JA BʼA sjejel oj kiltik ay ekʼele wa sjeʼa wani x-aji makunuka. Ja Deuteronomio 24:14, 15 wa xyala: «Moka loʼlay ja maʼ awaʼunejyi yaʼtel bʼa jel ajula sbʼaj sok pobreʼay, ama jaʼa wa moj-aljeli ma jakel bʼa pilan chonabʼ sok wan aʼtel bʼa wa luʼum [...]. Ta mi akʼulan, oj spatyi skʼujol ja Jyoba bʼa wa kontra weʼn, sok weʼnani oja muluk».

Mojan ja bʼa chonabʼ Asdod, tax jun xetʼan spojelal oxom bʼa xcholo sbʼaja sjukil siglo bʼajtanto bʼa jtyempotik. Ja jaw ayiʼoj june bʼa maʼ och parte yuj jun jasunuk ekʼi jastal wa xcholo ja bʼa Deuteronomio 24. Pes bʼobʼta tsʼijbʼaxi bʼa jun aʼtijum alaj bʼa lajansok mi yaʼa ja sat inat janekʼni kanel kulani. Wa xyala: «Tsaʼan yajni ja waʼtijumi [ja maʼ och parte] chʼak snol ja sbʼaʼal ja alaji yajni ekʼta jujuntik kʼakʼu, ja Hoshayahu ja yunin ja Shobay jaki sok yiʼaj ja skʼu ja waʼtijumi. [...] Spetsanil ja jmoj wane aʼtel jmok ja bʼa syajal ja kʼaʼuji oj yal-e [...] ja jasa kalata meraniʼa. Mey jmul bʼa chikan jas mulal. [...] Ta ja mandaranum yala mi xcholuk yeʼn bʼa oj ajuk kumxukyi ja skʼu ja waʼtijumi, akumxukyi yuja waxa naʼa syajulal skʼujol. Mini oj bʼobʼ kanan chʼabʼan yajni ja waʼtijum mixa ayiʼoj ja skʼuʼi».

Jun choluman sbʼaja jas ekʼtajani sbʼiʼil Simon Schama wa xyala ja jas och parte «mini jaʼuk ta wa xyalakabʼtik ja chamkʼujol yiʼoj bʼa jun aʼtijum bʼa oj ajuk kumxukyi ja skʼuʼi». Wa xyala: «Wa xya chiknajuk ja maʼ och parte wani snaʼa tʼunuk ja tsome leyik bʼa Biblia, pe masto ja mandarik bʼa stojbʼesel tsatsal kʼumalik wa xtax ja bʼa Levítico soka Deuteronomio bʼa wa xyala mi lekuk ja yixtalajel ja pobre».