Ja smeranili, mini june ja bʼa jtyempotiki wa snaʼa jastal mero ja Pablo. Ja dibujoʼik wa xjexi ja bʼa juʼuntiki kʼulubʼal dibujar, sok mi ti kʼulubʼaluk kopyar bʼa poko jastik junuk kanel ja bʼa najate.

Pe wa xnaʼatik ay jujuntik jasunuk bʼa wa sjeʼa jastal maʼ kʼot ja splanta ja Pablo. Jun sjejel, ja rebista it bʼa número 1 bʼa marzo bʼa 1902, yala ja bʼa libro Hechos de Pablo y Tecla (tsʼijbʼaxi bʼa jabʼil och 150) wa xcholo jastal ja Pablo sok jani ja mas naʼubʼal sbʼaj: «Jun winik mi jel chaʼanuk, bʼasan ja s-olomi, jamantik ja yechmali, ay yip, staʼunej sbʼaj ja smatsapi, najatik ja sniʼi». Ja jaw bʼobʼta jani ja mas wa xkʼot staʼ ja jastal ja splanta ja Pablo.

Jun diccionario wa xcholo ja libro Hechos de Pablo y Tecla ayni yiʼojan loʼilik bʼa meran ja jasa wa xyala (The Oxford Dictionary of the Christian Church [el bʼa 1997]). Jujuntik siglo tsaʼan yajni tsʼijbʼaxi ja libro jaw, jelni kisji. Pes ajyi 80 juʼunik bʼa griego sbʼaja libro jaw sok bʼa tuk kʼumalik. Ja yuj, ja jastal wa xkʼulantik dibujari wa slaja sbʼaj sok jujuntik ja bʼa jastal wa xchiktese ja bʼa najate ja splanta ja Pablo.

Pe lekni oj jnatik ay jas mas tʼilan yuja splanta ja jekabʼanum Pablo. Yajni wan skʼulajel ja yaʼteli, jujuntik skʼenaye sok yalawe: «Jel coel juntiro. Mi ni huas snaa jastal oj och loil» (2 Cor. 10:10). Pe mok chʼay jkʼujoltik ja yeʼn och nochuman yujni ja Jesús sjeʼa sbʼajyi bʼa jun milagro. Oj cha bʼobʼ jpensaraʼuktik jasa lajxi skʼulajel yuja tsaji bʼa «oj sloilta yab ja [...] cristiano» ja sbʼiʼil ja Jesús (Hech. 9:3-5, 15; 22:6-8). Sok tʼilani oj jpensaraʼuktik janekʼto wa skoltayotik ja libroʼik bʼa Biblia bʼa aji ekʼyi yuja Jyoba a-stsʼijbʼuk.

Ja Pablo mini yala jastal ja splanta sok mini cha yaʼa sbʼaj niwan yuja jastik skʼulunej bʼajtanto yuj oj och nochumani (Hech. 26:4, 5; Filip. 3:4-6). Yala: «Ba spetzanil ja jmoj jecabanumili, quena ni mero mas chʼinon [...]. Mi ni sbejuc oj aljuc cab jecabanumila» (1 Cor. 15:9). Mas tsaʼan cha stsʼijbʼan: «Ja ba spetzanil ja yuntiquil ja Diosi bob ta quena ni mas jel chʼinon [...]. Pero quena ni acʼubal qui ja atel iti ba oj cala huabyex [...] ja jastal jel nihuan juntiro ja Cristo» (Efes. 3:8). Merani leka, ja rason jawi masni jel tʼilan yuja splanta ja Pablo.