja wala chamtiki (Gén. 11:8, 9). Ja yuj, mi xnaʼatik jas mero tyempo kʼejan ja sjejel it mi meranuk. Ja jas wa xnaʼatik jani ja Satanás, ja «mero statalil ja mentira», yeʼn snikajan sok jel gustoʼaxi yiljel ja wanxta pukxel ja skʼuʼajel it bʼa yibʼanal ja luʼumi (Juan 8:44).