La jnatik syajulal spetsanil tikʼe ixuk winik
YAJNI ja Jesús sjeʼayi ja snebʼumanik jastal a-xchol-e ja lekil rasoniki, wani snaʼa mi spetsanil ja ixuk winik gusto oj yabʼye (Luc. 10:3, 5, 6). Ja bʼa xcholjeli, ay ekʼele wa xtaʼatik ixuk winik bʼa tsats oj sjakʼ-e ma jel kʼakʼe. Yuja modoʼalik it, mini pasiluk tolabida oj jnatik syajulale.
Ja maʼ wa snaʼa yajulali wa xyila ja jasa wa xmakuniyuj ja tuki soka wokolik yiʼoji, wa snaʼa syajal sok wa skʼana oj skoltay. Ta chʼaykujtik ja snajel yajulali, oj chʼaykujtik ja gustoʼil ja bʼa xcholjeli sok mixa jel lek oj jkʼuluktik. Pe ta jkʼujolantik bʼa snajel yajulal ojni koltanuk bʼa mi oj chʼayuk ja gustoʼil kiʼojtiki. Jach jastal xchʼikjelyi siʼ jun tsome kʼakʼ bʼa mi oj tupuk (1 Tes. 5:19).
¿Jastal oj bʼobʼ jnatik mas syajulal ja tuk anima wokol xkabʼtik? La jpaklaytik oxe sjejelik bʼa wa xbʼobʼ jnochtik: ja bʼa Jyoba, Jesús soka bʼa jekabʼanum Pablo.
LA JNOCHTIK JA JASTAL WA SNAʼA YAJULAL JA JYOBA
Bʼa jitsanxa mil jabʼil, ja Jyoba kuchelyuj ja wa x-alji kistal abʼalik sbʼa ja yeʼn. Pe anima, wani sjeʼayi lekil skʼujol «ja maʼ mi ni stzʼacatal huas scʼanahuei soc ja maʼ jel timasani [malo]» (Luc. 6:35). Sok sjeʼunej soka yuja ajyel spasensya. Ja yeʼn «huas scʼana que mi ni june oj chʼayuc ja caltziltiqui» (1 Tim. 2:3, 4). Anima wa xyijnay ja jastik malo, jel chaʼanyabʼalil wa xyila ja ixuk winik sok mini june wa skʼana a-xchʼay ja sakʼanili (2 Ped. 3:9).
Ja Jyoba wa snaʼa ja Satanás smakunej ja spensar ja matik mi kʼuʼumanukeʼi (2 Cor. 4:3, 4). Man xchʼinile, jitsan jeʼubʼalyile skʼuʼajelik sok modoʼalik bʼa mi sbʼejuk. Ja yuj, wokolni xyabʼye skisjel ja smeranili. Pe ja Jyoba xkʼankʼuniyuj oj skoltay ja yeʼnleʼi. ¿Jastal wa xnaʼatik?
La kiltik ja jasa ekʼ sbʼaj ja swinkil Nínive. Anima jel spekʼawe chikʼ, ja Jyoba yala yabʼ ja Jonás: «¿Mi maʼ sbʼejuk oj cha jnaʼ syajal ja Nínive ja niwan chonabʼi, bʼa ay mas ja 120 mil winike bʼa mi snaʼawe ja bʼa leki soka bʼa mi lekuki, sok chomajkil ja jitsan xchante yiʼojeʼi?» (Jon. 4:11). Ja Jyoba yila ja swinkil Nínive mini tʼun ayiʼoje snajel sbʼaja yeʼn. Ja yuj snaʼa syajulal sok sjeka ja Jonás bʼa oj waj yal ja jasa wa spensaran oj skʼuluki.
Jastalni ja Jyoba, ja keʼntiki wa xcha kilatik chaʼanyabʼal ja ixuk winiki. Wa xbʼobʼ jnochtik ja yeʼn ta ay kiʼojtik ja tsatsal kʼankʼunel bʼa skoltajel ja matik wa smaklayeʼi, anima lajansok mi oj skis-e ja smeranili.
LA JNOCHTIK JA JASTAL WA SNAʼA YAJULAL JA JESÚS
Jastalni ja sTati, ja Jesús snaʼa syajulal sbʼaja matik wa skʼana skoltajele sbʼaja Dyosi: «Cuando yila jel ja cristiano mi xa snaa jas oj scʼuluque, lajane xa bi soc ja chej ba suelto xa ni ayi, mi xa ay tanuman. Jayuj ti jel jac syaal scʼujola [snaʼa syajulal]» (Mat. 9:36). Ja Jesús mi kechanta yila ja splantaʼeʼi. Snaʼa ja matik oj maklajukyuji jeʼubʼalyile jastik mi stojoluk sok ixtalanubʼale yuja tantik olomalik skontraʼe ja Jesús. Anima wa snaʼa jitsan bʼa yeʼnle mini oj nochjuk yuja oj ekʼ sbʼaje jujuntik wokolik, pe jel ‹jel jitsan ja jas sjeʼayileʼi› (Mar. 4:1-9).
