«JA CRISTIANO, jel xa chapan juntiro ja scʼujolei. Lajane soc jun alaj ja ba huan xa smajlajel ja sachjeli. Pero ja atjumi, jel tʼusan, jayuj cʼanahuic yi ja suinquil ja alaji ba oj sec mas ja atjumi» (Luc. 10:2). Ja yaljelik it yala ja Jesús bʼa junukxa chabʼ mil jabʼil, wa xchiktes lek ja jastal wa xtax ja Myanmar ja bʼa jtyempotiki. ¿Jas yuj? Yujni ja bʼa Myanmar kechan ay 4,200 cholumanik bʼa wa xcholowe ja lekil rason bʼa 55 miyon ixuk winik.

Pe ja Jyoba, ja «swinkil ja alaji», snikunejyi ja skʼujol jitsan jmoj-aljeltik bʼa jitsan lugarik bʼa oj wajuke ja bʼa país it bʼa Asia sok oj koltanuke ja bʼa aʼtel bʼa Dyos. ¿Jasa nikubʼale bʼa oj yaʼekan ja spaise? ¿Jastal bʼobʼ skʼuluke ja jaw? ¿Jastik slekilal wane yiljel? La kiltik.

Ayxa jujuntik jabʼil, ja Kazuhiro, jun precursor bʼa Japón, ajiyi jun atake, tup yikʼ sok iji bʼa ospital. Aljiyabʼ yuja loktori chabʼ jabʼil mi oj syam karro. Ja Kazuhiro mini skʼuʼan ta meran ja jas ekʼ sbʼaji sok spensaraʼan: «¿Jas oj jkʼuluk? Ja jasa mas jel xkʼulan gusto jani ja precursorili sok mini wa xkʼana oj kakan». Spatayi skʼujol ja Jyoba sok spetsanil ja yipi bʼa oj koltajuk bʼa tuk modo bʼa mi oj yakan ja precursoril.

Ja Kazuhiro wa xcholo: «Jun ixaw tsaʼan, jun kamigo bʼa ti wan koltanel bʼa Myanmar yabʼ ja jas ekʼ jbʼaji. Skʼumayon sok yala kabʼ: ‹Ja bʼa Myanmar sokni autobús wala bʼejyitikon. Ta jakya, ojtoni bʼobʼ ajyan precursoril sok mi yajnaluk juna karro›. Jobʼoyi ja loktori ta oj bʼobʼ wajkon kulan bʼa Myanmar ama ayuk kiʼoj chamel. Chamto kabʼ ja yala: ‹Jun loktor bʼa chijnakʼal bʼa Myanmar ti wan ulatanel bʼa Japón ja wego. Oj jeʼawi. Ta cha yawi pilan ekʼele ja atake, yeʼn oj bʼobʼ skoltaya›. Bʼa keʼna yeʼnani sjakʼaki ja Jyoba».

Ja Kazuhiro wegoxta sjeka jun correo ja bʼa naʼits Betel bʼa Myanmar bʼa yaljel ja yeʼn soka xcheʼumi wa skʼana oj aʼtijuke precursor ja tiw. Kechanta ekʼ joʼe kʼakʼu, ja naʼits Betel yaʼa ja sjakʼjel: «Laʼik, wa xkʼanatikon mas precursor». Ja Kazuhiro soka xcheʼum, Mari, xchonowe ja skarroʼe, yawe eluk ja sjuʼune sok smana ja sboletoʼe bʼa abyon. Ja yeʼnle jelni gusto wane skoltajel jun kʼole bʼa lenguaje bʼa señas Mandalay. Ja Kazuhiro wa xyala: «Spetsanil ja jas ekʼel jbʼajtikoni jel yaʼunej tsatsbʼuk ja skʼuʼajel kiʼojtikon sbʼaja kʼapjelal bʼa Salmo 37:5, bʼa wa xyala: ‹Ayi jawa  bʼej ja Jyoba; jipa akʼujol bʼa yeʼn, sok ja yeʼn ti oj ajyuka mok›».

Ja bʼa 2014, ja taʼumantiʼik bʼa Jyoba bʼa Myanmar ajyiyujile ja niwan cholal yuja ti ajyi jun niwan tsomjelal jel chaʼanyabʼal. Jitsan jmoj-aljeltik bʼa tuk paisik wajye ja bʼa niwan tsomjel jaw. June bʼa yeʼnle jaʼa Monique, jun jmoj-aljeltik ixuk bʼa Estados Unidos bʼa ayiʼoj 34 jabʼil. Wa xyala: «Yajni kumxiyon ja bʼa niwan tsomjeli, kayi orasyon ja Jyoba sbʼaja jas oj jkʼuluk soka jsakʼanili. Cha loʼilaniyon soka jnantat sbʼaja jkʼelsatik. Sok jelni lek yabʼye ja oj waj koltanukon bʼa Myanmar. Pe bʼajtanto oj jkʼuluk ja it, jelni kayi orasyon sok ka ekʼ tʼusan tyempo». Ja Monique wa xyala jas yuj.

