JA BʼA Biblia bʼutʼel yaljelik bʼa ixuke sok winike sbʼaja jastal yabʼ aye yujni jachuke «jastal ke‘ntik» (Sant. 5:17, Ja yajkʼachil sju‘unil ja dyosi [YD]). Jun sjejel, ja jekabʼanum Pablo yala jaman lek: «Ja ke‘ni wa xkʼana oj jkʼuluk ja bʼa leki. tini wa x‘el kuj ja bʼa mi lekuki. [...] jel a‘julal jbʼaj ja ke‘ni» (Rom. 7:21-24, YD). Bʼobʼta jachni wa xkabʼtik jastal yeʼn. Yajni wanotik skʼulajel luchar soka mulal kiʼojtik, ja jas yala ja yeʼn wa xyaʼa kulan jkʼujoltik.

Ja Pablo cha yala jastal wa xyabʼ sbʼaja xchamelal ja Jesús. Ja bʼa Gálatas 2:20 yala: «Ja yunin ja Dios ja maʼ jel yaj huax yabyoni. Y yena ni yaa sbaj yuj ja queni». Ja jekabʼanumi skʼuʼunej lek ja jaw. ¿Wan maʼ xpensarantik jastal yeʼn? Bʼobʼta ay ekʼeleʼik wa xkʼulantik dudar sbʼaja jaw.

Ta wa xkabʼtik mi xbʼajintik yuja mulalik jkʼulunejtiki, bʼobʼta wokol wa xkabʼtik skʼuʼajel ta meran wa syajtayotik sok wa xyaʼawotik perdon ja Jyoba. Sok bʼobʼta masni wokol yabʼjel stojol ja koltanel yaʼa ja Jesús juni majtanal bʼa keʼntik. ¿Meran maʼ wa skʼana jach oj kiltik ja Jesús? Ta jachuk, ¿jasa oj skoltayotik? La katikyi sjakʼjel ja chabʼ sjobʼjel it.

Ja Jesús wa skʼana la kiltik ja xchamelal jastal jun majtanal. ¿Jas yuj wa xkʼuʼantik? La jpensaraʼuktik ja jas wa xcholo ja bʼa Lucas 23:39-43, TNM. Jun winik ti lokan ekʼ bʼa teʼ bʼa yijel wokol ja bʼa stsʼeʼel ja Jesús. Yuj maʼ staʼunej jun chaʼan smul, pes ja tikʼe kastigo wan yijeli jatani wa x-ajiyi ja matik wa skʼulane jastik jel malo. Yuja jel chamkʼujol ay yuja jastal wa xtaxi, spatayi skʼujol ja Jesús: «Naʼawontokan ja keʼn ja yajni la och ja bʼa wa mandaraneli».

¿Jastal sjakʼa ja Jesús? La jpensaraʼuktik ja syajal ja yolom ja yajni wan sutjel sbʼaj skʼeljel ja mulanumi. Anima jel yaj xyabʼi, stsatsanskʼujolan sbʼaj bʼa oj tsenuk sok tsamalxta yaljel yabʼ: «Merani lek wa xkalawabʼ ja wego, tini oj ajyan jmok ja bʼa Kʼachinubʼi». Ja Jesús kechanta oj bʼobʼ ya julyi skʼujol ajyi ja Yunin ja winiki oj ‹yaa ja svida ba oj bob ajyuc libre spetzanil› ja kristyano (Mat. 20:28). Pe mini jach skʼulan, skoltay ja mulanumi bʼa oj yabʼ stojol ja xchamelal sbʼajni yeʼna. Yala yabʼ: «Tini oj ajyan jmok». Sok cha yala yabʼ jun slekilal oj staʼ stsʼakatal yuja koltanel yaʼa: ojni bʼobʼ ajyuk sakʼan ja bʼa Kʼachinubʼ bʼa Luʼumi.

Ja mulanum jaw mixani bʼobʼ sjeʼ ta oj yaʼteltay ja Dyos. Pe ja Jesús wani skʼana ayabʼ stojol ja mulanum jaw ja xchamelali juni majtanal bʼa yeʼn. Pe ta ja Jesús skʼana ayabʼ stojol ja winik jaw, cha jachni wa skʼana ayabʼ stojol june maʼ yiʼonejxa jaʼ bʼa sutxita skʼujol soka smuli. Anto, ¿jas oj skoltayotik bʼa oj jkʼuʼuktik jujune ja keʼntiki ja xchamelal ja Kristo meran wa xbʼobʼ skoltayotik?

