Kaʼax ja bʼa sbʼaʼal

Kaʼax ja bʼa sbʼaʼali

ARTIKULO BʼA SPAKLAJEL 4

«Ja Espíritu huax ya jac jcʼujoltik»

«Ja Espíritu huax ya jac jcʼujoltik»

«Huax bob jtatuctic ja Diosi porque ja Espíritu huax ya jac jcʼujoltic que meran yuntiquilotic nia» (ROM. 8:16).

TSʼEBʼOJ 25 Ja Dyos yeʼn stsaʼunej

JA JAS OJ PAKLAXUK *

Ja bʼa Pentecostés, ja Jyoba ya koʼuk ja yip bʼa jun tsome bʼa 120 nebʼumanik bʼa jun modo jel chaʼanyabʼal. (Kʼela ja parrapoʼik 1 sok 2).

1, 2. ¿Jasa jel chaʼanyabʼal ekʼ ja bʼa kʼakʼu Pentecostés bʼa jabʼil 33?

JAʼA kʼakʼu bʼa Pentecostés bʼa jabʼil 33. Jun sakbʼel domingo, sok ja bʼa Jerusalén tsomane 120 nebʼumanik bʼa jun kwarto bʼa nalan chaʼan (Hech. 1:13-15; 2:1). Jujuntik kʼakʼu bʼajtan, ja Jesús yalunejxa yabʼ bʼa akanuke ja bʼa chonabʼ yujni ay jas oj ajukyile bʼa jel chaʼanyabʼal (Hech. 1:4, 5). ¿Jasa ekʼi?

2 «Jun ta repente yabye jun ruido ja ba satqʼuinali, pero tzatz lec jastal huax jac ja bitus ja ba tzatz lequi. Lajan soc ti mero co ja ba yoj naitz ja ba culan ecʼ ja yenlei». Anto, ja nebʼumaniki yilawe «jastal yat cʼacʼ ti nocʼan sbaje», sok ja «Espíritu Santo ti yiaj majan ja stiei» (Hech. 2:2-4). Jach jastal modo it jel chaʼanyabʼal, ja Jyoba ya koʼyi ja yip sbʼaja nebʼumaniki (Hech. 1:8). Yeʼnani wajye ja matik bʼajtan tsajiye yuja espíritu santo * bʼa oj wajuke bʼa satkʼinal sok yajel mandar lajan soka Jesús.

¿JASA WA X-EKʼ YAJNI AY MAʼ WA STSAJI?

3. ¿Jas yuj ja nebʼumaniki mini tʼun ajyi sdudaʼe bʼa tsaʼubʼale yuja yip ja Dyos?

3 Lek weʼnbʼi junuk ja bʼa nebʼumanik jaw, mini oj chʼayuka kʼujol ja jas ekʼ ja kʼakʼu jaw. Koʼabʼaj jastal jun yajlubʼ kʼakʼ ja bʼa wa wolomi, sok ja weʼn kʼe kʼumanan bʼa tuktukil kʼumal (Hech. 2:5-12). Mini tʼun oj ajyuka duda bʼa tsaʼubʼala yuja ipal jaw. Pe ¿tolabida maʼ ja Dyos wa stsaʼa ja yaʼtijumiki bʼa jun modo jel chaʼanyabʼal sok junta maʼ jalon wa stsaʼa? Miyuk. ¿Jas yuj wa xkalatik ja it? La kiltik.

4. Ja bʼa bʼajtan siglo, ¿junta maʼ jalon tsajiye ja matik oj wajuke bʼa satkʼinali? Cholo.

4 La kiltik bʼajtan jasa wa x-ekʼ ja bʼa sjutsʼinil yajni wa stsaji june yuja yip ja Dyos. Ja tsome 120 nebʼumaniki mini kechan yeʼn tsajiye yuja yip ja Dyos ja bʼa Pentecostés bʼa jabʼil 33. Ja junxta ochkʼakʼu jaw, junuk 3,000 kristyano cha koʼ sbʼaje ja ipal jaw ja it skʼapunej ja Jesús. Pe ja yeʼnle ti tsajiye ja yajni yiʼaje jaʼi (Hech. 2:37, 38, 41). Pe ja bʼa jabʼilik jakumi, mi yibʼanaluke ti tsajiye ja yajni yiʼaje jaʼ. Ja samaritanoʼik tsajiye ja yajni ekʼta tyempo yiʼaje jaʼi (Hech. 8:14-17). Sok ama waj jun ekʼele jel chaʼanyabʼal, ja Cornelio sok ja spamilya tsajiye bʼajtanto oj yiʼe jaʼ (Hech. 10:44-48).