Wa xyala: «Ja Jesús yala yabʼ ja snebʼumanik bʼa yiljel janekʼ takʼin oj xchʼak-e. Ja yuj jobʼo jbʼaj ja keʼn: ‹¿Ay maʼ kiʼoj ja takʼin oj makunukuj bʼa oj jkʼuluk ja it? ¿Oj maʼ bʼobʼ jtup ja jas wa xkʼana sok mi oj aʼtijukon jitsan tyempo?›». Ja Monique wa xyala: «Wego kila mi oj yaʼ ja takʼin kiʼoj bʼa oj wajkon man bʼa pilan skʼaxil ja luʼumkʼinali». Anto, ¿jasa skʼulan bʼa oj wajuk? (Luc. 14:28).

Wa xcholo: «Jun kʼakʼu, ja kixawali yala oj waj jkʼumuk. Jel xiwyon, jpensaraʼan ta yuj mixa oj yaki kaʼtel. Jaʼukto maʼ, yaki tsʼakatal yuja lekil aʼtel wa xkʼulani sok yala skʼulunej ja janekʼ bʼobʼel yuj bʼa oj yaki jun jmajtan takʼin. Sok jani mero ja janekʼ wa xkʼana bʼa oj chʼak jtup ja jeli».

Man diciembre bʼa 2014, ja Monique ti wan koltanel bʼa Myanmar. ¿Jastal wa xyabʼ koltanel bʼa jun lugar bʼa wa xkʼanxi mas cholumanik? Ja yeʼn wa xyala: «Jel gustoʼayon yuja teyon ili. Wanon yajelyi estudio oxe ixuke. June bʼa yeʼnle ayxa yiʼoj 67 jabʼil bʼa gustoxta wa xyila ja wala kʼotyoni sok wa xyaki jun jtelbʼech. Yajni snebʼa ja Dyos sbʼiʼil Jyoba, jak pamaljuk ja yalel sati. Yala kabʼ: ‹Jaʼa sbʼajtanil ekʼele wa xkabʼ ja sbʼiʼil ja Dyosi. Mastoni akʼixa yuja keʼn sok ajeʼunejki ja jas mas tʼilan bʼa jsakʼanili›. Ja smeranili cha snikaki jkʼujol ja keʼn. Ja jastik junuk it wa x-ekʼa bʼaji wani xya awabʼ stsamalil ja wajel koltanel bʼa jun lugar wa xkʼanxi koltanel». Ajkʼachtikto, ja Monique waj ja bʼa Eskwela bʼa Cholumanik sbʼaja sGobyerno ja Dyosi.

Ja jas yala ja Anuario de los testigos de Jehová 2013 sbʼaja Myanmar cha nikji skʼujole jujuntik bʼa oj wajuke ja bʼa país jaw. Jun jmoj-aljeltik ixuk ti ajyi kʼulan bʼa Asia bʼa junuk 30 sjabʼil, sbʼiʼil Li, sok wa x-aʼtiji jitsan oraʼik, ja jas skʼuman ja bʼa Anuario nikji yuj bʼa oj spensaraʼuk wajel koltanel bʼa Myanmar. Ja yeʼn wa xyala: «Ja bʼa 2014, yajni wajyon ja bʼa Yangón ja bʼa niwan tsomjelal jel chaʼanyabʼalil, jnaʼa sbʼaj jun nupanum wan koltanel bʼa kʼumal chino bʼa Myanmar. Yuja wa xnaʼa chino, jpensaraʼan wajel bʼa Myanmar bʼa koltanel ja bʼa kʼumal jaw. Ja Monique soka keʼn jpensaraʼantikon wajel junxta bʼa Mandalay. Ja Jyoba ya koʼ jlekilaltikon sok jtaʼa jun kaʼteltikon bʼa mi jitsan oraʼuk bʼa maestraʼil bʼa junxta eskwela. Chomajkil, jtaʼatikon jun naʼits bʼa mi najatuk wa xkiʼajtikon. Ama jel yaj ja kʼaʼuji sok tuk yal wokolik, jelni xkabʼ stsamalil koltanel ja il. Ja ixuk winik bʼa Myanmar yiʼoje jun sakʼanile mi jel chaʼanyabʼaluk, jel lek ja smodoʼe sok jel pwesto aye bʼa smaklajel ja rason bʼa Biblia. Jelni tsamal yiljel jastal ja Jyoba wan yajel koʼ slekilal ja xcholjeli. Wani xkʼuʼan lek ja Jyoba wa skʼana mi oj kakan koltanel ja il bʼa Mandalay».

