JA SAʼAN SAKBʼEL miércoles 24 bʼa enero bʼa 2018, aji jun anunsyo jel chaʼanyabʼalil ja bʼa pamilya Betel bʼa Estados Unidos sok Canadá: pes tʼoji ja jmoj-aljeltik Kenneth Cook, uninal, june ja bʼa Tsome Tojwanum ja bʼa Taʼumantiʼik jumasaʼ bʼa Jyoba.

Ja jmoj-aljeltik Cook ti pojki sok ti kʼi bʼa Pensilvania (Estados Unidos). Snaʼa sbʼaj ja smeranil stsʼakatal jun smoj eskwela tʼusan bʼajtanto oj skʼul sbʼaj graduar ja bʼa secundaria sok yiʼaj jaʼ bʼa 7 bʼa junio bʼa 1980. Kʼe stulyi ja aʼtel bʼa tyempo tsʼikan jastal precursor regular ja 1 bʼa septiembre bʼa 1982. Chabʼ jabʼil tsaʼan, lokji bʼa Betel. Kʼe aʼtijuk bʼa Wallkill (Nueva York) ja 12 bʼa octubre bʼa 1984.

Yojol ja 25 jabʼil ekʼjan man tyempo jaw, ja jmoj-aljeltik Cook ajiniyi jitsan cholal ja bʼa imprenta cha jachni ja bʼa Opisina bʼa Betel. Ja bʼa 1996, nupani sok jun jmoj-aljeltik sbʼiʼil Jamie, bʼa kʼe aʼtijuke lajan ja bʼa Wallkill. Ja diciembre bʼa 2009, jekjiye ja bʼa wa x-ajyi chapjelal ja bʼa Watchtower bʼa Patterson, bʼa ajiyi ja cholal bʼa ti oj aʼtijuk ja jmoj-aljeltik Cook ja bʼa Opisina wa xjul Korreoʼik bʼa Tsʼijbʼanum. Ja abril bʼa 2016, tsaʼan ja yajni mi albʼiye ja kumxiye ja bʼa Wallkill, ja jmoj-aljeltike Cook jekjiye bʼa Brooklyn. Sok, joʼe ixaw mas tsaʼan, jekjiye ja bʼa yechalil wa xkʼelxi ja kaʼteltik, wa xkan bʼa Warwick. Ja bʼa enero bʼa 2017, tʼoji ja jmoj-aljeltik Cook koltuman ja bʼa Tsome Olomalik bʼa Tsʼijbʼanum ja bʼa Tsome Tojwanum.