5. Jastalni wa xyala ja 2 Corintios 1:21, 22, ¿jasa wa x-ekʼ yajni june wa stsaji?

5 Ja wego la kiltik jasa wa x-ekʼ yajni wa stsaji june. Bʼa jun sjutsʼinil ja bʼa sakʼanile, ja matik tsaʼubʼale bʼobʼta wokol wa skʼuʼane tsajiyeta yuja Jyoba sok jas yuj yeʼnle. Ja tuki cha bʼobʼta pilan ja jastal wa xyabʼye. Chikan jastal, ja jekabʼanum Pablo xcholo jun jasunuk wa x-ekʼ sbʼaje: «Pe ja weʼnlex chomajkili wa jipa kʼujolex bʼa yeʼn ja yajni amaklayex ja yaljel bʼa smeranil, ja lekil notisyaʼik bʼa wa koltajelexi. Tsaʼan yajni akʼuʼanexta, kʼulajiyex seyar * yuja yeʼn soka yip ja Dyos kʼapubʼali, bʼa juni garantía sbʼaja jas oj ajukitiki» (Efes. 1:13, 14, TNM; nota). Jachniʼa, ja Jyoba wa xya makunuk ja yip bʼa yajel snaʼ ja yeʼn stsaʼunejxa. Ja yuj, ja yipi jachni jastal jun «garantía» wa x-ajiyile bʼa oj ajyuke seguro oj wajuke bʼa satkʼinal ja bʼa tyempo jakumi (kʼuman ja 2 Corintios 1:21, 22).

6. ¿Jasa tʼilan oj skʼuluk ja maʼ tsaʼubʼal bʼa oj wajuk ja bʼa satkʼinali?

6 Ta tsajita june bʼa oj wajuk bʼa satkʼinal yuja yip ja Dyos, ¿wan maʼ stojolan ja jaw seguroxa oj wajuk man satkʼinal? Miyuk. Kechanta wa stojolan tsajita. Pe tʼilan oj ya jul skʼujol ja rason it: «Jayuj quermano jumasa, cʼulanic fuerza. A iljuc que ti xa ayex ja ba sparte ja Cristo, que tzaubalex xa ni merana. Ta huanex cʼa fuerza, mi ni nunca oja huaex can jun lado ja Cristo» (2 Ped. 1:10). Ja yuj, ama tsajiyeta ma payjiyeta bʼa oj wajuke bʼa satkʼinal, kechantani oj wajuke ta ajyiye toji (Filip. 3:12-14; Heb. 3:1; Apoc. 2:10).

¿JASTAL WA SNAʼA JUNE TA TSAʼUBʼAL?

7. ¿Jastal wa snaʼawe ja matik tsaʼubʼal ojni wajuke bʼa satkʼinali?

7 Anto, ¿jastal wa snaʼa june ta payjita bʼa oj waj bʼa satkʼinal? Ja sjakʼjeli ti wa xchiknaji lek ja bʼa jas yala yabʼ ja Pablo ja matik teye bʼa Roma bʼa tsajiyeta ‹oj sbʼajuk› ja Jyoba. Yala yabʼye: «Ja Espíritu sbaj Dios ja it jcʼulantic ta recibir ja quentiqui, mi tʼenubalucotic yuj, mi ni huax xijtayotica ja jastal ja smodo ja pucuji. Yuj ja yeni, yuntiquilotic xa ni ja Diosa. Huax ya jnaatic jastal oj cʼumtic ja Diosi: O Dios, abajoticon nia, la chitic. Huax bob jtatuctic ja Diosi porque ja Espíritu huax ya jac jcʼujoltic que meran yuntiquilotic nia» (Rom. 1:7; 8:15, 16). Jachniʼa, ja yip ja Dyos wa xya snaʼ jaman lek ja matik tsaʼubʼali ojni wajuke bʼa satkʼinal (1 Tes. 2:12).

8. Jastalni wa xyala ja 1 Juan 2:20, 27, ¿jas yuj wa xnaʼatik ja matik tsaʼubʼale mi wa smajlaye oj aljuk yabʼye oj wajuke bʼa satkʼinal?