Mini x-el jganatik ta jun ixuk winik mi jel skʼana ja bʼajtani
Ja sakʼanil ja ixuk winiki wa xtukbʼi, sok ja modoʼal yiʼoje sbʼaja smeranili ojni cha tukbʼuk
Yajni ja ixuk winik mi lek xyabʼye ja jasa wa xcholotik yabʼyeʼi, la jobʼ jbʼajtik jas yuj jach wa sjakʼawe sok mi jaʼukta oj waj jkʼujoltik ja splantaʼe. Bʼobʼta jujuntik mi skisawe ja Biblia ma ja snochuman Kristo yuj smul ja jastik mi lek wa skʼulane ja matik wa xyalawe snochumane Kristo. Sok tuk bʼobʼta alubʼal yabʼye abʼalik sbʼaja jastik wa xkʼuʼantiki. Ma jujuntik wa xiwye oj kʼenajuke yuja sbesinoʼe ma spamilyaʼe ta smaklayotiki.
Jujuntik bʼobʼta mi lek sjakʼawe yujni ekʼel sbʼaje jastik jel yaj bʼa yajbʼesnubʼal ja jastal wa xtaxyeʼi. Jun misionera sbʼiʼil Kim wa xyala: «Bʼa jun lugar ja bʼa wa xcholotikoni, jitsan yiʼaje wokol yuj jun guerra bʼa chʼak chʼayujile ja jastik sbʼajeʼi. Mixa ayiʼoje jun meran smajlajel. Mixa gusto ayuke sok mixa sjipa skʼujole bʼa tuk. Tikʼanxta wa xtaʼatikon ixuk winik ja tiw bʼa mi lek xyilawe ja lekil rasoniki. Bʼa jun ekʼele utjiyon ja yajni wanon xcholjeli».
¿Jas wa skʼulan ja Kim bʼa mi oj chʼayuj ja snajel yajulal? Wa xyala: «Yajni mi lek wala iljiyon, wa xleʼa modo yajel jul jkʼujol ja yaljelik bʼa Proverbios 19:11: ‹Ja sbiboʼil jun winik wa xya lamxuk ja skoraja›. Yajel tʼabʼan jkʼujol ja jastal wa xtaxye ja ixuk winiki wa skoltayon bʼa oj jnaʼ syajulale. Sok mi spetsaniluke mi lek xyilawotikone. Ja bʼa lugar jaw jtaʼunejtikon matik jel lek wa xkulataytikone».
Oj cha bʼobʼ jobʼ jbʼajtik jastal maʼ oj jakʼtik ja lekil rason sbʼaja sGobyerno ja Dyos lek keʼnuktik ja ixuk winik ja bʼa wa xcholotiki. Jun sjejel, lek tikʼanukxta wa x-aljikabʼtik abʼalik sbʼaja taʼumantiʼik bʼa Jyoba, bʼobʼta mini oj jkʼultik gusto ja oj choljuk kabʼtiki sok wa xkʼanatik anajuk jyajulaltik. Yajel juljkʼujoltik ja mandar yaʼa ja Jesús bʼa skʼulajelyi ja tuk ja jastal wa xkʼanatik akʼulajukitik ja keʼntiki oj snik-otik bʼa yabʼjel syajal ja tuki, anima wokol xkabʼtik (Mat. 7:12).
LA JNOCHTIK JA JASTAL SNAʼA YAJULAL JA PABLO
Ja jekabʼanum Pablo snaʼa syajulal ja tuki soka matik kontraʼanumik bʼa jel kʼakʼeʼi. Pes mini chʼay skʼujol jastal ja smodo ajyi ja yeʼn. Yala: «Jel piero huax taa tiʼ ajyi. Jel juntiro quixtalaan. Mi alben ja jas huax cala sbaj ajyi. Pero ja Diosi jel stalna jyaujulal [...] porque mi to creyenteucon, [...] mix naa ja jas huanon scʼulajel eqʼue» (1 Tim. 1:13). Snaʼa kʼot najuk syajal yuja Jyoba soka Jesús. Yajni yila jastale jujuntik ja bʼa matik xcholo yabʼi, kʼotni maʼ snaʼ cha jach ajyi ja yeʼni.