Ja Pablo yabʼni stojol ja Jesús chamni yuj yeʼna yuja ajiyi ja cholal bʼa oj xchol yabʼ ja  tuk. Xcholo: «Huax cʼana yi stzʼacatal ja Cajualtic Jesucristo porque huax yaa quip ba oj cʼuluc ja catel it yaunej quii. Huax yila que jun xta ay ja jcʼujoli jayuj yaunej ni qui ja catel iti. Jach scʼulunej qui conser jel piero huax taa tiʼ ajyi. Jel juntiro quixtalaan. Mi alben ja jas huax cala sbaj ajyi» (1 Tim. 1:12-14). Soka cholal ajiyi yuja Jesús, ja Pablo skʼuʼani lek naji syajal, wa xyajtaji sok wa xjipji skʼujol smok. Ja Jesús cha yaʼunejkitik ja cholal bʼa oj jcholtik ja sGobyerno ja Dyos (Mat. 28:19, 20). ¿Jach maʼ wa xkabʼtik ja keʼntik jastal ja Pablo?

La kiltik ja jas ekʼ sbʼaj ja Albert, ja yeʼn ajkʼachto kumxel soka Jyoba yujni tʼusan mi ayxa 34 jabʼil expulsadoʼay. Wa xcholo: «Tolabida wa xjuljkʼujol ja jmulik jkʼuluneji. Pe yajni wala elyon ja bʼa xcholjeli, wa xkabʼ ja Jesús yaʼunejki ja cholal it, jastalni ja Pablo. Ja it wa xya gustoʼaxukon sok wa skoltayon bʼa oj waj jkʼujol ja jastik lek bʼa keʼna, ja jsakʼanil sok ja bʼa tyempo jakumi» (Sal. 51:3).

Ja Allan jun winik jel kʼakʼ bʼa jelni sleʼa ja smuli bʼajtanto oj snebʼ ja smeranili. Ja yeʼn wa xyala: «Wantoni xpensaran ja jastik mi lek jkʼuluneji. Ay ekʼeleʼik, wala tristeʼaxiyon. Jelni xkayi tsʼakatal ja Jyoba yuja yaʼunejyi jun mulanum jastal ja keʼn bʼa xcholjel yabʼ ja kristyano ja lekil notisya. Yajni wa xkila jastal wa sjakʼawe ja kristyano wa xjul jkʼujol janekʼto ja slekilal soka syajtanel ja Jyoba. Wani xkʼuʼan wa xya makunukon bʼa skoltajel ja kristyano bʼa ayiʼoje jun smodoʼe jastal ja keʼn ajyi».

Elel ja bʼa xcholjeli wa skoltayotik skʼulajel ja bʼa leki sok spensarajel jastik junuk tsamal. Wani xya jkʼuʼuktik lek ja Jesús wa sjeʼakitik yajulal kʼujolal, wa syajtayotik sok wa sjipa skʼujol jmoktik.

Bʼobʼta ojtoni syajbʼesotik ja jkʼujoltik yuja jastik mi lek jkʼulunejtiki manto xchʼaysnajel ja sluʼumkʼinal jel malo ja Satanás. ¿Jasa oj skoltayotik bʼa yajel eluk ja tikʼe pensarik jaw?

Ja Jean tikʼanxta wa spensaraʼan jeltoni smul xyabʼi yuja yiʼoj ajyi chabʼ tikʼe sakʼanil ja yajni akʼixto. Pe wa xyala: «Jelni gusto xkabʼ yuja ‹Diosi [...] jel nihuan ja yeni›» yuja jkʼujoltiki (1 Juan 3:19, 20). Cha ja keʼntik wa xyaʼa kulan jkʼujoltik snajel ja Jyoba soka Jesús wa xyabʼye stojol yuja mulanumotiki. La juljkʼujoltik ja yajalkʼujol jani nikjiye bʼa yajel ja koltanel sbʼaja mulanumik matik wa sutxi skʼujole, mi jaʼuk ajiyile ja matik mey smuleʼi (1 Tim. 1:15).

Jkʼuʼunejtik lek ja koltanel it juni majtanal bʼa keʼntik ta wa xkʼulantik ja chabʼ jasunuk it: spensarajel sbʼaja jastal ja Jesús yila ja kristyano mulanumik sok skʼujolajel ja janekʼ oj bʼobʼkujtik ja aʼtel bʼa xcholjel yaʼunej kankitiki. Jachuk oj bʼobʼ kaltik jastal ja Pablo: ja Jesús «jel yaj huax yabyoni. Y yena ni yaa sbaj yuj ja queni».