8 Ja Jyoba wa xya snaʼ ja matik wa x-ajiyile ja lokjelal bʼa wajel bʼa satkʼinal mok skʼul-e dudar ja bʼa spensare sok ja bʼa skʼujole (kʼuman ja 1 Juan 2:20, 27). Pe jastalni ja yaʼtijumik ja Dyos, ja matik oj wajuke bʼa satkʼinali cha tʼilan wa skʼanawe oj jejukyile yuja Jyoba ja bʼa kongregasyon. Pe mi wa smajlaye maʼ oj aljuk yabʼye bʼa tsajiyeta. Ja Jyoba yata chiknajukan jaman lek soka yespiritu santo, ja yipi.

OJ ‹MANXUKE OTRO VUELTA›

9. Jastalni wa xyala ja Efesios 1:18, ¿jasa wa x-ekʼ yajni wa stsaji june?

9 Bʼobʼta tʼusan mi spetsaniluk ja yaʼtijumotik Dyos ja wego wokol xkabʼtik yabʼjel stojol yajni ja Jyoba wa stsaʼa june. Sok sbʼejniʼa, pes yujni ja keʼntiki mi tsaʼubʼalukotik. Ja Dyos skʼulanotik bʼa oj ajyukotik sakʼan bʼa Luʼum sok mi tiʼuk bʼa satkʼinal (Gén. 1:28; Sal. 37:29). Pe stsaʼunej jujuntik bʼa oj wajuke bʼa satkʼinal. Ja yuj, yajni ja yeʼn stsaʼata, wa stukbʼesyi ja smajlajel yiʼoji sok ja spensar jach junta chʼaykʼujol sok tixa wa skʼana oj ajyuke sakʼan bʼa satkʼinal (kʼuman ja Efesios 1:18).

10. ¿Jas wa stojolan wa ‹xmanxi otro vuelta›? (Kʼela ja nota).

10 Yajni wa stsaji june yuja ipali, wa ‹xmanxi otro vuelta›. * Ja Jesús cha yala wokol xcholjel yabʼ june mi tsaʼubʼaluk bʼa oj yabʼ stojol jastal wa xyabʼye ja maʼ wa ‹xmanxi otro vuelta› (Juan 3:3-8).

11. ¿Jastalxa wa spensaraʼan june maʼ tsajita oj wajuk satkʼinal? Cholo.

11 ¿Jasa wa xtukbʼi bʼa june maʼ tsaʼubʼal oj wajuk bʼa satkʼinal? Ja ajyi jelni chaʼanyabʼal xyila smajlajel ajyel sakʼan tolabida bʼa Luʼum. Jeltoni skʼana yiljel yajni ja Jyoba xchʼaya snajel ja malo sok yajel paxuk ja Luʼum jun tsamal Kʼachinubʼ. Bʼobʼta wa xyila sbʼaj wan smajlajel ja spamilya ma ja yamigoʼik wan sakʼweljani. Pe ja wego ja tsajita, tukbʼita ja spensari. ¿Jas yuj? Mi jaʼuk yuja mixa skʼana oj ajyuk sakʼan ja bʼa Luʼumi. Ma yuja wokolik ma chamkʼujoliki, ma yujni jelxa oj axwuk ajyel sakʼan ja bʼa Luʼumi. Mi jaʼuk ja jaw, jani yuja Jyoba yata makunuk ja yip bʼa oj tukbʼuk ja spensari sok yajelyi jun yajkʼachil smajlajel.

12. Jastalni wa xyala ja 1 Pedro 1:3, 4, ¿jastalxa wa xyabʼ ja maʼ tsaʼubʼal yajni wa spensaraʼan ja jas oj ekʼ sbʼaji?

12 Bʼobʼta ja maʼ tsaʼubʼali wa xyabʼ mi wa sbʼajin ja niwan cholal jaw, pe mini tʼun skʼulan dudar ta tsaʼubʼal yuja Jyoba. Yajni wa spensaran sbʼaja jas wa smajlay, jeltoni xgustoʼaxi sok yajel tsʼakatal (kʼuman ja 1 Pedro 1:3, 4).

13. ¿Jastal wa xyilawe ja sakʼanil ja bʼa Luʼum ja matik oj wajuke bʼa satkʼinali?

