Jastal yajel el mas slekilal sok yabʼjel stsamalil ja spaklajel ja Biblia

STSANJEL BʼA

JA Josué tey bʼa skʼabʼ jun jasunuk jel wokol: jani yijel och ja chonabʼ Israel ja bʼa Luʼum Kʼapubʼali. Bʼa oj bʼobʼyuj ja it tʼilani oj kuchyuj niwak wokolik. Pe ja Jyoba yala yabʼ lekni oj wajyuj sok stsatsankʼujolan bʼa mok xiwuk sok tsats aʼajyuk. Yala yabʼ a-skʼuʼuk sok a-skʼumuk ja sLey kʼakʼu akwal bʼa skʼulajel spetsanil ja jas kanel tsʼijbʼunubʼal ja tiw. Ya skʼuʼuk lek, ta skʼulan ja jaw, lekni oj wajyuj sok oj skʼuluk toj lek (Jos. 1:7, 8).

Ja bʼa «tsaʼanikxta kʼakʼu [...] jel wokol, bʼa mi oj naxuk jas oj kʼulaxuk», ojni cha ekʼ jbʼajtik ja keʼntik ekʼeleʼik bʼa jel wokol (2 Tim. 3:1, TNM). Pe lekni oj wajkujtik ta jkʼulantik ja jasa aljiyabʼ ja Josué yuja Jyoba. Skʼumajel tikʼan ja Biblia oj skoltayotik bʼa yajel makunuk ja srasonik yajni wa xjak jbʼajtik prebaʼik.

Wa xnaʼatik jitsan bʼa keʼntik mi xnaʼatik spaklajel sok jujuntik mini xkʼulantik gusto. Pe yuja jel ay stʼilanil spaklajel ja Biblia, kʼela ja rekwagro « Kʼulan probar ja jastik junuk it» bʼa wa sjeʼa lekil jastik junuk bʼa yajel el slekilal ja spaklajel ja Biblia.

Jun tsʼebʼanum stsʼebʼantay: «Tojowon ja bʼa sbʼejlalil jawa mandariki, yujni ja bʼa it jel wa xkʼulan gusto» (Sal. 119:35). Ja weʼn jelni oj cha awabʼ slekilal skʼumajel ja Yabʼal ja Dyosi. Ojni ataʼ jitsan jastik chaʼanyabʼal yajni x-ocha naʼ sbʼaj mas.

Anima ja weʼn mi oja toj jun chonabʼ jastal ja Josué, pe ojni ekabʼaj wokolik. Ja yuj, jastalni Josué, paklay sok amakunuk ja jasa tsʼijbʼunubʼal bʼa wa lekilal weʼni. Ta akʼulan, lekni oj wajukawuj sok oja kʼuluk toj lek.

KʼULAN PROBAR JA JASTIK JUNUK IT

Ayi orasyon bʼajtanto oja paklay. Ja Biblia jani yiʼoj ja spensarik ja Dyos ja maʼ kechanta jel juntiro ja Yipi sok yaʼakan atsʼijbʼaxuk bʼa jlekilaltik. Ja yuj, yajni xa kʼuman ja Biblia, kʼanayi ja skoltanel bʼa oja wabʼ stojol, bʼa oj juluka kʼujol sok bʼa oja wa makunuk ja bʼa wa sakʼanil (Esd. 7:10).
Aʼabʼaj sjobʼjelik. Yajni wana skʼumajel ja Biblia ma ja juʼuniki, jobʼo abʼaj: «¿Jas wa sjeʼaki bʼa Jyoba ja jasa jkʼumani? ¿Jastal wa syaka sbʼaj soka yolomajel ja Biblia? ¿Jastal oj bʼobʼ ka makunuk ja bersikulo it bʼa skoltajel ja tuki?».
Pensaraʼan ja jas waxa kʼumani. Kʼotan tekʼan ja bʼa wana skʼumajeli sok pensaran: «¿Jastal wa xkabʼ wa xya ajyukon ja it? ¿Jas yuj jach wa xya ajyukon? ¿Jastal wa syaka sbʼaj soka jastik ekʼel jbʼaji, ja jastik wan ekʼel jbʼaji soka jastik ojto ekʼ jbʼaji? ¿Jastal oj bʼobʼ ka makunuk ja bʼa jsakʼanil ja rasonik it bʼa Biblia?» (Job 23:5; Sal. 49:3). Pensaran ta waxa naʼa xcholjel jas yuj ja Jyoba wa xyala yabʼ ja xchonabʼ ayawe elkan jun tikʼe modoʼal sok jasa swokolil oj yijan ta mi nochxi ja srasoniki (Deut. 32:28, 29).
Aʼekʼuk bʼa wa olom ja yajni waxa kʼuman ja loʼilik bʼa Biblia. Jun sjejel, yajni ja ismaelitaʼiki wan chonjelyile ja José yuja smoj-aljeliki, ¿wan maʼ x-ekʼ bʼa wa wolom ja jasa wan ekʼeli? (Gén. 37:18-28). ¿Jas waxa wila, jas waxa wabʼi sok jastik yikʼil? Ochan bʼa slugar ja matik wa xtaxi tiʼali. Jobʼo abʼaj: «¿Jasa wane spensarajeli? ¿Jastal ay wa xyabʼye?». Spensarajel sbʼaja jastik junuk jaw oj ya sakʼwukjan ja loʼiliki, sok ja weʼn oja wa eluk mas slekilal ja spaklajeli.
Amakunuk ja yamkʼabʼalik bʼa spaklajel chapubʼal bʼa oj paklaxuk mas. Naʼa sbʼaj ja bʼa ayxa elel ja bʼa wa kʼumali, jach bʼa Internet ma bʼa kʼulxel imprimir. Kʼanayi ja tuk a-skoltaya bʼa oja naʼ yajel makunuk lek. Jun sjejel, ja bʼa Índice de las publicaciones Watch Tower soka bʼa Juʼun bʼa koltanel spaklajel oja taʼ jastik junuk bʼa tuktukil loʼilik sok bʼa xcholjelik bʼa jitsan bersikuloʼik bʼa Biblia. Amakunuk ja poyeto Koltajel bʼa spaklajel ja Yabʼal ja Dyosi, ja tiw ayiʼojan mapaʼik bʼa wa xcholo jastik junuk, ja tyempo chʼak ekʼ jani, yalal jastik junuk sok sbʼisjelik sok tuk jastik junuk.
Tsomokan ja jastik mas tʼilani. Ja jaw oj makunukawuj bʼa oj juluka kʼujol ja jas apaklayi. Masto oj cha koltanuk ta acholo yabʼ tuk ja jasa nebʼa. ¿Ay maʼ bʼa ataʼa jun jasunuk bʼa oja wa makunuk ja bʼa xcholjeli? Ja jastik junuk it oj skoltaya bʼa oj juluka kʼujol ja jastik mas tʼilani, sok oj bʼobʼa wa makunuk ja jastik anebʼa bʼa skoltajel ja tuki.