Jitsan jmoj-aljeltik bʼa wane koltanel bʼa territorioʼik bʼa wa xkʼanxi mas cholumanik yiluneje ja ipal yiʼoj ja orasyoni. Jun sjejel, ja Jumpei soka xcheʼum Nao, bʼa masxa ja 30 jabʼil yiʼoje, wane aʼtel ajyi bʼa  jun kongregasyon bʼa lenguaje bʼa señas bʼa Japón. ¿Jas yuj wajye bʼa Myanmar? Ja Jumpei wa xcholo: «Ja keʼn soka jcheʼumi tolabida ajyel ja jkʼelsatikon bʼa wajel koltanel bʼa pilan país. Jun jmoj-aljeltik ja bʼa jkongregasyontikon bʼa lenguaje bʼa señas waj bʼa Myanmar. Cha jachuk ja keʼntikoni wajtikon bʼa mayo bʼa 2010, anima mi jnolunejtikon jitsan takʼin. Ja jmoj-aljeltik bʼa Myanmar jelni gusto yilawe ja kʼotikoni». ¿Jasa wa xyala ja Jumpei sbʼaja xcholjel bʼa Myanmar? Wa xyala: «Ja ixuk winik jel skʼanawe smaklajel ja lekil rasoni. Yajni wa xyilawe ja bideoʼik bʼa lenguaje bʼa señas, ja matik mi xyabʼye kʼinali jel cham xyilawe. Jelni gustoʼaytikon yuja jaktikon ja bʼa lugar it».

¿Jasa skʼulunej ja Jumpei soka Nao bʼa oj stup-e ja jasa wa xmakuniyujile? Ja yeʼn wa xcholo: «Yajni oxexa jabʼil teytikon tiw, tʼusani mi chʼakta jchʼaktikon ja jtakʼintikoni sok mixani ay kiʼojtikon bʼa oj jtuptikon ja renta ja bʼa jabʼil jakumi. Katikonyi jitsan orasyon ja Jyoba. Ja jasa ekʼ jbʼajtikoni, ja naʼits Betel slokowotikon aʼtel precursor especial bʼa jun tyempo. Jipa jkʼujoltikon bʼa Jyoba sok mini yaʼawotikonkan. Tolabida stalnunejotikon». Ajkʼachtikto, ja Jumpei soka Nao wajye ja bʼa Eskwela bʼa Cholumanik sbʼaja sGobyerno ja Dyos.

Ja Simone, jun jmoj-aljeltik bʼa Italia bʼa ayiʼoj 43 jabʼil, soka xcheʼum, Anna, bʼa ti sbʼaj bʼa Nueva Zelanda sok ayiʼoj 37 jabʼil, wajye kulan bʼa Myanmar. ¿Jasa nikjiye yuj? Ja Anna wa xyala: «Jaʼa Anuario bʼa 2013 bʼa kʼumani sbʼaja Myanmar». Ja Simone cha wa xyala: «Juni chaʼan cholal ajyel ja bʼa Myanmar. Ja tiw kiʼojtikon jun jsakʼaniltikon mi chaʼanyabʼaliluk sok wani xbʼobʼ kaʼteltay mas ja Jyoba. Jelni xyaʼa gusto yiljel ja Jyoba wa stalnayotik ja yajni wala wajtik koltanel bʼa pilan lugar bʼa wa xkʼanxi mas cholumanik» (Sal. 121:5). Ja Anna wa xcha yala: «Mini bʼa jel gusto ajyelon jastal wego. Kiʼoj jun jsakʼanil mi chaʼanyabʼaliluk sok mas wa xkaʼ ekʼ tyempo soka jtatami; masxa tsoman ayotikon. Chomajkil, jtaʼunejtikon lekil kamigotikon. Ja ixuk winiki mini tuk xyilawe ja Taʼumantiʼiki, jelni chamyiljel jawa skʼanawe snebʼjel ja smeranili». ¿Jas wa xkʼan yale?

Ja Anna wa xcholo: «Jun kʼakʼu, jcholo yabʼ jun eskwelante bʼa universidad ja bʼa merkado sok kalayabʼ oj cha jtaʼ jbʼajtikon pilan ekʼele. Yajni cha jtaʼa jbʼajtikon pilan ekʼele, ja yeʼn yiʼajan jun yamiga. Jaxa pilan ekʼele yiʼajan mas yamiga sok tsaʼan cha yiʼajan mas. Ja wego, joʼe wanon yajel yile estudio». Ja Simone wa xyala: «Ja ixuk winik bʼa wa xcholotikon yabʼye jel lek ja smodoʼe sok jel yiʼoje sjobʼjelik. Jel skʼanawe smaklajel ja rasoni. Ja smeranili mey kiʼojtikon jitsan tyempo bʼa yajel yile estudio».