13 ¿Wan maʼ stojolan ja it wanxa skʼana oj chamuke ja matik oj wajuke bʼa satkʼinali? Ja jekabʼanum Pablo wa sjakʼa jachuk: «Meran nia, ja janecʼ tiempo ti ayotic ja ba mundo soc ja jcuerpotiqui, ay huax jac jun triste ja ba jcʼujoltiqui. Lajan soc huas syatzʼa sbaj ja caltziltiqui. Jel chamcʼujol ayotic. Mi jauc que huax cʼanatic oj xa chamcotic. Jaʼ ni huax ocʼ jcʼujoltic ja vida jau oj to ni aajuc quitic yajcʼachili, soc ja jcuerpotic yajcʼachili» (2 Cor. 5:4). Anto mi jaʼuk yuj mixa skʼanawe ja sakʼanil it sok wanxa skʼana oj chamuke. Jaʼukto maʼ jaw, wa xyabʼye stsamalil ja sakʼanile sok wa skʼanawe yajel el slekilal yaʼteltajel ja Jyoba lajan soka spamilya soka yamigoʼe. Pe chikan jas wane skʼulajel, jaxani wajel skʼujol ja smajlajel yiʼoje (1 Cor. 15:53; 2 Ped. 1:4; 1 Juan 3:2, 3; Apoc. 20:6).

¿TSAʼUBʼALA MAʼ JA WEʼN?

14. ¿Jastik junuk mi sjeʼa bʼa tsaʼubʼala yuja yip ja Dyos bʼa oj wajan bʼa satkʼinal?

14 Bʼobʼta waxa jobʼo abʼaj ta stsaʼuneja ja Jyoba soka yipi. Ta jachuk, jel tʼilan oja waʼabʼaj ja sjobʼjelik it: ¿Jelto maʼ xkʼankʼuni juntiro akʼujol skʼulajel ja jas wa skʼana ja Jyoba?, ¿gustoxta maʼ waxa cholo?, ¿jelto maʼ xa kʼulan gusto spaklajel ja Biblia sok snebʼjel ‹jastik bʼa Dyos bʼa nakʼan ay›?, ¿yaʼunej koʼ slekilal ja Jyoba ja janekʼ waxa kʼujolan ja bʼa xcholjeli?, ¿waxa wabʼ weʼna chol skoltajel ja tuk bʼa kʼubʼan oj ajyuke soka Dyos?, ¿awilunej ja skoltanel ja Jyoba ja bʼa jitsan jastik wa x-ekʼ ja bʼa wa sakʼanili? (1 Cor. 2:10, TNM). Ta wala jachukniʼa, ¿wa stojolan ja it tsajiyata? Miyuk, yujni yibʼanal ja yaʼtijumik ja Jyoba, tsaʼubʼale ma miyuk, wa xbʼobʼ kabʼtik ja jaw. Chomajkil, ja Jyoba wa xbʼobʼ ya makunuk ja yip bʼa oj yayile ja ipal jaw chikan machʼa ja bʼa yaʼtijumiki, ta ti oj ajyuke sakʼan bʼa luʼum ma ti oj wajuke bʼa satkʼinal. Ja smeranili, ta waxa kʼulan dudar bʼa tsaʼubʼala yuja ipal it, wa stojolan mi tsaʼubʼala. Ja matik payubʼale mi skʼulane dudar ta tsaʼubʼale oj wajuke bʼa satkʼinal; ¡pes seguroni aye lek!

Ja Jyoba ya koʼyi ja yip sbʼaja Abrahán, ja Sara, ja David sok ja Juan Bautista bʼa oj skʼuluke jastik chaʼanyabʼal, pe mi ya makunuk bʼa stsajel oj wajuke bʼa satkʼinal. (Kʼela ja parrapoʼik 15 sok 16). *

15. ¿Jastal wa xnaʼatik mi yibʼanaluk ja matik wa xkoʼ sbʼaje ja yip ja Jyoba oj wajuke bʼa satkʼinal?

15 Ja Biblia wa staʼa tiʼal bʼa jitsan yaʼtijumik toj bʼa ajiyile ja yip ja Dyos, pe mi tsaʼubʼale oj wajuke bʼa satkʼinal. Jun sjejel, ja David toji yuja yip ja Dyos (1 Sam. 16:13). Ja it koltaji bʼa oj yabʼ stojol jastik junuk jel chaʼanyabʼal bʼa Jyoba sok toji bʼa oj stsʼijbʼuk jujuntik libroʼik bʼa Biblia (Mar. 12:36). Ama jachuk, ja jekabʼanum Pedro yala sbʼaja David «mi [...] qʼue ja ba satqʼuinali» (Hech. 2:34). Chomajkil ja Juan Bautista tini ajyi «ba scʼab ja Espíritu Santo» (Luc. 1:13-16). Sok ja Jesús yala: «Mi ni june ja maʼ acʼubal yi yatel como jastal aaji yi ja Juani». Ama jachuk, ja Jesús xcholo ja Juan mini ti oj ajyuk ja bʼa Gobyerno bʼa satkʼinali (Mat. 11:10, 11). Ja Jyoba ya makunuk ja yip bʼa oj skʼuluke jastik chaʼanyabʼal, pe mi ya makunuk bʼa stsajel oj wajuke bʼa satkʼinal. ¿Wan maʼ stojolan ja it mas mi toj wajye yuja matik oj wajuke bʼa satkʼinali? Miyuk, kechanta wa stojolan ja Jyoba oj ya sakʼwuk ja bʼa Kʼachinubʼ oj ajyuk ja bʼa Luʼumi (Juan 5:28, 29; Hech. 24:15).