Ay ekʼele, ja Pablo staʼa matik ayiʼoje skʼuʼajelik mi meranuk bʼa tsʼunan lek. ¿Jastal sjakʼa ja yeʼn? Bʼa jun ekʼele ja yajni ti ajyi bʼa Atenas, ja yeʼn «jel chamel skʼujol yajni yila ja kʼulubʼal dyos ja bʼa chonabʼ jawi» (Hechos 17:16, Ja yajkʼachil sju‘unil ja dyosi). Ja Pablo ya makunuk ja jasa jel aji cham skʼujoli bʼa skʼulajel jun lekil xcholjel (Hech. 17:22, 23). Ja yeʼn wa xyila jas tikʼe ixuk winike bʼa jach oj xchol yabʼye ja janekʼ wa xbʼobʼyuj bʼa oj staʼ sakʼanil jujuntik bʼa yeʼnle (1 Cor. 9:20-23).
Yajni wa xtaʼatik june bʼa mi lek xyabʼ ma ayiʼoj skʼuʼajelik bʼa mi stojoliluk, wa xbʼobʼ jkʼuluktik jastalni ja Pablo. La katik makunuk ja jasa wa xnaʼatik sbʼaja ixuk winik bʼa skoltajele a-snaʼe ja ‹lekil yaljelik bʼa jastik lek› (Is. 52:7). Jun jmoj-aljeltik sbʼiʼil Dorothy wa xyala: «Jitsan ixuk winik ja bʼa wa xcholotikoni jeʼubʼalyile ja Dyosi jel tsats wa skʼanakitik kwenta. Bʼajtan wa xkala yabʼye jel lek ja ayiʼoje tsatsal skʼuʼajel bʼa Dyos sok tsaʼan wa xjeʼayile ja jasa wa xyala ja Biblia sbʼaja syajal skʼujol ja Jyoba soka jas wa skʼapa ja bʼa tyempo jakumi».
‹KʼULAN GANAR JA MALO BʼA SKʼULAJEL JA BʼA LEKI›
Ja smodoʼe jujuntik ixuk winik ja bʼa wa xcholotik yabʼyeʼi «mastoni oj ipaxuk-el» ja yajni wantik ochel och «ja bʼa tsaʼanikxta kʼakʼu» (2 Tim. 3:1, 13, TNM). Pe mok katikan ja it a-xchʼay kitik ja gustoʼil ma ja snajel yajulali. Ja Jyoba oj ya kiptik bʼa skʼulajel ‹ganar ja malo skʼulajel ja bʼa leki› (Rom. 12:21). Jun precursora sbʼiʼil Jessica wa xcholo: «Tikʼanxta wa xtaʼa ixuk winik jel niwan wa xyaʼa sbʼaje bʼa wa skʼenayotik soka jasa wa xcholotiki. Ja it oj bʼobʼ ya jom kolomtik. Yajni ay maʼ wa xtaʼa loʼil, wa xkʼanayi jach chʼabʼan ja Jyoba a-skoltayon bʼa oj kil ja ixuk winik jaw jastalni wa xyila ja yeʼn. Jachuk mi jaʼ wa xwaj jkʼujol ja jastal ayon wa xkabʼi sok wa x-och jpensaraʼuk jastal oj bʼobʼ jkoltay».
Mok katikan slejel ja matik wa skʼanawe stajel ja smeranili
Yajni x-ekʼ ja tyempo, jujuntik lek oj yabʼye ja wa xkʼujolantik skoltajele bʼa a-snaʼe sbʼaj ja Jyoba
Cha tʼilani oj jpensaraʼuktik jastal oj jtsatsankʼujoluktik ja jmoj-aljeltik maʼ wala eltisok xcholjeli. Ja Jessica wa xyala: «Ta june bʼa keʼntikon mi lek wajyuj, wa xleʼa modo mi jel oj jpensaraʼuk ja jasa ekʼeli. Wa xtukbʼes ja loʼili sok wa xleʼa modo bʼa stajel tiʼal jun jasunuk bʼa lek, jastal ja slekilal wa xyaʼakan ja xcholjeli anima ay matik mi lek wa sjakʼawe».
Ja Jyoba wa snaʼa lek ja wokolik wa x-ekʼ jbʼajtik ja bʼa xcholjeli, sok jelni wa xgustoʼaxi yajni wa xjeʼatik syajal jkʼujoltik jastal ja yeʼn (Luc. 6:36). Ja yeʼn mini tolabida oj snaʼ yajulal. Sok wa xjipa jkʼujoltik wani snaʼa ja mero styempoʼil oj yijan ja xchʼakelal ja jastik junuk it. Malan x-eljul ja jaw, jelni tʼilan mok katikan elel ja bʼa xcholjeli (2 Tim. 4:2). Ja yuj, la jkʼuluktik gusto lek ja cholal kiʼojtiki sok la jnatik syajulal spetsanil tikʼe ixuk winik.