¿Jasa skʼuluneje jujuntik bʼajtanto oj wajuke koltanel bʼa Myanmar? Ja Mizuho, bʼa Japón, wa xyala: «Ja jtatam Sachio sok ja keʼn jelni jkʼanunejtikon wajel  koltanel bʼa pilan país bʼa wa xkʼanxi jitsan cholumanik. ¿Pe bʼa lugaril? Ja jastik wa xyala sbʼaja jmoj-aljeltik ja bʼa Anuario 2013 kʼot man jkʼujoltikon. Ja yuj jpensaraʼantikon wajel koltanel bʼa Myanmar». Ja Sachio wa xyala: «Jpensaraʼantikon wajel jun semana ja bʼa Yangón, ja chonabʼ mas jel tʼilan bʼa Myanmar. Jkʼanatikon stsʼelsatijel ja lugar jaw. Ja ulatanel jaw ya kiltikon tʼilani oj wajkotikon tiw».

Ja Rodney soka xcheʼum, Jane, ti sbʼaje bʼa Australia sok ayiʼoje junuk 50 jabʼil. Ja yeʼnle soka yuntikile, ja Jordan soka Danica, wane koltanel bʼa Myanmar man 2010. Ja Rodney wa xcholo: «Jel snikawotikon ja kʼankʼunel yiʼoje ja ixuk winik ja snebʼjel bʼa Dyos. Wa xloko ja pamilyaʼik ta oj bʼobʼ yujile koltanel bʼa jun país jastal ja Myanmar». ¿Jas yuj wa xyala? Ja yeʼn wa xcholo: «Ja slekilal kilunejtikon yuja teyotikon il mini jas oj slaj. Jitsan keremtik akʼixuk jel chamkʼujol aye yuja steleponoʼe, ja skarroʼe, ja aʼtelik sok tuk jastik junuk. Ja kuntikiltikoni jelni latsan aye bʼa snebʼjel yajkʼachil yaljelik ja bʼa xcholjeli. Wa skʼanawe snebʼjel bʼa sjejelyi ja ixuk winik bʼa mi wa snaʼawe sbʼaja Biblia sok yajel skomentaryoʼe ja bʼa tsomjeliki. Jelni wajel skʼujole ja bʼa jastik junuk jaw sok tuk aʼtelik bʼa Dyos bʼa jel xnikwani».

Ja Oliver jun jmoj-aljeltik bʼa Estados Unidos bʼa 37 sjabʼil. Wa xcholo jas yuj lek wajel koltanel bʼa pilan país: «Yaʼteltajel ja Jyoba bʼa pilan lugar jelni kaʼunej el slekilal. Ajyel kulan bʼa pilan lugar yaʼunej tsatsbʼuk ja sjipjel jkʼujol soka skʼuʼajel kiʼoj bʼa Jyoba, chikan jas xtʼaspuntik. Aʼtel sok matik mi xnaʼa sbʼaje, pe bʼa junxta skʼuʼajel kiʼojtikon, skoltunejon bʼa yiljel mini ay jun jasunuk mas tʼilan yuja sGobyerno ja Dyosi». Ja bʼa jtyempotiki, ja Oliver soka xcheʼum, Anna, kongana wane xcholjel yabʼ ja lekil rason ja ixuk winik bʼa wa xkʼumaniye chino.

Ja Trazel, jun jmoj-aljeltik ixuk bʼa Australia bʼa 52 sjabʼil, wan koltanel bʼa Myanmar man 2004. Ja yeʼn wa xyala: «Wa xlokowex ja janekʼ wa xbʼobʼa wujilex bʼa oj wajanik koltanel bʼa jun lugar wa xkʼanxi mas cholumanik. Kilunej ja Jyoba wa xya koʼ slekilal ja maʼ wa skʼana oj aʼteltajuk yuji. Mini ekʼ bʼa jpensar ta oj ta jun jsakʼanil jastal it. Jani it ja lekil sakʼanil wa xbʼobʼ jtatik».

Wa xmajlaytikon ja yaljelik yalawe ja jmoj-aljeltik it a-stsatsankʼujoluka bʼa spensarajel ta oj bʼobʼ akoltay ja ixuk winik bʼa meran wa skʼanawe snajel ja bʼa territorio bʼa mito maʼ wa xcholo. Jach jastal ja jmoj-aljeltik matik wane aʼtel ja bʼa lugarik jaw wane yaljelawabʼ: «¡Ekʼan bʼa Myanmar sok koltayotikon!».