16. Tʼusan mi spetsanil ja yaʼtijum Dyos ja bʼa jtyempotik, ¿bʼa wa smajlaye oj ajyuke sakʼan?

16 Ja bʼa jtyempotiki, tʼusan mi spetsaniluk ja yaʼtijumik ja Dyos bʼa ti oj ajyuke sakʼan bʼa Luʼum mey yiʼoje ja smajlajel bʼa wajel bʼa satkʼinal. Junxta jastal ja Abrahán, ja Sara, ja David, ja Juan Bautista sok tuk winik sok ixuke bʼa tyempo najate, wa skʼanawe oj ajyuke sakʼan bʼa Luʼum ja bʼa sGobyerno ja Dyos (Heb. 11:10).

17. ¿Jastik sjobʼjel oj jpaklaytik ja bʼa artikulo jakumi?

17 Ayto jujuntik bʼa tito aye bʼa Luʼum ja wego. Ja yuj, ayni sbʼej oj ajyuk jdudatik (Apoc. 12:17). Jun sjejel, ¿jastal tʼilan oj yil sbʼaje ja matik oj wajuke bʼa satkʼinali? ¿Jastal oj kiltik june maʼ xkʼe yuʼ ja vino sok wa xkʼe yabʼ ja pan ja bʼa Conmemoración ja bʼa jkongregasyontiki? ¿Lek maʼ wa xcham jkʼujoltik ta wan pojxel ja matik oj wajuke bʼa satkʼinal jabʼil jabʼil? Ja artikulo jakumi oj paklaxuk ja sjobʼjelik it.

^ par. 5 Man Pentecostés bʼa jabʼil 33, ja Jyoba yaʼunejyi jujuntik kristyano ja majtanal bʼa oj bʼobʼ yaʼe mandar lajan soka Yunin ja bʼa satkʼinali. Pe ¿jastal wa snaʼawe ta yeʼn tsaʼubʼale ja bʼa niwan cholal it? ¿Jasa wa x-ekʼ yajni wa xlokjiye? Ja bʼa artikulo it, bʼa ti elel bʼa Ja Juʼun Cholumani bʼa enero bʼa 2016, oj yakitik sjakʼjel ja sjobʼjelik it jel chaʼanyabʼaliki.

^ par. 2 YALJEL JEL TʼILAN: Ja matik tsaʼubʼale yuja espíritu santo. Ja Jyoba wa xya makunuk ja yip ma ja yespiritu bʼa oj ya snaʼ june tsaʼubʼal bʼa oj ya mandar lajan soka Jesús bʼa satkʼinal. Yuja ipal it, wa x-ajiyile jastal jun «garantía» ma senya bʼa ojni wajuke bʼa satkʼinal ja bʼa tyempo jakumi (Efes. 1:13, 14). Ja yuj, wa xbʼobʼ alxuk ja ipal it wa xya ‹jak skʼujole› ja smajlajel yiʼoje tey bʼa satkʼinal, wa xkʼan kaltik ja espíritu santo wa xya snaʼ jaman lek (Rom. 8:16).

^ par. 5 YALJEL JEL TʼILAN: Ja maʼ yiʼonej ja seyo it mi wa stojolan seguroxa oj waj bʼa satkʼinal manto ta toj chami ma tʼusan bʼajtan oj kʼeʼuk ja niwan wokoli (Efes. 4:30, TNM; Apoc. 7:2-4; kʼela ja xetʼan «Preguntas de los lectores» bʼa La Atalaya bʼa abril 2016).

TSʼEBʼOJ 27 Oj sjeʼ sbʼaje ja yuntikil ja Dyos

^ par. 57 XCHOLJEL SBʼAJA POTO: Ama presoʼaytik yuja skʼuʼajel kiʼojtiki ojni kabʼtik stsamalil ja libreʼil bʼa xcholjeli, sjejel ja smeranil bʼa Dyos sok wa xbʼobʼ jmajlaytik oj ajyukotik sakʼan ja bʼa Luʼum ja bʼa smandaranel ja sGobyerno ja Dyos.